Ezai 62 - NYANMIƐN NDƐ'N 1998

Zerizalɛm uflɛ'n

¹ Siɔn, n klo wɔ, i ti n su muan-man min nuan, Zerizalɛm n klo wɔ, i ti n su tran-man lɛ sa ngbɛn lele san ɔ́ sa bɔ a yo i nuan su'n ɔ ´fite su wein kɛ wia'n b'ɔ fite nglɛmun'n sa, lele san delɛ bɔ Anannganman ɔ ´de wɔ'n, ɔ ´fite nglo wein kɛ tɛ bɔ be sɔ i nuan b'ɔ kpaja'n sa.

² Kɛ ɔ ko yo sɔ'n, kpɛkuun nvle-nvle'm be nunfuɛ'm be ´wun kɛ a yo sa i nuan su, yɛ famiɛn'm be kwlaa be ´wun kɛ a lɛ nyrun. Yɛ ɔ dunman uflɛ bɔ Anannganman ɔ ´kle'n, be ´fa flɛ wɔ .

³ A wa yo kɛ famiɛn kle klanman kpa kun sa Anannganman i sa nun, a wa yo kɛ tannin klanman bɔ famiɛn'm be to blabla bé ti wun'n sa ɔ Nyanmiɛn'n i sa nun.

⁴ Be su flɛ-man wɔ kɛ klɔ Bɔ B'a Niɛn-mɛn i Nyrun Kun. Be su flɛ-mɛn ɔ mɛn'n kɛ Lika Srolo kun. Sanngɛ be ´flɛ wɔ kɛ Klɔ Bɔ i Wun Yo Min Fɛ'n. Be ´flɛ wɔ mɛn'n kɛ Bla Bɔ Lɛ Bian. Afin ɔ́ wun ´yo Anannganman i fɛ, yɛ sɛ n kwla ´se'n, wɔ asiɛ'n ɔ ´nyan bian.

⁵ Kɛ gbanflɛn kun yo talua kun i wun'n, i kunngba nin-ɔn, ɔ mma'm be wa kaci kɛ ɔ́ wun sa. Kɛ talua kun i wun yo i wun'n i fɛ'n, ɔ kusu ɔ́ wun wa yo ɔ Nyanmiɛn'n i fɛ.

⁶ Zerizalɛm, n fali be bɔ be kpla klɔ'n be wie sieli ɔ talɛ'n su. Kɔnguɛ nin wia su be su muan-man bé nuan. Amun nga amun yo bɔ Anannganman i wla kpɛn Zerizalɛm su'n, nán amun de wunmiɛn.

⁷ Nán amun yaci i diin, amun `yo i sɔ lele man ɔ fa Zerizalɛm `sie i laa osu'n nun, amun `yo i sɔ lele man ɔ fa Zerizalɛm yo asiɛ wunmuan i anyrunnyan like.

⁸ Kɛ bɔ Anannganman ɔ kwla'n ti'n, ɔ tali nda kɛ yoo: «N su fa-man ɔ ble'n n man-man ɔ kpɔfuɛ'm be kɛ be fa ta bé wun, yɛ n su kplin-man su kɛ sran'm bɔ be fin lika wie'n be wa nɔn ɔ nzan lɔflɛ'n bɔ a fɛli nan ɔ'a nyɛn i'n.

⁹ Sanngɛ be nga be ´kpɛ ble'n, be yɛ be ´di ble sɔ nin-ɔn, yɛ be ´manman Anannganman-an. Yɛ be nga be ´ti vinyi'n i su mma'n be yɛ be ´nɔn nzan'n min sua'n i awlo'n klun nun lɔ-ɔ.»

¹⁰ Zerizalɛmfuɛ mun, amun `fite, amun `fin klɔ'n nun `fite ndɛndɛ. Amun `siesie atin kun be `man be nga be su sa bé sin be ´ba'n. Amun `kata atin nun buɛbuɛ mun, amun `yiyi i nun yɛbuɛ mun. Yɛ amun `man flanga kun su nvle-nvle'm be nunfuɛ'm bé su.

¹¹ Amun `nian, kɛ ɔ fɛ i asiɛ'n i bue kun lele fa ju i bue kun lɔ'n. Anannganman kan ndɛ kle sran mun. I waan be `se Siɔnfuɛ'm be kɛ: «Sran'n b'ɔ ´de amun'n ɔ su ba, akatua'n wo i sa nun, i junman'n i su like ng'ɔ nyɛnnin i'n ɔ ´fa ba .»

¹² Be wa flɛ amun kɛ Anannganman i Nvle Nunfuɛ Mun, yɛ be ´flɛ amun ekun kɛ Be Nga Anannganman Deli Be'n. Yɛ wɔ Zerizalɛm, be su flɛ-man wɔ kɛ Klɔ Bɔ Be Wanndi I'n kun, sanngɛ be ´flɛ wɔ siɛn'n kɛ Klɔ Bɔ Be Konvi Sɔ I'n.