Ezai 55 - NYANMIƐN NDƐ'N 1998

Sɛ amun lɛ-man sika bɔbɔ'n, amun `bla

¹ Amun kwlaa nga nzue we kun amun'n, amun `bla, nzue o wa! Kannzɛ bɔ sika nun-man amún sa nun o, amun bla be wa fa like be di, be yi-man nun dein. Amun bla be wa fa nzan nin nɔnnɔn, sika fite-man nun, be to-man .

² ?Ɔ yo sɛ ti yɛ amun fa sika to aliɛ ng'ɔ ta-man sran nin-ɔn? ?Ɔ yo sɛ ti yɛ amun kle amún wun yalɛ be kunndɛ like ng'ɔ yi-man sran ku nin-ɔn? Sɛ amun ti ndɛ nga n kan be'n, amun ´nyan like kpa be ´di, aliɛ kpakpa mun yɛ amun ´di-ɔ .

³ Amun `sie amún su, yɛ amun `bla ń sin. Amun `tie ndɛ nga n kan'n, yɛ amun ´nyan nguan. E nin amun e wa tra aenguɛ, ɔ su saci-man le . Anannganman seli kɛ: «Ye nga n kan kleli David kɛ n ´yo i'n, n ´fa yo amun.

Nyanmiɛn nuan ndɛ bɔ i nuan yia titi'n

⁴ N fɛ i sieli kɛ ɔ `kan min ndɛ kle nvle-nvle'm be nunfuɛ mun nan ɔ `yo mɛnmɛn'm be nyrun dunfuɛ, yɛ ɔ `sie be.

⁵ Izraɛlfuɛ mun, amun kusu amun `nian, amun wa flɛflɛ nvle-nvle wie'm be nun sran bɔ amun si-man be'n, yɛ sran sɔ'm bɔ be si-man amun'n, be wa wanndi be ba amún sin. M bɔbɔ min Anannganman bɔ n ti amun Nyanmiɛn'n m bɔ man amun lɛ nyrun'n, min ti yɛ be ´ba-a.»

⁶ Blɛ bɔ be fa bé wun mantan Anannganman ɔ tɛ yo ye'n, amun `kpɛ amun nyin i wun lɔ, kɛ ɔ tɛ o koko'n, amun `kpan flɛ i.

⁷ Man sran ng'ɔ bu-man Nyanmiɛn nin i ndɛ'n be like fi'n, ɔ `yaci i atin tɛ'n i su falɛ. Man sran nga i nzuɛn'n ti tɛ'n, ɔ yaci akunndan tɛtɛ'm be bulɛ'n. Man ɔ bla Anannganman'n i sin, ɔ ´si i aunnvuɛ. Man ɔ bla e Nyanmiɛn b'ɔ yaci sran'm bé wun sa'n cɛ be wein'n i sin.

⁸ Anannganman wan yoo: «Min klun akunndan'n nin amun liɛ'n ti-man kun. Atin nga amun fa su'n nin min liɛ'n ti-man kun.

⁹ Kɛ nyanmiɛn'n b'ɔ la nglo lɔ plaii'n nin asiɛ'n be afiɛn'n fa ti nun fuun ju'n, i kunngba'n yɛ min atin'n bɔ n fa su'n nin amun liɛ'n be fa ti-ɔ, yɛ i kunngba'n yɛ min klun akunndan'n nin amun liɛ'n be fa ti-ɔ.

¹⁰ Kɛ nzue'n tɔ'n, yɛ kɛ bɔlɛ ufue'n gua'n, bɔ be sa-man bé sin nglo lɔ ngbɛn san be ´lualua asiɛ'n nan ɔ `yo like ye'n, nan fie'm be su ninnge'm be `yo kpa'n, nan fie difuɛ'm b'a nyan like b'a lua'n, nan sran'm b'a nyan aliɛ b'a di'n ,

¹¹ kɛ min ndɛ b'ɔ fin mín nuan fite'n ɔ ti sɔ-ɔ, sɛ ɔ ti sran'n, wuun n ´se kɛ ɔ sɛ-mɛn i sin mín wun wa sa ngbɛn, san ɔ ´yo min klun sa, san ɔ ´yo nga bɔ i ti yɛ n sunmɛnnin i'n.»

¹² Nanwlɛ, kɛ amun ´fin Babilɔni lɔ fite'n, amun klun ´jɔ, be ´fa amun ba amún mɛn'n nun wɛtɛɛ su. Sɛ oka mun nin kpɔlɛ mun be ti sran'n, wuun n ´se kɛ be ´bo sro, yɛ sɛ blɔ lɔ waka'm be ti sran'n, wuun n ´se kɛ be ´bo ndɛ.

¹³ Siprɛs'm be ´fifi susrɛ'm be osu, yɛ mirt'm be ´fifi flɔn'm be osu. I sɔ'n ɔ wa yo Anannganman'n i manmanlɛ like. Ɔ ´yo nzɔliɛ kun b'ɔ ´ka lɛ tititi, b'ɔ be su yi-mɛn i lɛ le.