Ezai 54 - NYANMIƐN NDƐ'N 1998

B'a yi-man Zerizalɛmfuɛ'm be ase kun

¹ Zerizalɛmfuɛ mun, amun bɔ amun ti kɛ klun kpanfuɛ mun sa'n, amun bɔ amu'an nyan-man ba kun'n, amun `bo sro. Amun bɔ amu'an wu-man ba kun'n, man amun wun blibli amun, yɛ man amún wun nyrɛn amun! Afin Anannganman wan yoo: «Amun bɔ amun ti kɛ bla nga b'a yaci be'n sa'n, amun mma'm be wa sɔn tra bla nga be tɛ o bé wun'm bé bo'n !»

² Ɔ man amun `trɛ amún tannin sua'm be nun. Man be tinngɛ amún sua'm bé su tannin'm be nun. Amun `nian nun yo be dan! Amun `cuɛn amun tannin sua'm be nyanman'm be nun, amun `sisi amún sua'm be ja'm bé bo kpa.

³ Afin amun wa trɛ kɔ fama su nin bɛ su. Amun osu'n nunfuɛ'm be ´fa nvle-nvle mun, yɛ be ´tran klɔ nga be ´ka lɛ ngbɛn'n bé su.

⁴ Nyannzuɛn su kun-man amun, i sɔ'n ti nán amun klun titi amun. Amun su sokpa-man, i sɔ'n ti nán amún sa sin bubu amun. Amún wla wa fi nyannzuɛn bɔ amun wunnin i amun kaan nun'n i su. Yɛ amún wla su kpɛn-man nyannzuɛn bɔ amun wunnin i blɛ bɔ amun kacili kɛ angboti bla mun sa'n i su.

⁵ Afin sɛ e ´kwla se'n, sran ng'ɔ yili amun'n yɛ ɔ ti amun wun nin-ɔn. I dunman'n yɛlɛ Anannganman b'ɔ sie mɛn wunmuan'n. Sran ng'ɔ kpɔ amun ti'n, yɛlɛ Izraɛl Nyanmiɛn'n. Be flɛ i kɛ asiɛ wunmuan'n i Nyanmiɛn.

⁶ Anannganman ɔ'a fa amun ekun kɛ bla bɔ be yacili i, bɔ i wla ti bowa, kpɛkuun be fɛ i kɛ be ´jɛ i ekun'n sa. Amun Nyanmiɛn'n usa kɛ yoo: «?Be gbanflɛn nun bla'n, be yaci i-ɔ ɔ yo ye?

⁷ N kpɔcili amun blɛ kan, sanngɛ n klo amun dan, ɔ man n ´fa amun ekun.»

⁸ Anannganman b'ɔ ti amun ti kpɔfuɛ'n wan yoo: «Ya b'ɔ kunnin min dan'n ti n kacili ń sin n sili amun blɛ kan. Sanngɛ klolɛ bɔ n klo amun titi'n ti, n wa si amun aunnvuɛ.

⁹ N wa yo kɛ Noe blɛ su'n sa, n tali nda kɛ Noe blɛ su nzue dan b'ɔ tɔli'n, ɔ su tɔ-man sɔ di-man asiɛ'n kun. N su ta nda ndɛ ekun kɛ n su fa-man amún wun ya kun, yɛ n su kan-man ndɛ kekleekle n kle-man amun kun.

¹⁰ Kannzɛ man oka'm be jaso be takawlɛ'n nun'n, kannzɛ man kpɔlɛ'm be keje bɔbɔ'n, klolɛ nga n fa klo amun'n, ɔ su kaci-man le, yɛ nda nga n tali amun kɛ m ´man amun alaje'n, ɔ ´ka lɛ tititi. Min Anannganman bɔ n si amun aunnvuɛ'n, min yɛ n se sɔ-ɔ.»

Wafa nga Zerizalɛm'n wa kaci'n

¹¹ «Amun Zerizalɛmfuɛ mun bɔ amun ti nyrɛnnɛnfuɛ bɔ aunngban dan'n ɔ'a fita amun klɔ'n su lele'n, bɔ sran fi fɔnvɔ-man amun'n, amun `nian, n ´fa yɛbuɛ nglanman-nglanman n ´fa kplan amun klɔ'n i uflɛ, n ´fa safir n ´fa wla klɔ'n i wun talɛ'n i bo ase,

¹² n ´fa ribi yɛ n ´fa kplan talɛ nin-ɔn, n ´fa kristal yɛ n ´fa yo i anuan mun-ɔn, yɛ n ´fa yɛbuɛ kpakpa ngunmin yɛ n ´fa yo i wun talɛ'n kwlaa-a .

¹³ Amun mma'm be kwlaa be ´yo min sɔnnzɔnfuɛ. Be ninnge'm be wa yo ye kpa bé sa nun .

¹⁴ Nanwlɛ'n i dunman nun ti, amun wa ´jran cinnjin kpa, sran'm be su tin-man amun su fii kun, i ti srɛ su kun-man amun. Amun ´nyan amun ti sa sroesroe'm be nun, afin be su kun-man amún srɛ kun.

¹⁵ Sɛ be waan be nin amun be ´kun'n, i sɔ'n su fin-man min lika. Sran ng'ɔ fa alɛ wla amún sin'n, n ´yo man ɔ ´tɔ.

¹⁶ Amun `nian, min yɛ n yi blalɛ bofuɛ'n b'ɔ trɔ sin'n ɔ fita nun fa yi alɛ ninnge kwlaa nga i waan ɔ ´yi nin-ɔn. Yɛ kusu n kunngba'n min yɛ n yili ninnge sɔ'm be sacifuɛ'n kɛ ɔ saci be-ɔ.

¹⁷ Alɛ ninnge kwlaa nga be yi i kɛ be ´fa kun amun'n, ɔ ´yo ngbɛn. Sɛ sran wie fa amun kɔ jɔlɛ difuɛ wie ja su'n, amun ndɛ'n ´tɔ i su, be ´bu i fɔ. Sa nga n ´yo man be nga be ti min sufuɛ mun'n, yɛ ɔ o lɛ-ɔ. Like ng'ɔ ti be liɛ b'ɔ ti i nuan su'n, bɔ n ´yo man be'n, yɛ ɔ o lɛ-ɔ.» Anannganman i ndɛ b'ɔ kan'n, yɛ ɔ o lɛ-ɔ.