Ezai 50 - NYANMIƐN NDƐ'N 1998

Nyanmiɛn nin Izraɛlfuɛ'm b'a bu-man

¹ Anannganman waan: «?Fluwa bɔ n klɛli b'ɔ kle kɛ m'an yra amún nin'n, ɔ o ninfan? ?Annzɛ kusu, sran nga i kalɛ wo min su bɔ n yoli amun atɛ i sa nun'n, yɛlɛ wan? Sɛ be yoli amun atɛ'n, ɔ fin amun fɔnlɛ bɔ amun fɔnnin'n, sɛ be kannin amún nin bo'n, ɔ fin amun sa tɛtɛ bɔ amun yo'n.

² ?Kɛ m bali'n, ɔ yo sɛ ti yɛ m'an to-man sran fi-ɔ? ?Kɛ n flɛli amun'n, nguɛ ti yɛ sran fi ɔ'a tɛ-man mín su-ɔ? ?N sa'n ti tika nan se kɛ n kwla fa de-man amun? ?N lɛ-man wunmiɛn n kwla yo-man nan amun fite-man nun? Kɛ n kan ndɛ kle jenvie'n, kpɛkuun i nun nzue'n ɔ'a wie nun. Sɛ n kan ndɛ kle nzue ba mun'n, be wu kee. Yɛ nzue b'ɔ nun-man lɛ'n ti'n, jue'm be wu, yɛ be kplɔ.

³ N yo man nyanmiɛn'n su dun tuun, yɛ sɛ ɔ ti sran'n, wuun n ´se kɛ n wlɛ i wun bajɛ tralɛ.»

Anannganman i sufuɛ'n

⁴ Anannganman Nyanmiɛn'n ɔ yo man n si ijɔ kɛ be nga be suan like'n be fa ijɔ'n sa, i waan ɔ ´yo nan m'an si ndɛ ng'ɔ fata kɛ n kan nan m'an fa uka be nga b'a fɛ mun'n ti. Nglɛmun kwlaa, ɔ tinnge min, yɛ ɔ kle min wafa nga n ´fa ń su n ´sie ndɛ nga be kan'n i bo'n kɛ be nga be suan like'n be fa yo'n sa'n.

⁵ Anannganman Nyanmiɛn'n ɔ tikeli mín su'n, yɛ m'an yo-man nyin kekle, m'an wanndi-man.

⁶ N tikeli min sin'n su m mannin be nga be boli min'n, n yacili min nyrun'n lɛ m mannin be nga be tutuli min akanza'n kɛ be ´kpɛ min nzowa'n, kɛ be ´ti be nuan nzue ´ta mín wun'n, m'an kata-man min nyrun .

⁷ Anannganman Nyanmiɛn ukali min, i ti min nyin a gua-man ase. N trali min anwlɛn kekle kpa. N si kɛ nyannzuɛn su kun-man min.

⁸ Anannganman b'ɔ jin mín sin'n, ɔ mantan min koko. ?Wan yɛ i waan ɔ ´sanman min-ɔn? Ɔ `bla man e wɔ jɔlɛ difuɛ'n i ja su. ?Wan yɛ ɔ nin min lɛ ndɛ-ɔ? Man ɔ wunnge mín wun wa.

⁹ Be `nian, Anannganman Nyanmiɛn ɔ ´ba min ukalɛ. ?Wan yɛ ɔ kwla bu min fɔ-ɔ? Min kpɔfuɛ'm be kwlaa be wunmiɛn'n ɔ ´wie, be ´yo kɛ tralɛ tafuɛn bɔ nvɔlɛ di'n sa .

Be `tie Anannganman i sufuɛ'n i ndɛ b'ɔ kan'n

¹⁰ ?Amun nun onin yɛ i nyin yi Anannganman b'ɔ ti i sufuɛ'n i ndɛ b'ɔ kan nin-ɔn? Sran ng'ɔ nanti aosin'n nun'n, bɔ like kpɛjɛ-mɛn i atin'n su'n, man ɔ lafi Anannganman i dunman'n su, yɛ man ɔ kisa i Nyanmiɛn'n su.

¹¹ Amun kwlaa nga amun sɔ sin nuan'n, bɔ amun sɔ ta mma'm be nuan'n, amun ´wlu amun bɔbɔ amún sin sɔ'n nun, amun ´wlu ta mma nga amun sɔli be nuan'n be afiɛn. Anannganman yɛ man amun ´yo sɔ-ɔ. Amun ´tran nyrɛnnɛn'n nun.