Ezai 38 - NYANMIƐN NDƐ'N 1998

Ezekias i tukpacɛ tɔlɛ nin i juejue yolɛ

¹ I blɛ sɔ nun'n, Ezekias tɔli tukpacɛ, ɔ ti-man nguan liɛ. Yɛ Amɔz i wa Ezai b'ɔ ti Nyanmiɛn i nuan ijɔfuɛ'n ɔ wa toli i nan ɔ'a se i kɛ: «Anannganman waan a siesie wɔ aja'n, afin a su nyan-man nguan, a ´wu.»

² Ezekias kpɛli i nyin talɛ lɔ, yɛ ɔ srɛli Anannganman,

³ ɔ seli i kɛ: «Ee! Anannganman, yaci! Nán ɔ wla fi kɛ m'an fɔn-man. Yɛ n nantili wɔ atin'n su kɛ ɔ fata'n sa. N yoli sa nga be yo wɔ fɛ'n.» Ezekias sunnin sunlɛ kpa.

⁴ Yɛ Anannganman kannin ndɛ nga kleli Ezai-ɔ.

⁵ Ɔ seli i kɛ: «Ko se Ezekias kɛ: ‹Anannganman b'ɔ ti ɔ nannan David i Nyanmiɛn'n i waan: N tili ɔ srɛlɛ'n, n wunnin ɔ nyinmuɛn'n. Nian, n ´sa ɔ nguan'n su afuɛ blu-nin-nnun.

⁶ N ´de wɔ a nin klɔ nga sufuɛ mun Asiri famiɛn'n i sa nun. N ´sasa klɔ nga.›

⁷ Nzɔliɛ nga Anannganman ´fa man wɔ b'ɔ ´kle kɛ ndɛ ng'ɔ kannin i nuan ´yia'n yɛ. I waan:

⁸ ‹Nian, fɔnvɔ'n b'ɔ o Akaz i asikalie'n su'n, bɔ wia'n man ɔ jrali'n, n wa yo man ɔ ´sɛ i sin asikalie'n i kan be tiatia lɛ'n ɔ ´ju i blu su'n su lɔ.› Yɛ sakpa-sakpa, asikalie'n i kan be tiatia lɛ'n i blu bɔ fɔnvɔ'n guali su'n, wia'n ɔ wa sɛli i sin boli lɛ ekun-ɔn.»

Kɛ Ezekias yoli juejue'n i Nyanmiɛn b'ɔ srɛli'n

⁹ Kɛ famiɛn Ezekias tɔli tukpacɛ b'ɔ jasoli'n, fluwa ng'ɔ kleli'n yɛ o yɛ.

¹⁰ «N seli min wun kɛ: Min afuɛ nga n ko di'n, m'an di i bue, n wa kɔ blɔlɔ lɔ, n ko di min afuɛ'n i onga'n lɔ.

¹¹ N seli min wun ekun kɛ: N su wun-man Anannganman be nga bé nyin o su'm be asiɛ'n su kun, n su wun-man sran fi mɛn nga sran'm be tran nun'n i nun kun.

¹² Lika nga n tran nun'n, b'a de min sa nun, b'a sua b'a ɔ min wun mmua kɛ bua kankanfuɛ'n i tannin sua'n sa. Sɛ n ´kwla se'n, m'an nyɔnnyɔn min nguan'n kɛ tannin wufuɛ'n ɔ nyɔnnyɔn tannin'n sa. B'a yi min nzaliwa'n su b'a jra. Anannganman, kɛ lele bɔ lika'n ´fa dun'n, wuun w'a wiewie min.

¹³ M muannin mín nuan lele aliɛ'n cɛnnin. Anannganman ɔ'a bubu min owie'n kwlaa nun kɛ asɔmɔli sa. Anannganman, kɛ lele bɔ lika'n ´fa dun'n, wuun w'a wiewie min.

¹⁴ N kpan fie fie kɛ alialia b'ɔ tu sin'n sa. N kplin kɛ auble sa. N kwla fa-man min nyinma n nian-man nyanmiɛn su lɔ kun. Awlaboɛ'n wo mín su dan, bla wa uka min.

¹⁵ ?N ´se sɛ bɔ cɛ? Afin like nga Nyanmiɛn waan ɔ ´yo man min'n, ɔ yoli. Kɛ min nyin tɛ o su'n, awlaboɛ b'ɔ o min su'n ti'n, n ´kan min wun ase.

¹⁶ Anannganman, ɔ klun b'ɔ ti kpa'n ti yɛ sran tran nguan nun-ɔn, ɔ klun b'ɔ ti kpa'n ti yɛ n tɛ de wunmiɛn-ɔn. W'a jaso min, wɔ man n tɛ o nguan nun.

¹⁷ Siɛn'n, min awlaboɛ'n ɔ'a kaci aunjuɛ a man min, afin a klo min dan, a yoli man wie'n ɔ'a to a fuan min. W'a to mín sa tɛ'm be kwlaa a gua be blo ɔ́ sin lɔ.

¹⁸ Blɔlɔ lɔ'n sran fi manman-man wɔ lɔ, nán fuɛn'm be yɛ be ´bo ɔ dunman-an. Be nga b'a wu'n, be lafi-man su kɛ a kwla yo be ye ekun.

¹⁹ Be nga bé nyin o su'n, be nga be tɛ o nguan nun'n kɛ min sa'n be yɛ be kwla manman wɔ-ɔ.

²⁰ Anannganman deli min. Kɛ e nyin tɛ o su'n, e ´bo e ngowa ninnge mun Anannganman i sua'n nun lɔ.»

²¹ Ezai kannin kɛ: «Amun ko fa figie mma'n wie, amun tin nan be fa ta kannin'n nun, yɛ Ezekias ɔ ´yo juejue.»

²² Yɛ Ezekias usali kɛ: «?Nzɔliɛ onin yɛ ɔ kle kɛ n ´kɔ Anannganman i sua'n nun ekun-ɔn.»