Ezai 37 - NYANMIƐN NDƐ'N 1998

Ezekias ko wunnin Ezai b'ɔ ti Nyanmiɛn nuan ijɔfuɛ'n i wun

¹ Kɛ famiɛn Ezekias tili ndɛ sɔ'n, ɔ titili i wun tralɛ'm be nun, ɔ wlali bajɛ tralɛ, nan ɔ'a ɔ Anannganman i sua'n nun lɔ.

² Eliakim b'ɔ ti famiɛn sua'n i su kpɛn'n nin Sɛbna b'ɔ ti fluwa klɛfuɛ'n, ɔ nin Nyanmiɛn nyrun jranfuɛ'm be nun kaklaakla mun'n, Ezekias sunmannin be Amɔz i wa Ezai b'ɔ ti Nyanmiɛn nuan ijɔfuɛ'n i sin. Kɛ be ´kɔ'n, bajɛ tralɛ o bé wun.

³ Be ko seli i kɛ: «Ezekias waan e se wɔ kɛ: ‹Ndɛ cɛn'n ti awlaboɛ cɛn nin fɔ tulɛ cɛn, ɔ nin nyannzuɛn cɛn. Ɔ ti kɛ ba bɔ b'a sie wulɛ bɔ sanngɛ fanngan nga be ko fa ko wu be'n nun-man lɛ'n sa.

⁴ Atrɛkpa-a Anannganman ´ti nzowa nga Asiri famiɛn'n sunmannin i sufuɛ safunyrɛn'n kɛ ɔ wa kpɛ i bɔbɔ Nyanmiɛn b'ɔ lafi-man nin o! Sɛ ɔ nin i be ´kan o! Ɔ man Ezekias waan a srɛ Nyanmiɛn man be nga be ka lɛ mun.› »

⁵ Ezekias i sunmanfuɛ'm be ko toli Ezai.

⁶ Ezai seli be kɛ: «Amun `ko se amun si kɛ Anannganman waan: ‹Nzowa nga Asiri famiɛn'n i sran'm be kpɛli min bɔ a tili'n, nán man ɔ kun wɔ srɛ.

⁷ Nian, Asiri famiɛn'n ɔ wa ti ndɛ kun. Kpɛkuun n ´fa akunndan kun n ´wlɛ i ti nun. Ɔ ´sɛ i sin i mɛn'n nun. Kpɛkuun m man be ´fa tokofi be ´kun i lɔ.› »

Sankerib wlanwlannin Ezekias ekun

⁸ Safunyrɛn'n tili i kɛ Asiri famiɛn'n ɔ'a jaso Lakis ɔ'a ɔ Libna. Kɛ ɔ wa to i'n, wuun ɔ'a fa alɛ'n ɔ'a wla Libnafuɛ'm bé sin.

⁹ Be wa kan kleli Sankerib kɛ Etiopi famiɛn nga be flɛ i kɛ Tiraka'n ɔ'a ti nyanman lɔ, ɔ su ba kɛ ɔ nin i be wa kun. Kɛ ɔ tili ndɛ sɔ'n cɛ'n, yɛ ɔ sunmannin sran Ezekias sin ekun-ɔn. I waan:

¹⁰ «Amun `ko se Ezekias b'ɔ ti Zida famiɛn'n kɛ: ‹Nán yaci ɔ wun lɛ man Nyanmiɛn nga a fa ɔ wla'n guɛ i su'n ɔ laka wɔ. Sɛ be se wɔ kɛ: Asiri famiɛn'n su fa-man Zerizalɛm'n, nán fa su.

¹¹ Sa kekleekle nga Asiri famiɛn'm be yoli i mɛn'n kwlakwla nun'n nin sacilɛ nga be fa sacili be'n, a si i kwlakwla sɔ'n. ?A bu i kɛ a ´fin nun fite?›

¹² Kɛ famiɛn nga be dun mmua min nyrun be ´bubu Gɔzan, nin Aran, nin Resɛf, nin Edɛnifuɛ'm be klɔ ng'ɔ ti be famiɛn klɔ'n, ɔ nin Tɛlasar, nvle sɔ'm be amuɛn mun b'a kwla sasa-man be.

¹³ Bu sa ng'ɔ juli Amat famiɛn'n, nin Arpad, nin Sɛfarvaim, nin Ena, ɔ nin Iva famiɛn'm bé su i akunndan.»

Ezekias i Nyanmiɛn srɛlɛ'n

¹⁴ Ezekias fali fluwa'n sunmanfuɛ'm bé sa nun. Ɔ kanngannin nun. I sin ɔ ɔli Anannganman i sua'n nun lɔ, ɔ trɛli nun kleli Anannganman.

¹⁵ I sin Ezekias srɛli Anannganman seli kɛ:

¹⁶ «Anannganman b'ɔ sie mɛn wunmuan'n, Izraɛl Nyanmiɛn, wɔ yɛ a ti anz nga be nian ɔ ninnge'm be su'n be su kpɛn nin-ɔn. Ɔ kunngba yɛ a ti asiɛ'n kwlaa su Nyanmiɛn nin-ɔn. Wɔ yɛ a yili nglo'n nin asiɛ nin-ɔn.

¹⁷ Anannganman, sie ɔ́ su tie. Anannganman, tike ɔ nyinma nan nian. Tie nzowa nga Sankerib ɔ'a sunman sran kɛ ɔ wa kpɛ wɔ Nyanmiɛn bɔ a lafi-man nin-ɔn.

¹⁸ Anannganman, Asiri famiɛn'm be sacili nvle kun nga mun, yɛ be nunnunnin be.

¹⁹ Be guali lɔ amuɛn'm be sin nun, be wɔli be nun, yɛlɛ kɛ be ti-man Nyanmiɛn, afin sran sa yɛ ɔ yoli be-ɔ, waka ɔ nin yɛbuɛ yɛ be fa yoli be-ɔ.

²⁰ Anannganman e Nyanmiɛn, de ye Sankerib sa nun, man asiɛ'n su famiɛn diwlɛ'm be nunfuɛ'm be kwlaa be si kɛ wɔ Anannganman wɔ kunngba cɛ yɛ a ti Anannganman nin-ɔn.»

Anannganman tɛli Ezekias i srɛlɛ'n su

²¹ Yɛ Amɔz i wa Ezai sunmannin sran kɛ be ko se Ezekias kɛ: «Anannganman b'ɔ ti Izraɛl Nyanmiɛn'n waan: ‹N tili srɛlɛ nga a srɛli i Sankerib i ndɛ b'ɔ kannin'n ti'n.

²² Nan nga m bɔbɔ ´fa tɛ i su'n yɛ: Sankerib, Siɔnfuɛ'm be bu-man wɔ like fi, srilɛ yɛ be sri wɔ-ɔ! Kɛ be wun wɔ'n, be keje be ti'n sɛkɛsɛkɛ.

²³ ?Wan li yɛ a kɛnnin i ndɛ tɛtɛ bɔ a kpɛli i nzowa nin-ɔn? ?Wan yɛ a ´kɛn i ndɛ bɔ a man ɔ nɛn'n su nin-ɔn? ?Wan yɛ a kpɛli i kannglɛ gaan nin-ɔn? ?Izraɛl Nyanmiɛn bɔ fɔ nun-mɛn i wun nin-ɔn, nɛ́n i-ɔ?

²⁴ A sunmannin sran kɛ be wa kpɛ m bɔbɔ min Anannganman min nzowa. Yɛ a se kɛ: M bɔbɔ min Sankerib, min kakaklolo kpanngban'n, n fa n fuli oka'm bé su. N fa ɔli Liban mɛn'n i bo'n nun lɔ crɔcrɔcrɔ, n kpɛli sɛdri waka'm be nun ndɛnndɛn kpa mun, ɔ nin siprɛs waka'm be nun nglaannglaan kpa mun. N wɔli lele n juli Liban'n i oka nga be o mmua-mmua kpa'n bé wun lɔ, n fuli be su. N wɔli lele n wluli i bo mle kpa'm be nun.

²⁵ N wɔli lele n ko kpɛli nzue kunman mɛn kun nga'm be nun, kɛ n fali min ja n takali Ezipt asiɛ'n su sa ngbɛn'n, Nil b'ɔ ti nzue ba dan'n ɔ nin i sama mun be ka lɛ be wieli nun wein yɛ be wuli kee.

²⁶ Sankerib ɔ kpa'n, a si-man kɛ n siesieli sa sɔ mun lalaa ɔ'a cɛ. Nán ndɛ yɛ m'an gugu kɛ be `ju-ɔ. Sa nga n sieli be laa'n, be su ju ndɛkɛn. Min yɛ man a fali klɔ nga be si bé wun talɛ bɔ yɛbuɛ ngunmin yɛ ɔ ka be osu lɛ nin-ɔn.

²⁷ Klɔ sɔ'm be nun sran'm be yo like fi-ɔ ɔ yo-man ye. Sran sɔ'm be wawɛ'n wanndi bé wun, nyannzuɛn'n kun be kpo. Be ti kɛ blo lɔ ijre, annzɛ nnya mɔnnɛn flɛkpɛ-flɛkpɛ wie sa. Be ti kɛ fie bɔ i su ninnge'm be nian fifi-man'n sa.

²⁸ N liɛ'n, n wun kwlaa nga a yo'n, sɛ a ´tran ase o, n wun wɔ, sɛ a ´fite gua su lɔ o, n wun wɔ, sɛ a ´ba awlo o, n wun wɔ, sɛ a ´fa ya mín wun o, n wun wɔ.

²⁹ Kɛ bɔ a fali mín wun ya, bɔ a kannin min wun ndɛ tɛtɛ'n ti'n, n wa wla ɔ bue nun nga, yɛ n ´wla ɔ́ nuan nun nga. N ´fa wɔ n ´sin atin kunngba nga a fa bali'n su, n ´fa wɔ n ´sa ɔ́ sin.›

³⁰ Ezekias, n ´kan sa nga be wa ju'n n ´kle wɔ. Afuɛ'n, ninnge nga be fifi fie'm be su ngbɛn sa'n, bé su mma'n yɛ amun ´fa yo aliɛ be di-ɔ. Afuɛ ng'ɔ ´ba lɛ'n, amun ´di i sɔ ekun, sanngɛ afuɛ ng'ɔ ´su i su'n, amun ´lua ble, amun ´ta vinyi waka, amun ´di i su mma'n.

³¹ Zida akpasua'n sufuɛ nga be kali lɛ'n, be ´yo kɛ waka bɔ be lɛ olui, bɔ mma o be su'n sa.

³² Sran nga be onga kaan be wa ka lɛ'n, yɛ be kaan nga be ´fite nun'n, be ´ka Siɔn oka'n su.» Like nga bɔ Anannganman i klolɛ dan b'ɔ klo amun'n ti ɔ ´yo'n yɛ ɔ o lɛ-ɔ.

³³ Anannganman kan ndɛ ng'ɔ o yɛ'n ekun man Asiri famiɛn'n, i wan yoo: «Asiri famiɛn'n su wlu-man klɔ nga nun, ɔ su to-man ta wa, ɔ su kplan-man nyrɛn wa, ɔ su kplan-man kpata nga be jran su be kun alɛ'n i wa.

³⁴ Atin ng'ɔ fali su bali'n, i kunngba'n i su yɛ ɔ ´fa yɛ ɔ ´sɛ i sin-ɔn. Klɔ nga, ɔ su wlu-man nun. M bɔbɔ min Anannganman yɛ n se sɔ-ɔ.

³⁵ M bɔbɔ min dunman'n ti, ɔ nin min sufuɛ David ti, n ´sasa klɔ nga, yɛ n ´de i nun sran mun.»

Asirifuɛ'm be kɔlɛ, yɛ Sankerib i wulɛ

³⁶ Anannganman i anz'n ɔli Asirifuɛ'm be nanmue'n nun. Ɔ ko kunnin sran akpi-akpi ya sran akpi-akpi ablaɔcuɛ-nin-nnun (185.000). Be ´jaso nglɛmun-ɔn, nanmue'n nun ti fuɛn ngunmin.

³⁷ Yɛ Sankerib b'ɔ ti Asiri famiɛn'n ɔ jasoli lɛ-ɔ. Ɔ sɛli i sin ɔli Niniv ko trannin lɔ. Le kun b'ɔ koto i amuɛn bɔ be flɛ i kɛ Nisrɔk'n i sua'n nun lɔ, kpɛkuun i wa Adramelɛk nin Sarɛzɛr be ko kunnin i nin tokofi, nan b'a wanndi b'a ɔ Ararat mɛn'n nun lɔ. Nan i wa Ezar-Adɔn ɔ'a yo famiɛn ɔ'a sin i osu.