Ezai 33 - NYANMIƐN NDƐ'N 1998

Sran b'ɔ ti like sacifuɛ'n, i yako!

¹ Ɔ bɔ a saci like'n bɔ be nian saci-man wɔ wie'n, ɔ yako! Ɔ bɔ a laka ɔ wiengu mun'n bɔ be nian laka-man wɔ wie'n, ɔ yako! Kɛ a ko wie ninnge'm be saci'n, be ´saci wɔ wie kusu. Kɛ a ko wie ɔ wiengu be laka'n, be ´laka wɔ be ´nyan wɔ wie kusu.

² Anannganman, si ye aunnvuɛ, e wla'n wo ɔ su. Nglɛmun kwlaa man e wunmiɛn. Sɛ e o nyrɛnnɛn nun'n, de ye.

³ Kɛ a tian fiaan'n, kpɛkuun sran'm b'a kaci bé sin be su kɔ. Kɛ a tin ɔ́ wun ase'n, kpɛkuun nvle-nvle'm be nunfuɛ'm b'a bo b'a sanndi.

⁴ Kɛ ɔ ko yo sɔ'n, wuun ninnge fɛnlɛ'n ɔ'a ju. A wun ninnge fɛnfuɛ mun sa-a ɔ waan lalo mun-ɔn. Be tɔ ninnge'm be su gblu wuun be su fɛn, be ti kɛ aɛcɛ kpanngban wie mun sa.

⁵ Anannganman'n yɛ ɔ kwla-a, afin ɔ tran nglo lɔ. Ɔ'a sie nanwlɛ dilɛ'n nin sa nuan su yolɛ'n Zerizalɛm wunmuan'n nun.

⁶ Anannganman i nvle nunfuɛ mun, Anannganman yɛ ɔ nian amun su-ɔ, amun klun su ti-man amun. Ngwlɛlɛ nin sa'm be silɛ'n be ti anyanbeun, be yɛ man sran fite nun-ɔn. Amun nyin b'ɔ yi Anannganman'n yɛ ɔ ti amun anyanbeun-ɔn.

Anannganman waan ɔ ´yi i wun nglo

⁷ Amun `nian, safunyrɛn mun yɛ be ´kpan gua su lɔ lɛ-ɔ. Aunjuɛ jasin bofuɛ'm be sun piaan.

⁸ Atin dandan'm bé su ɔ'a tɔ bliin, yɛ sran fi sin-man atin kanngan'm be su kun. Siefuɛ tɛ'n ɔ'a saci anuansɛ'n i su mmla'n, ɔ'a kan lalofuɛ'm be bo, ɔ bu-man sran fi sran.

⁹ Ɔ yo kɛ sɛ yɛ ɔ'a tɔ mɛn'n su sa, ɔ'a wu kee. Sɛ Liban'n ti sran'n, wuun e ´se kɛ ɔ'a wun nyannzuɛn, yɛ i wunmiɛn'n ɔ'a wie. A wun Sarɔn lɔ lika kpɛtɛkplɛɛ'n sa-a ɔ waan aawlɛ flɛnnɛn wie-ɔ. Sɛ Bazan mɛn'n nin Karmɛl oka'n be ti waka'n, wuun e ´se kɛ bé ti'm b'a kpa.

¹⁰ Anannganman'n wan yoo: «Siɛn'n, n wa tin min wun ase, siɛn'n, n wa yi min wun nglo, siɛn'n, n wa kle kɛ n ti dan.

¹¹ Amun akunndan nga amun buli'n kwlaa ti kɛ ijre kee sa. Kɛ be fite nglo'n be ti kɛ ijre sa. Kpukpuwa ng'ɔ fin amun nun fite'n, ɔ ti kɛ sin sa, ɔ ´yra amun.

¹² Nvle kun nga'm be nunfuɛ'm be liɛ'n, sin ´yra be kɔlikɔli. Be ´yo kɛ ijre tɛ bɔ be kpɛ be guɛ i sin nun be wɔ nun'n sa.

¹³ Amun bɔ amun wo mmua lɔ'n amun `nian sa nga m'an yo'n. Yɛ amun nga kusu bɔ amun wo koko'n, amun `nian kɛ n kwla-a.»

¹⁴ Siɔn lɔ be nga be yo sa tɛ'n, srɛ kun be. Be nga be nyin yi-man Nyanmiɛn'n, be usu. Be usa kɛ: «Wan yɛ ɔ wo e nun b'ɔ kwla jran sin dan nga i nyrun-ɔn? ?Wan yɛ ɔ wo e nun b'ɔ kwla jran sin kpli ng'ɔ nuan-man mlɔnmlɔn yɛ'n i wun koko-ɔ?»

¹⁵ Sran ng'ɔ fa mmla'n su'n, b'ɔ yo sa i nuan su'n, b'ɔ klo-man like nga be de i be wue kekle su'n, b'ɔ sɔ-man adi ninnge'm be nun'n mlɔnmlɔn'n, bɔ kɛ be ´kan sran kunlɛ ndɛ be kle i'n ɔ tannin i su'n, b'ɔ kɛtɛ i nyin kɛ ɔ ´yo nan ɔ'a wun-man sa tɛ'n,

¹⁶ i sɔfuɛ'n ɔ wa tran oka'm be su, ɔ ´fia yɛbuɛ yɛbuɛ kendengleiin'm be nun. Ɔ ´nyan aliɛ di i titi, ɔ ´nyan nzue nɔn i titi.

Zerizalɛm i delɛ'n

¹⁷ Zerizalɛmfuɛ mun, amun wa wun kɛ famiɛn'n i nyɛnmɛn'n ti ju'n. Amun wa wun kɛ mɛn'n i tɛtrɛ'n ti ju'n.

¹⁸ Kpɛkuun amun ´bu srɛ ng'ɔ kunnin amun laa'n i akunndan. Yɛ amun wa usa amún wun kɛ: «?Sran ng'ɔ nian lapo'n su'n wo ninfan? ?Sran ng'ɔ tra lapo'n wo ninfan? ?Yɛ sran ng'ɔ nian klɔ'n i sasawlɛ sua'm be su'n wo ninfan?»

¹⁹ Amun su wun-man sran'm bɔ be sro-man sa'n be kun, bɔ be kan ndɛ-ɔ sran ti-man'n, bɔ be aniɛn'n fa-man aniɛn'n, bɔ i ti be kan-an sran ti-man'n.

²⁰ Amun `nian Siɔn b'ɔ ti ye anyia klɔ'n. Amun wa wun kɛ Zerizalɛm klɔ'n ti tranwlɛ b'ɔ ti diin. Ɔ ti-man tannin sua nan b'a tu i bo. Be su tutu-mɛn i kpɛngbɛ'm be bo le. Be su nyanji-mɛn i nyanman mun.

²¹ Lɛ yɛ Anannganman wa kle e kɛ ɔ ti dan sakpa nin-ɔn. Nzue ba kanngan mun nin nzue ba dandan'm be ´tran lɛ. Mmeli bɔ be fa tɛbua be fa kan'n be su sin-man be su. Mmeli ngbli-ngbli'm be su sin-man lɛ.

^22-23 Amun mmeli'n i nyanman'm b'a nyanji, i ti man i blalɛ flolo'n kwla jran-man kpa kun, yɛ i tannin'm be ti-man jranwa cinnjinnjin kun. Ɔ man be su cɛ be kpɔfuɛ'm bé bo ninnge kpanngban nga be fɛnnin'n be nun. Cɛcɛwafuɛ'm be bɔbɔ be fɛn ninnge sɔ'n wie. Afin Anannganman yɛ ɔ di e jɔlɛ mun-ɔn. Anannganman yɛ ɔ siesie mmla'n man ye-ɔ. Anannganman yɛ ɔ ti e famiɛn-ɔn. I yɛ man e fite nun-ɔn.

²⁴ Zerizalɛmfuɛ'n wie fi su se-mɛn kɛ: «N kpinndin-man.» B'a yaci be bɔ be tran Zerizalɛm'n bé sa tɛ'n ɔ'a cɛ be.