Ezai 28 - NYANMIƐN NDƐ'N 1998

Aunngban dan b'ɔ ´saci Samari'n

¹ Samari klɔ'n b'ɔ ti kɛ famiɛn kle sa'n, bɔ Efraim nzanboɛfuɛ'm be fa di be nuan'n, sɛ ɔ ti sran'n, wuun n ´se kɛ i yako! Ɔ o kongo bɔ be yo nun like-ɔ ɔ yo ye'n i nglo, waka nyrɛ bɔ ɔ'a glɔ'n, ɔ'a fa fɛfɛ i wun kɛ like kpa wie sa. I nun sran bɔ nzan'n ɔ'a saci be'n be yako.

² Amun `nian, Anannganman ɔ'a sunman sran kun, ɔ ti kekle kpa, ɔ ti waka-waka kpa, ɔ su ba. Ɔ ti kɛ nzue bɔ kɛ ɔ ´tɔ-ɔ nzraama gua'n sa, ɔ ti kɛ aunngban dan b'ɔ saci like'n sa, ɔ ti kɛ nzue b'ɔ kpalo waa blɛ bɔ nzue'n ɔ su tɔ'n sa. Anannganman su klɔ sɔ'n i bo yi i ase.

³ Amun `nian, klɔ bɔ ti kɛ famiɛn kle sa'n, bɔ Efraim nzanboɛfuɛ'm be fa di be nuan'n, b'a tiatia su.

⁴ Amun `nian, klɔ b'ɔ o kongo bɔ be yo nun like-ɔ ɔ yo ye'n i nglo'n, waka nyrɛ b'ɔ ɔ'a glɔ b'ɔ fa fɛfɛ i wun kɛ like kpa wie sa'n, be ´tiatia su. Samari klɔ'n ɔ ´yo kɛ figie mma b'ɔ blo ndɛ nun, bɔ sran ng'ɔ dun mmua wun i'n, ɔ ti, kpɛkuun ɔ kalɛ di i ndɛndɛ'n sa.

⁵ I cɛn sɔ nun'n, Anannganman b'ɔ sie mɛn wunmuan'n, i sran nga be kali lɛ'n, ɔ ´yo kɛ be famiɛn kle nyɛnnyɛnnyɛn sa, ɔ yo kɛ be kpongbo kle klanman wie sa.

⁶ I yɛ ɔ ´kle be nga be di jɔlɛ'n be sa nuan su yolɛ-ɔ. Be nga be ´fuan be kpɔfuɛ'm be lele ´ju be klɔ i nuan lɔ'n, i yɛ ɔ ´man be fanngan-an.

Nzanboɛfuɛ'm be su yo Nyanmiɛn nuan ijɔfuɛ'n i finfin

⁷ Nyanmiɛn nuan ijɔfuɛ'n nin Nyanmiɛn nyrun jranfuɛ'n, nzan kekle bɔ be nɔn ti'n, be nanti sa dadaada. Nzan'n ɔ'a bo be dan. Nzan kekleke'm b'a mlin be. Be ´kan sa nga be wunnin be aolia nun'n, wuun be nuan ´to fuan. Be ´di jɔlɛ'n, wuun be ´usu-usu.

⁸ Be tabli nga be tran be su be di like'n, be ti fiɛ ngunmin kokoko, b'a yo sa kain kain kain. Be wun-man lika kun b'ɔ ti weiin-ɔn.

⁹ Be usa kɛ: «?Wan yɛ Ezai sɔ'n i waan ɔ ´kle i like nin-ɔn? ?Wan yɛ i waan ɔ ´tutu aolia nun sa'm bé bo kle i nin-ɔn? ?Ba nɔnman nga blɛ yɛ b'a kpɛ be nyɔnflɛn mun-ɔn? ?Ba kanngan nga b'a ti be nyɔnflɛn su mun-ɔn?

¹⁰ Amun `nian ndɛ ng'ɔ kan'n i wafa wie yɛ: a, o, i. Be `yo nga e! Be `yo nga e!»

¹¹ Siɛn'n, sran nga be nuan'n kwla-man ijɔlɛ'n, bɔ be kan aniɛn wie mun'n, be yɛ Anannganman wa yo man be kan ndɛ kle nvle nga nun sran mun-ɔn.

¹² Anannganman dun mmua seli be kɛ: «Wa liɛ'n, amun wa de wunmiɛn, amun `yaci be nga b'a fɛ'n be lɛ man be de wunmiɛn. Wa lika'n ti fɔuun.» Sanngɛ b'a kplin-man su kɛ be ´ti ndɛ sɔ'n.

¹³ Yɛ be liɛ'n, Anannganman i mmla ɔ ti-man like fi bé sa nun. Ɔ ti be nyrun kɛ be su kle: a, o, i sa. Ɔ ti kɛ be su se kɛ be `yo nga e be `yo nga e! I sin, i awieliɛ su'n, be ´tɔ be ´la be nyin aanga, be wi'n ɔ ´bu. Be ´tɔ sran'm be aya'n nun, yɛ be ´tra be.

Yɛbuɛ b'ɔ tra sua'n i cɔnjɔ'n nun'n

¹⁴ I sɔ'n ti, amun nga amun yo sran'm be finfin'n, amun bɔ amun sie Zerizalɛmfuɛ mun'n, amun `sie amún su tie Anannganman i ndɛ'n.

¹⁵ Amun waan amun nin wie'n b'a tra aenguɛ, amun waan amun nin blɔlɔ'n b'a tra janvuɛ, ɔ man kɛ sa kekle'n ɔ ´ba'n, ɔ ´to fuan amun, afin amun waan amun ´fia ato'n i sin, yɛ amun fa gblɛ'n ´kata amún nyin.

¹⁶ I sɔ'n ti, ndɛ nga Anannganman Nyanmiɛn kan'n yɛ. I waan: «Min, n fali yɛbuɛ kun b'ɔ ti sua'n i bo ase wlalɛ liɛ'n n fa n sieli Siɔn lɔ. Ɔ ti yɛbuɛ kekleke kpa, i yɛ ɔ tra sua'n i cɔnjɔ'n i ase-ɔ, i gua'n ti-man blɛblɛ, ɔ ti takawa kpa. Sran ng'ɔ kisa su'n, ɔ ´yo cinnjinnjin sɔ wie .

¹⁷ Sɛ n kwla ´se'n, min nyanman nga n ´fa sunnzun like'n yɛlɛ sa i nuan su yolɛ'n, yɛ min nyanman bɔ sunmun wo i nuan, bɔ n nian su bɔ man kɛ n ´kplan talɛ'n ɔ yo seiin'n, yɛlɛ mmla'n.» Sɛ e fa ato'n e sunnzun fiawlɛ'n e `se kɛ nzraama bɔ kɛ nzue ´tɔ'n ɔ gua'n, ɔ ´saci i. Sɛ e fa gblɛ'n e sunnzun sua'n, e se kɛ nzue'n ɔ sonji wlu nun'n, ɔ ´yi.

¹⁸ Aenguɛ bɔ amun nin wie'n amun trali'n, ɔ ´saci, yɛ janvuɛ bɔ amun nin blɔlɔ'n amun trali'n, ɔ su yo-man ye kun. Blɛ bɔ sa kekle'n ɔ ´ba'n, ɔ ´tɔ amun su wie.

¹⁹ Blɛ'n kwlaa b'ɔ ´ba'n, ɔ ´kan amun. Afin ɔ ´ba nglɛmun kwlaa, ɔ ´ba wia'n nun, yɛ ɔ ´ba kɔnguɛ. Kɛ be ´ti i ngan'n, kpɛkuun srɛ ´kun be.

²⁰ Bɛ'n ɔ wa yo kaan, i ti be su kwla-man su la, yɛ tannin nga be fa kata be su'n ɔ ´yo kaan, ɔ man ɔ su ju-man be su katalɛ.

²¹ Anannganman nin sran mun ´nyɛn i kɛ Pɛrazim oka'n su lɔ liɛ'n sa. Ya b'ɔ ´kun i dan'n ti, ɔ ´usu kɛ Gabaɔn lɔ lika kpɛtɛkplɛɛ'n nun lɔ liɛ'n sa, ɔ ´di i junman'n, ɔ ´di i junman sroesroe'n, nguɛ junman tɛtrɛ yɛlɛ nga !

²² Siɛn'n, amun `yaci amun sran'm be finfin yolɛ, sɛ ɔ ti-mɛn i ti-ɔ, nyanman'n ɔ ´mian amun kɔmin. Afin be wa saci mɛn wunmuan'n, ɔ lɛ-man ayre. Anannganman b'ɔ sie mɛn wunmuan'n yɛ ɔ seli min sɔ-ɔ.

Fie difuɛ'n i ngwlɛlɛ'n, Nyanmiɛn i ngwlɛlɛ'n

²³ Amun `sie amún su, amun `ti min aniɛn'n! Amun `sie amún su kpa, amun `ti min ndɛ'n!

²⁴ ?Sran ng'ɔ tutu lika kɛ ɔ ´lua like'n, ɔ ka lika'n i tutulɛ'n su tititi? ?Sɛ i waan ɔ ´bo i lika nun kofie'n, kɛ ɔ jin kofie bolɛ'n su'n yɛ ɔ jin-ɔn?

²⁵ ?Kɛ ɔ yo bɔ asiɛ'n i ngba ko sɛ'n, nɛ́n yɛ ɔ lua nigɛl nin kumɛn nin-ɔn? I sin ɔ gua ble'n nyanman-nyanman, yɛ ɔ gua ɔrz'n i guawlɛ'n nun. Kpɛkuun ɔ gua ble kekleke'n fie'n i nuan'n su.

²⁶ I Nyanmiɛn'n yɛ ɔ kleli i i yowlɛ nin-ɔn. I yɛ ɔ kleli i like bɔ be yo be'n be su ngwlɛlɛ nin-ɔn.

²⁷ Be fa-man waka nɔnnin be yiyi-man nigɛl i mma'n, yɛ be fa-man kakaklolo i ja'n be sin-man kumɛn'n su, sanngɛ waka yɛ be fa bo nigɛl nin-ɔn, yɛ waka tiantian yɛ be fa bo kumɛn nin-ɔn.

²⁸ Ɔ fata kɛ be fa waka nɔnnin be bo ble'n, sanngɛ be yo-mɛn i sɔ cɛ-man. Nnɛn kpanngɔ'm be cuɛn kakaklolo'n, yɛ i ja'm be sin ble'n su, sanngɛ be fa fufu-man ble'n i mma'n.

²⁹ Sa wafa nga be yo be lɛ'n be fin Anannganman b'ɔ sie mɛn wunmuan'n. Be kle kɛ i sa ng'ɔ siesie be'n be yo nyɛnmɛn, yɛ ɔ si sa yo dan.