Ezai 24 - NYANMIƐN NDƐ'N 1998

Asiɛ wunmuan'n b'ɔ ɔ'a saci'n i ndɛ

¹ Amun `nian, Anannganman wa saci asiɛ'n, ɔ man asiɛ'n i sufuɛ'm be ´wie. Ɔ ´utu i nyin ase, yɛ ɔ ´sanngan be nga be o su'n be nun.

² Sa ng'ɔ ´ju Nyanmiɛn nyrun jranfuɛ'n i su'n, ɔ ´ju nvle'n nunfuɛ'm be su wie, ng'ɔ ju awlo bo kpɛn i su'n, ɔ ´ju i sufuɛ yasua'n i su wie, ng'ɔ ju awlo bo kpɛn'n i yi'n i su'n, ɔ ´ju i afanniɛn bla'n i su wie, ng'ɔ ju like atɛ yofuɛ i su'n, ɔ ´ju like tofuɛ'n i su wie, ng'ɔ ju sran b'ɔ be fɛ like i sa nun'n i su'n, ɔ ´ju sran ng'ɔ fɛ like'n i su wie ng'ɔ ´ju sran bɔ bo bosia'n i su'n, ɔ ´ju sran nga be bo i bosia'n i su wie.

³ Asiɛ'n ɔ ´saci mlɔnmlɔn, be ´wie i su ninnge'm be fɛn. Afin Anannganman kannin ndɛ ng'ɔ o yɛ'n:

⁴ «Asiɛ'n sufuɛ'm be o sɛ nun, mɛn'n i nunfuɛ'm b'a fɛ, b'a yo koklo, sran dandan nga be o asiɛ'n su'n b'a yo sa kokloo.»

⁵ Sran nga be o asiɛ'n su'n be sacili i yɛlɛ kɛ be tɔnnin mmla'n, be kpɛli ndɛ nga be kan kleli be'n i wun, aenguɛ nga Anannganman nin be trali'n, b'ɔ ti blɛ'n kwlaa nun liɛ'n, b'a fɛ-mɛn i mmla'n su .

⁶ I sɔ'n ti sannzan bɔ be boli asiɛ'n ti ɔ su saci, yɛ i sufuɛ'm be sua bé sa tɛ'n i su afɛ'n. I sɔ'n ti yɛ asiɛ'n su sran'm b'a wu nin-ɔn. Sran nga b'a ka lɛ'n be ti kaan sa.

⁷ Sɛ nzan'n ti sran'n, wuun n ´se kɛ sɛ ɔ'a tɔ nzan lɔflɛ'n i su. Vinyi'n ɔ'a glɔ. Be kwlaa nga be o aklunjuɛ nun laa'n be su fɛfɛ.

⁸ Klɛn bɔ be bo i aklunjuɛ'n ti'n, ɔ'a wie. Bo srolɛ'n i nganniɛn'n, ɔ'a kpɛ. Jru bɔ be bo'n bé wun kpaja be'n, ɔ'a jran.

⁹ Be nɔn-man nzan kun, be to-man jue. Nzan kekle'm b'a yo wiwi nzan nɔnfuɛ'm bé nuan nun.

¹⁰ Klɔ nvuɛn'n ɔ'a saci ɔ'a bubu, sua'm be kwlaa be anuan'n ɔ'a nyin, be wlu-man be nun kun.

¹¹ Be kpankpan klɔ'n nun atin'm be nun sin yɛlɛ kɛ nzan nun-man lɛ kun. Aklunjuɛ'n kwlaa ɔ'a wie weiin. Sran fi wun kpɛjɛ-mɛn i kun mɛn ng'ɔ o yɛ'n nun.

¹² Klɔ'n nun sua nvuɛn ngunmin yɛ b'a ka-a, anuan bubuwa'm b'a saci.

¹³ Asiɛ'n su wa nvle-nvle'm be nun'n, be wun-man like dan kun, Ɔ ti kɛ olivie bɔ be fa waka be ti i mma'm be gua wuun ɔ'a wie'n sa. Ɔ ti kɛ vinyi i mma kunngun ng'ɔ ka i waka'n su bɔ b'a ti ɔ'a wie'n sa.

Sa ng'ɔ ´ju asiɛ'n su'n

¹⁴ Be nga be kali lɛ'n, be to jue be manman Anannganman, i dan'n ti. Kɛ be fin mɛn nga be o wia atɔliɛ lɔ be nun be ´ba'n, be klun b'ɔ ti jɔwa'n ti'n, be bo sro.

¹⁵ Amun `manman Anannganman wia afiliɛ lika'm be nun. Amun `manman Anannganman b'ɔ ti Izraɛl Nyanmiɛn'n lika nga be o jenvie'n i nuan'n be nun.

¹⁶ Be to jue asiɛ'n i awieliɛ lɔ, e ti. Be se kɛ: «Man be manman Nyanmiɛn b'ɔ yo sa i nuan su'n.» Sanngɛ n liɛ'n, n se min wun kɛ: «M'an mlin, m'an mlin, nyrɛnnɛn o n su.» Be nga be tu sran'm bé ja'n, be o be junman'n su. Be tu sran'm bé ja! Be di be junman'n.

¹⁷ Asiɛ'n su sufuɛ mun, srɛ'n ɔ'a kun amun kpo. Kunman wo amun bo, b'a gua tɛ b'a sin b'a yia amun.

¹⁸ Sran ng'ɔ wanndi srɛ b'ɔ kun i ti'n, ɔ ´tɔ buɛ'n nun. Sran ng'ɔ fin kunman'n nun fite b'ɔ nyɛn i ti'n, ɔ ´tɔ tɛ bɔ b'a gua'n nun. Afin nyanmiɛn su lɔ nzue'n, sɛ e ´kwla se'n, e se kɛ b'a tike i anuan. Yɛ asiɛ'n ɔ keje lele ju i bo lɔ.

¹⁹ Asiɛ'n su kpaci, asiɛ'n su tɛtɛ, asiɛ'n su keje.

²⁰ Sɛ asiɛ'n ti sran'n, wuun e ´se kɛ ɔ su bo nvaka kɛ nzanboɛfuɛ sa. Ɔ keje kɛ kuku wie sa. Asiɛ'n sufuɛ'm be sa tɛ'n tin be su kɛ trɔ sa. B'a tɔ yɛ be kwla jaso-man kun.

Famiɛn diwlɛ dandan'm be awieliɛ nin Nyanmiɛn i sielɛ'n i bo bolɛ ndɛ

²¹ I cɛn sɔ nun'n, Anannganman ɔ ´tu nglo lɔ ninnge'm be fɔ nyanmiɛn su lɔ. I cɛn sɔ nun'n, ɔ ´tu asiɛ'n su famiɛn'm be fɔ .

²² Be ´fa be gua kunman dan kun nun, be wla be bisua lika kun nun. Be ´ka lɔ lelele kpɛkuun be ´di be jɔlɛ .

²³ Sɛ anglo'n ti sran'n, wuun e ´se kɛ nyannzuɛn ´kun i. Sɛ wia'n kusu ti sran'n, wuun e ´se kɛ i nyin ɔ ´gua ase. Afin Anannganman bɔ sie mɛn wunmuan'n, ɔ ´sie Zerizalɛm b'ɔ o Siɔn oka'n su'n. Yɛ i nyrun'n ɔ ´yo nyɛnnyɛnnyɛn i anyia nunfuɛ'm be nyrun lɛ.