Ezai 18 - NYANMIƐN NDƐ'N 1998

Ndɛ nga be kan kleli be nga be jran Etiopifuɛ'm bé nuan'n

¹ Etiopi mɛn'n i nzue ba'm bé sin lɔ'n, be ti like wie i ndɛwa'm be tɛlɛ.

² Amun Etiopifuɛ mun, amun sunman amun nuan jranfuɛ mun mɛnmɛn'm be nun. Kɛ sunmanfuɛ sɔ'm be ´kɔ'n, be fu nzue'n nyin su alie bɔ be fa ndɛma be yo'n be nun. Amun bɔ amun ti Etiopifuɛ'm be nuan jranfuɛ'n, amún wun yo mmlɛ o. Sran nga be o yɛ'n, bɔ be ti jajraajra'n, bɔ bé kplo'n ɔ ti mlanmlan'n, nvle nga nunfuɛ bɔ be yo sro lele ju mɛn'n i awieliɛ'n, bɔ be kwla be kpɔfuɛ mun nyrɛnnɛnnɛn'n, bɔ be di-man be mɛn'n nun nzue ba'm be yalɛ'n, amun `sa amun sin bla bé wun wa.

³ Amun nga amun wo mɛn wunmuan nun'n, amun bɔ amun tran asiɛ'n su'n, amun `nian nzɔliɛ nga be kplɛnnin i oka'm be su'n, amun `sie amún su kɛ be ´fita nnɛn wɛ nun'n.

⁴ Afin Anannganman seli min kɛ yoo: «Kɛ n wo min tranwlɛ'n nun lɔ'n, n su keje-man mín wun, n ´nian sa nga be ´ju'n. N ´tran diin kɛ aunyɛyɛ b'ɔ ba wia kpa'n nun bɔ lika'n ɔ jran diin'n sa. N ´tran diin kɛ bɔlɛ ufue munnduun b'ɔ ba ble kpɛlɛ blɛ'n nun aunyɛyɛ nun'n sa.»

⁵ Afin kɛ vinyi'n ɔ'a wie nyrɛ bo'n, kɛ ɔ ko su'n bɔ i mma'n ko tin'n, i sin nan b'a ti vinyi mma sɔ'n, be fa bese be kpɛkpɛ vinyi ja'n i sama nga b'a su-man'n, yɛ be kpɛkpɛ i sama kanngan nga be su mma'n.

⁶ Be ´yaci Asirifuɛ'm be kwlaa anunman dandan nga be o oka'm be su bɔ be di nnɛn'n bé sa nun. Be ´yaci be blo nnɛn'm bé sa nun. Anunman nga be di nnɛn'n, saka'm be ti be ´ba wawa nun, lɛ yɛ be ´ka-a. Blo nnɛn'm be kusu be ´ba ayrɛ blɛ'n nun, be kusu lɛ yɛ be ´tran-an.

⁷ I blɛ sɔ nun'n, nvle nga i nun sran'm be ti jajraajra'n, bɔ bé kplo'n ti mlanmlan'n, bɔ be yo sro kɛ ɔ fin i bo bolɛ nun lele b'ɔ ´fa ju ndɛ'n, bɔ be kwla be kpɔfuɛ mun nyrɛnnɛnnɛn'n, bɔ be di-man be mɛn'n nun nzue ba'm be yalɛ'n, sran sɔ'm be ´fa like be wa cɛ Anannganman. Be ´fa ba Siɔn oka'n su kan Anannganman kleli kɛ ɔ tran lɛ'n.