Ezipt Lɔ Tulɛ'n 37 - NYANMIƐN NDƐ'N 1998

Nyanmiɛn i alaka'n

¹ Bɛzaleɛl fali akasia waka yoli Nyanmiɛn i alaka'n. I tɛnndɛn nun'n ti mɛtri kun nin santimɛtri ablaɔn-nin-nnun, yɛ i tɛtrɛ nun'n nin i nglo-nglo'n be ti santimɛtri ableso-nin-nnun.

² Ɔ kloli sika ɔkwlɛ jrɛiin guɛli i klun nin i sin. Ɔ fali sika ɔkwlɛ cili i nuan su tɛɛn sin yiali nun.

³ Ɔ fali sika ɔkwlɛ yoli like kukluuklu nnan, kpɛkuun ɔ fali like sɔ mun tatali i cɔnjɔ nnan'm bé su, bue kun su wa nnyɔn yɛ bue kun ekun'n su lɔ nnyɔn.

⁴ Ɔ sɛsɛli akasia waka floloflolo nnyɔn, yɛ ɔ kloli sika ɔkwlɛ guali bé wun.

⁵ Kɛ ɔ ´yo nan b'a kwla sua Nyanmiɛn i alaka'n ti, ɔ fali waka floloflolo mun wlali like kukluuklu'm bɔ be fali sika ɔkwlɛ be yoli'n be nun, kun wlɛ i bue kun su, yɛ kun wlɛ i bue kun ekun'n su.

⁶ Ɔ fali sika ɔkwlɛ jrɛiin'n yoli alaka'n i su tre'n. I tɛnndɛn nun'n ti mɛtri kun nin santimɛtri ablaɔn-nin-nnun. I tɛtrɛ nun'n ti santimɛtri ableso-nin-nnun.

⁷ Ɔ yoli anz'm be nzɔliɛ nnyɔn. Sika ɔkwlɛ bɔ be boli'n, yɛ ɔ fa yoli-ɔ, kun wo i su tre'n i bue kun wa, yɛ kun wo i bue kun ekun'n su.

⁸ Anz nnyɔn sɔ'm be nin alaka'n i su tre'n be sa su kunngba i bue nnyɔn'm bé su.

⁹ Anz nnyɔn'm be trɛ be ndɛwa'm be nun kɔ nglo, be fa kata alaka tre'n su. Be nyrun nnyɔn'n wɔ su, yɛ bé nyin kpɛ alaka tre'n su .

Tabli nga be gua su kpaun man Nyanmiɛn'n

¹⁰ Be fali akasia waka be yoli tabli kun. I tɛnndɛn nun'n ti mɛtri kun yɛ i tɛtrɛ nun'n nin i nglo-nglo'n be ti santimɛtri ableso-nin-nnun.

¹¹ Be kloli sika ɔkwlɛ jrɛiin'n be guɛli i wun. Be cili i nuan su nin sika ɔkwlɛ tɛɛn sin yiali nun.

¹² Be yoli kadri'n i bue nnan'm bé su. Kadri sɔ'n i kpikplikpi'n ti santimɛtri mɔcuɛ, yɛ be fali sika ɔkwlɛ cili i nuan su tɛɛn sin yiali nun wie.

¹³ Be fali sika ɔkwlɛ be yoli like kukluuklu nnan, kpɛkuun be fali like sɔ mun tatali i cɔnjɔ nnan'm bé su i ja nnan'm bé wun lɛ.

¹⁴ Like kukluuklu sɔ'm be mantan kadri'n. Be fali waka floloflolo'm be wlali be nun kɛ ɔ ´yo nan b'a kwla sua tabli'n ti.

¹⁵ Be sɛsɛli akasia waka nnyɔn, be kloli sika ɔkwlɛ guali bé wun. Be ´tra be nun sua tabli'n.

¹⁶ Be yoli tabli'n i su asiɛti mun nin klowa mun, nin kpongbo cɛcrɛɛcrɛ mun, ɔ nin tasi mun bɔ be fa gua nzan ase'n. Be kwlaa sɔ'm be ti sika ɔkwlɛ jrɛiin kokoko.

Kannin siewlɛ bɔ i sama'm be ti nso'n

¹⁷ Be fali sika ɔkwlɛ jrɛiin'n be yoli kannin'm be siewlɛ. Be boli sika ɔkwlɛ sɔ'n kɛ be fa bo blalɛ'n sa. Kannin siewlɛ sɔ'n nin o, i ja nin o, i afiɛn flolo nin o, klowa nzɔliɛ'm bɔ be o su mun o, i su like kpɔlɛ kpɔlɛ mun o, waka nyrɛ nzɔliɛ bɔ be o su mun o, be kwlaa be sa su kunngba.

¹⁸ Be yoli i sama nsiɛn i afiɛn flolo'n su. Nsan o i bue kun su, yɛ nsan o i bue kun'n su ekun.

¹⁹ I sama kun su'n, be yoli klowa nzɔliɛ nsan. Be yoli klowa sɔ'm be kɛ amandie mma'n sa. Be yoli like kpɔlɛ kpɔlɛ mun ɔ nin waka nyrɛ nzɔliɛ mun i sama'n su ekun. Kannin siewlɛ'n i sama nsiɛn'm be su ninnge'm be ti wafa kunngba.

²⁰ Kannin siewlɛ'n i afiɛn flolo'n su'n, be yoli klowa nzɔliɛ mun bɔ be ti kɛ amandie mma sa'n sɔ nnan. Klowa kun lɛ i like kpɔlɛ kun nin i waka nyrɛ kun, kun lɛ i like kun nin i waka nyrɛ kun.

²¹ Kan kannin siewlɛ'n i sama nnyɔn'm be bo'n taka likawlɛ afiɛn flolo'n su lɛ'n, be yoli like kpɔlɛ kun lɛ. Be yoli kannin siewlɛ'n i sama nsiɛn'm be bo'n sɔ: nnyɔn be bo lɛ'n, be yo like kpɔlɛ kun, nnyɔn be bo lɛ'n, be yo like kpɔlɛ kun.

²² Kannin siewlɛ'n i su like kpɔlɛ kpɔlɛ mun nin i sama'm be sa su kunngba. Sika ɔkwlɛ jrɛiin'n yɛ be fa yoli kannin siewlɛ'n i wunmuan nin-ɔn. Sika ɔkwlɛ sɔ'n be boli i kɛ be fa bo blalɛ'n sa.

²³ Be yoli kannin siewlɛ'n i kannin nso mun nin i like nga be fa tu nzuɛn'n, ɔ nin i nzuɛn guawlɛ. Be fali sika ɔkwlɛ jrɛiin'n yɛ be fa yoli be-ɔ.

²⁴ Be sunnzunnin sika ɔkwlɛ kilo ablasan yɛ be fa yoli kannin siewlɛ'n nin i wun ninnge mun-ɔn.

Ansans yrawlɛ'n

²⁵ Be yoli ansans yrawlɛ'n nin akasia waka. I bue nnan'm be kwlaa be sɛ. Kun ti santimɛtri ablenun, kun ti santimɛtri ablenun, yɛ i nglo-nglo su'n ti mɛtri kun. Ansans yrawlɛ'n i su like nga be ti kɛ nnɛn wɛ sa'n be nin i sali su kunngba.

²⁶ Be kloli sika ɔkwlɛ jrɛiin be fa guɛli i wunmuan'n su: i ti'n su o, nnɛn wɛ'm bé su o. Be fali sika ɔkwlɛ cili i nuan su tɛɛn sin yiali nun.

²⁷ Be yoli i sa kukluuklu nnan. Sika ɔkwlɛ yɛ be fa yoli-ɔ. Be fali i sa kukluuklu sɔ mun tatali i nuan bui'n i bo ngua lɛ kan. Be yoli nnyɔn bue kun wa, yɛ nnyɔn bue kun lɔ. Be nun yɛ be wla waka floloflolo nga be fa sua mun-ɔn.

²⁸ Be sɛli waka floloflolo nnyɔn sɔ mun ɔ nin akasia waka, yɛ be kloli sika ɔkwlɛ guali bé wun.

²⁹ Ansans yifuɛ kun yoli bé ti su gualɛ ngo'n, yɛ ɔ yoli ansans fanninfannin b'ɔ ti Anannganman liɛ'n bɔ be yrɛ i ansans yrawlɛ'n su'n.