Ezipt Lɔ Tulɛ'n 32 - NYANMIƐN NDƐ'N 1998

IZRAƐLFUƐ MUN B'A SACI AENGUƐ NGA BE NIN NYANMIƐN BE TRALI'N Sika ɔkwlɛ nannin ba'n

¹ Kɛ nvlefuɛ'm be wunnin i kɛ Moiz su cɛ oka'n su lɔ ngboko'n, be ko sin yiali Aarɔn nan b'a se i kɛ: «Jaso, yo amuɛn kun man ye, man ɔ dun mmua e nyrun. Afin Moiz'n, bian sɔ'n b'ɔ fali ye Ezipt lɔ bali'n, e si-man like nga ɔ'a yo i-ɔ.»

² Aarɔn seli be kɛ: «Amun `yiyi sika ɔkwlɛ asunmanndi bɔ be o amún yi mun, nin amun mma yasua, ɔ nin amun mma bla'm bé su'm be nun'n mun, nan amun `fa be blɛ min.»

³ Yɛ nvle'n i nunfuɛ'm be kwlaa be yiyili bé su'm be nun asunmanndi mun nan b'a fa be b'a blɛ Aarɔn.

⁴ Kɛ be fali asunmanndi sɔ'm bɔ be ti sika ɔkwlɛ be mɛnnin i'n, ɔ kloli be yɛ ɔ fa guali like wie nun, nan ɔ'a fa yi sika ɔkwlɛ nannin ba kun. Kpɛkuun nvlefuɛ'm be waan: «Izraɛlfuɛ mun, amun like ng'ɔ fali amun Ezipt lɔ bali'n yɛ!»

⁵ Kɛ Aarɔn wunnin i sɔ'n, ɔ kplannin sraka yiwlɛ kun nannin ba'n i nyrun lɛ, yɛ ɔ kpannin, ɔ seli kɛ: «Ainman e ´di cɛn e ´man Anannganman.»

⁶ Nglɛmun ndɛ kpa'n, kɛ aliɛ cɛnnin'n, be yili tɛ nga be yra be nnɛn'n kɔlikɔli'n nin bo kun yolɛ'n i su tɛ mun. Nvle'n i nunfuɛ'm be trannin ase be dili like be nɔnnin nzan, i sin be jasoli kannin ngowa .

⁷ Blɛ sɔ nun'n, Anannganman seli Moiz kɛ: «Jra nan kɔ, afin ɔ sran nga a fa be fin Ezipt lɔ bali'n, b'a yo sa tɛ dan.

⁸ B'a yaci atin nga n kleli be'n lɛ lalaa, b'a klo sika ɔkwlɛ b'a yo nannin ba kun, b'a koto i bo, b'a yi sraka mun b'a mɛn i, kpɛkuun be seli kɛ: ‹Izraɛlfuɛ mun, amun like ng'ɔ fa amun Ezipt lɔ bali'n yɛ.› »

⁹ Anannganman seli Moiz kɛ: «M'an wun kɛ nvle nga nunfuɛ mun be nyin ti kekle dan.

¹⁰ Siɛn liɛ'n, yaci min nun man n yo sa wie. Min ya'n wa jue bé su kɛ sin sa, yɛ n ´nunnun be mlɔnmlɔn. Sanngɛ ɔ liɛ'n, wɔ osu'n wa trɛ, ɔ ´yo nvle dan kun.»

¹¹ Moiz sun flɛli Anannganman i Nyanmiɛn'n, ɔ seli i kɛ ɔ yaci ya, i waan: «?Anannganman, ɔ sran bɔ ɔ wunmiɛn nin ɔ tinmin bɔ like fi kwla jrɛn-mɛn i nyrun'n i ti yɛ a fali be bali'n, ɔ yo sɛ ti yɛ man ɔ waan ɔ ya'n jue bé su kɛ sin sa nin-ɔn?

¹² Ɔ man Eziptfuɛ'm be wa se kɛ: ‹Izraɛlfuɛ'm be nyrɛnnɛn klelɛ ti yɛ Anannganman fali be e mɛn'n nun wa ɔli-ɔ. Be kunlɛ oka'n su lɔ ti-ɔ, be asiɛ'n su wa nunnunlɛ ti-ɔ.› Gua ɔ ya'n i ase. Nán yo ɔ nvlefuɛ'm be tɛ nga ɔ waan a ´yo be'n kun.

¹³ Man ɔ́ wla kpɛn ɔ sufuɛ Abraam, nin Izaak, nin Zakɔb be su. A tali nda, a seli be kɛ: ‹N wa yo man amun osu'n wa trɛ kɛ nzraama nga be o nglo'n sa. Mɛn nga n seli kɛ n ´fa man amun osufuɛ mun'n, n ´fa man be, yɛ be ´tran nun tititi.› »

¹⁴ Kɛ ɔ yoli sɔ'n, Anannganman yacili nyrɛnnɛn ng'ɔ guguli kɛ ɔ ´fa yi i nvle'n su'n i ndɛ nun.

¹⁵ Moiz fin oka'n su lɔ sɛli i sin, ɔ jrali asiɛ wun wa, yɛbuɛ paplaapla nnyɔn bɔ mmla'n o su'n be o i sa nun. Be klɛli be nyrun nin bé sin.

¹⁶ Yɛbuɛ paplaapla sɔ'm be ti Nyanmiɛn i sa nuan like, yɛ Nyanmiɛn bɔbɔ yɛ ɔ klɛli bé su-ɔ.

¹⁷ Zozie tili nvlefuɛ'm be nɛn b'ɔ tɛ'n, yɛ ɔ seli Moiz kɛ: «Alɛ nganniɛn tɛ ngblaliɛ'n nun lɔ.»

¹⁸ Moiz tɛli i su kɛ: «Nán sran bɔ b'a kwla be kpɔfuɛ'm be kpanlɛ'n yɛ ɔ ´tɛ lɛ-ɔ, kusu nán sran bɔ be kpɔfuɛ'm b'a kwla be'n yɛ be ´kpan lɛ-ɔ. Min liɛ'n, n ti jue tolɛ.»

¹⁹ Kɛ Moiz nin Zozie be mantannin ngblaliɛ'n, Moiz wunnin nannin ba'n nin nvlefuɛ mun bɔ be su si able'n. Ɔ fali ya dan kpa, nan ɔ'a tɛ yɛbuɛ paplaapla'm be ase ɔ'a bubu be nun oka'n i bo lɛ.

²⁰ Ɔ fali nannin ba nga be yoli'n, nan ɔ'a yrɛ i sin'n nun. I osu ng'ɔ kali'n, ɔ nunkunnin i ɔ kacili sanmlɛn. Ɔ fa guali nzue'n nun, yɛ ɔ fa mannin Izraɛlfuɛ'm be kɛ be nɔn, nan b'a nɔn.

²¹ Moiz usali Aarɔn kɛ: «?Nzu yɛ nvlefuɛ nga'm be yoli wɔ bɔ i ti yɛ a fa be a wla sa tɛ dan kɛ nga sa'n nun-ɔn?»

²² Aarɔn tɛli i su kɛ: «Yaci, nán fa ya. Ɔ bɔbɔ a si kɛ sran nga be o yɛ mun, be sa tɛ yolɛ fin'an wa ju'a wa.

²³ Be wa toli min, yɛ be seli min kɛ: ‹Yo ye amuɛn kun man ɔ dun mmua e nyrun. Afin Moiz'n, bian sɔ'n b'ɔ fali ye Ezipt lɔ bali'n, e si-man sa nga ɔ'a ju i su'n.›

²⁴ Yɛ n kusu n seli be kɛ: ‹Sran ng'ɔ lɛ sika ɔkwlɛ'n, ɔ `yi blɛ min.› Yɛ be fa blɛli min-ɔn. N kloli i nan m'an fa yi nannin ba nga.»

Sran akpi nsan be kunlɛ

²⁵ Moiz wunnin i kɛ Aarɔn yacili Izraɛlfuɛ'm be lɛ man be yoli nga be klun klo'n. Kɛ ɔ yoli sɔ'n, be ti-man like fi be kpɔfuɛ'm be nyrun kun.

²⁶ Moiz jrannin ngblaliɛ'n i anuan'n nun yɛ ɔ seli kɛ: «Be kwlaa nga be ti Anannganman liɛ'n, man be bla mín sin!» Yɛ Levi akpasua sufuɛ'm be kwlaa be wa yiɛli wun lɛ-ɔ.

²⁷ Ɔ seli be kɛ: «Anannganman b'ɔ ti Izraɛlfuɛ'm be Nyanmiɛn'n wan yoo: ‹Man sran kun fɛ i tokofi'n sɛn i bo, man sran kun fɛ i liɛ'n sɛn i bo nan amun `wlan-wlan ngblaliɛ'n nun, amun `sinsin ngblaliɛ'n i lika'n kwlaa nun. Amun `kun amun niaan, nin amun janvuɛ, ɔ nin amun osufuɛ mun.› »

²⁸ Levi akpasua sufuɛ'm be niannin nga Moiz seli be kɛ be yo'n su be yoli. I cɛn sɔ nun'n, Izraɛlfuɛ'm be nun sran akpi nsan (3.000) be wuli.

²⁹ Moiz seli Levi akpasua sufuɛ'm be kɛ: «Ndɛkɛn'n, amu'an klɛn amún wun b'a man Anannganman kɛ amun yo i junman difuɛ, afin amu'an kun amun mma mun nin amun niaan mun. I sɔ'n ti ndɛkɛn bɔbɔ'n, man Nyanmiɛn yo amun liɛ ye.»

Moiz kpatali Nyanmiɛn mannin Izraɛlfuɛ mun

³⁰ Kɛ aliɛ cɛnnin'n, Moiz seli nvlefuɛ'm be kɛ: «Amu'an yo sa tɛ dan kpa. N su fu oka'n su lɔ Nyanmiɛn wun lɔ. Wienun-ɔn, sɛ ɔ ´yaci amún sa tɛ'n ´cɛ amun o!»

³¹ Moiz sɛli i sin Anannganman wun lɔ. Ɔ srɛli i kɛ: «Ee! Anannganman, sran sɔ'm be yoli sa tɛ dan kpa. Be yoli sika ɔkwlɛ amuɛn.

³² Yaci bé sa tɛ'n cɛ be. Sɛ w'a yo-man sɔ'n, wuun kpɛ i kpo nunnun min dunman'n ɔ fluwa nga a klɛli'n nun.»

³³ Anannganman tɛli i su kɛ: «Sran ng'ɔ fɔnnin min wun'n yɛ n ´nunnun i dunman min fluwa'n nun-ɔn.

³⁴ Siɛn'n, kɔ, dun mmua Izraɛlfuɛ'm be nyrun, nan fa be kɔ kan n waan a `fa be wɔ lɔ'n. Min anz'n ´dun mmua ɔ nyrun. Min liɛ'n, n wa yi mín wun nglo cɛn kun, yɛ n ´tu be fɔ bé sa tɛ'm be ti.»

³⁵ Anannganman tuli Izraɛlfuɛ'm be fɔ kɛ bɔ be seli Aarɔn kɛ ɔ yo nannin ba'n man be'n ti.