Ezipt Lɔ Tulɛ'n 27 - NYANMIƐN NDƐ'N 1998

Nyanmiɛn sɔwlɛ'n

¹ «Man be fa akasia waka yo min sɔwlɛ'n. Man i bue nnan'm be ngba be sɛ. Man i bue sɔ'm be yo mɛtri nnyɔn nin sin, mɛtri nnyɔn nin sin. Man i nglo-nglo su'n yo mɛtri kun nin sin.

² Man be yo i cɔnjɔ nnan'm bé su like kɛ nnɛn wɛ sa, man like sɔ'm be nin min sɔwlɛ'n be sa su kunngba. Man be klo aaba be guɛ i kwlaa'n su.

³ Man be fa aaba yo min sɔwlɛ'n i wun ninnge nga be o yɛ mun: like nga be fa tu nzuɛn'n, peli mun, kpongbo dandan mun, atiɛ je mun, ɔ nin like nga be gua ansans nun'n.

⁴ Man be wlɛ i cɔnjɔ nnan'm bé su aaba nga kunngun. Man be yo aaba griazi.

⁵ Man be fa griazi sɔ'n wla min sɔwlɛ'n i nuan ciwlɛ'n i bolɛ kan'n su sin yia nun, man ɔ ju min sɔwlɛ'n i afiɛn sɛsɛsɛ.

⁶ Man be sɛ akasia waka floloflolo mun nan be klo aaba gua bé wun.

⁷ Man be fa waka floloflolo sɔ'm be wla sika ɔkwlɛ nga'm be nun. Be `fa kun wla i bue kun su, yɛ be fa kun'n kusu wla i bue kun'n su kɛ ɔ ´yo nan b'a kwla sua min sɔwlɛ'n ti.

⁸ Man be fa waka paplaapla yɛ be yo min sɔwlɛ'n nin-ɔn, yɛ man kunman tran min sɔwlɛ sɔ'n i klun, man be yo i kɛ n fa kleli wɔ oka'n su wa sa.»

Tannin tanmue dandan nga be sin yia awlo klun'n

⁹ «Man min tannin sua nga n yi mín wun nglo nun'n nyan awlo klun. Man tannin tanmue nga be fali lɛn b'ɔ sɔ kpa yɛ be yoli'n be sin yia awlo klun'n. Man awlo klun sɔ'n i bue ng'ɔ kpɛ ngua lɔ'n `yo mɛtri ablenun.

¹⁰ Man awa'n i waka ablaɔn mun nin be takawlɛ ablaɔn'm be yo aaba ngunmin. Man like nga be fa tra tannin'm be ase'n nin nga be fa suan bé bo'n be yo jɛtɛ ufue.

¹¹ Man be yo like kunngba'n i bue ng'ɔ kpɛ nglo lɔ'n su. Man lɔ tannin'm be tɛnndɛn nun'n yo mɛtri ablenun. Man waka ablaɔn mun nin be takawlɛ ablaɔn'n be yo aaba. Like nga be fa tra tannin'm be ase nin nga be fa suan bé bo'n, man be fa jɛtɛ ufue yɛ be fa yo be-ɔ.

¹² Man tannin sua'n i awlo klun'n i tɛtrɛ nun ng'ɔ kpɛ wia atɔliɛ lɔ'n i tannin'm be tɛnndɛn nun'n yo mɛtri ablaɔn-nin-nnun, yɛ man lɔ waka'm be yo blu, man be takawlɛ'm be kusu be yo blu.

¹³ Wia afiliɛ lɔ bue liɛ'n su kan be wlu lɛ'n, man i tɛtrɛ nun'n yo mɛtri ablaɔn-nin-nnun.

¹⁴ Man anuan'n i bue ng'ɔ o fama su'n i tannin tanmue'm be tɛnndɛn nun'n yo mɛtri nso nin sin, man be kplan waka nsan nin be takawlɛ nsan lɛ.

¹⁵ Anuan'n i bue ng'ɔ o bɛ su lɔ'n, man i tannin tanmue'm be tɛnndɛn nun'n yo mɛtri nso nin sin. Man be kplan waka nsan nin be takawlɛ nsan lɛ.

¹⁶ Man be nga be di tannin nun aba'n be sende rido kun awlo'n i anuan'n nun. Rido sɔ'n i tɛnndɛn nun'n `yo mɛtri blu. Lɛn ng'ɔ sɔ kpa'n bɔ i nyanman'n ti kanngan plili'n yɛ be `fa yo-ɔ. Be `fa bua ndrɛ b'ɔ ti ɔkwlɛ srosrowa nin ɔkwlɛ kankankan nin ɔkwlɛ youun be fa flanflan lɛn nun. Be `yo rido nun nzɔliɛ mun. Man i waka'm be yo nnan, yɛ man be takawlɛ'm be yo nnan kusu.

¹⁷ Awa ng'ɔ sin yia awlo klun'n i waka mun'n, be `fa jɛtɛ ufue ninnge nga be fa tra tannin'm be ase'n be `siesie be su. Yɛ be `fa jɛtɛ ufue kpɛngbɛ nga be fa sɔtɔ tannin'm be nun'n be `tata waka'm be su ekun. Man waka'm be takawlɛ'm be yo aaba.

¹⁸ Man awlo klun'n i tɛnndɛn nun'n yo mɛtri ablenun, yɛ man i tɛtrɛ nun'n yo mɛtri ablaɔn-nin-nnun. Man lɛn tannin'n be nglo-nglo su'n yo mɛtri nnyɔn nin sin. Man waka'm be takawlɛ'm be yo aaba.

¹⁹ Min tannin sua'n i nun ninnge nga be fa di i nun junman mun'n, man be fa aaba yɛ be yo be-ɔ. Man be fa aaba yɛ be fa yo tannin sua'n i kpɛngbɛ mun nin awa'n i liɛ mun-ɔn.»

Kannin'n i nun ngo'n

²⁰ «Wɔ, Moiz, kan kle Izraɛlfuɛ'm be kɛ be blɛ wɔ olivie ngo jrɛin kpa kɛ ɔ ´yo nan kannin'm b'a kwla jue nnɔsua kwlaa'n ti.

²¹ Man Aarɔn nin i mma'm be jin like nga be taka kannin'm bé su'n tannin sua'n nun lɔ. Be `jin i rido ng'ɔ kpɛ min alaka'n i nyin'n i nyrun lɛ. Man kannin'm be jue min nyrun lɛ nnɔsua lele nglɛmun. Man i sɔ mmla liɛ'n yo Izraɛlfuɛ nga be o lɛ ndɛkɛn kɛ e ´se yɛ'n nin be nga be wa jaso su'n be kwlakwla be liɛ. Ɔ fata kɛ be osu'n nunfuɛ'm be fa su tititi.»