Ezipt Lɔ Tulɛ'n 26 - NYANMIƐN NDƐ'N 1998

Tannin sua nga Anannganman yi i wun nglo nun'n

¹ «Man tannin wufuɛ'm be yo tannin sua'n nin tannin tanmue blu bɔ lɛn nyanman b'ɔ sɔ kpa'n yɛ be fa yoli'n, ɔ nin tannin ɔkwlɛ srosrowa nin ng'ɔ ti ɔkwlɛ kankankan, ɔ nin nga i nyin ti ɔkwlɛ youun, man be yo anz nga be nian Nyanmiɛn i ninnge'm be su'n be nzɔliɛ tannin tanmue nin tannin'm be su.

² Man tannin tanmue kun i tɛnndɛn nun'n yo mɛtri blu-nin-nnan, yɛ man i tɛtrɛ nun'n yo mɛtri nnan. Man tanmue'm be kwlaa be sɛ.

³ Man be sasa tannin tanmue nnun'm be su, yɛ i nnun kun ekun'n, be sasa be su kusu.

⁴ Man be yo nzasa klikli'n i tanmue kasiɛn'n i nuan su kaa kaa ɔkwlɛ ɔkwlɛ srosrowa. Man be yo nzasa nnyɔn su'n i tanmue klikli'n i nuan su kaa kaa ble ble.

⁵ Man nzasa nnyɔn'n be nuan su'n kaa'm be yo ablenun-ablenun. Man be nuan su kaa sɔ'm be wɔ su nnyɔn-nnyɔn.

⁶ Man be yo sika ɔkwlɛ tianman-tianman sɔ ablenun be blibli be ti'n nin be bo'n, nan be `fa tra nzasa nnyɔn'm be ase, nan be nnyɔn'm be `sa su. I liɛ'n, min tannin sua'n ´yo wunmuan kunngba.

⁷ Man be fa boli ndrɛ be fa wu tannin tanmue wie mun. Man tanmue sɔ'm be yo tɛnndɛn nan b'a ju Nyanmiɛn i tannin sua'n i su katalɛ. Be `yo i sɔ blu-nin-kun.

⁸ Man tanmue kun i tɛnndɛn nun'n yo mɛtri blu-nin-nnun, yɛ man i tɛtrɛ nun'n yo mɛtri nnyɔn. Man tanmue blu-nin-kun sɔ'm be kwlaa be sɛ.

⁹ Man be fa tanmue nnun be sasa su likawlɛ yɛ be `fa nsiɛn kun mun kusu be sasa su likawlɛ. Man be bli tanmue nsiɛn'n su liɛ'n be bla tannin sua'n i nyrun lɛ.

¹⁰ Man be yo nzasa klikli'n i tanmue kasiɛn'n i nuan su kaa kluklu ablenun. Man be yo nzasa nnyɔn su'n i nuan'n su kaa kluklu ablenun wie.

¹¹ Man be bo aaba tianman-tianman sɔ ablenun be `blibli be ti'n nin be bo'n, nan be `fa wla kaa'm be nun, nan tannin sua'n `sa su wunmuan kunngba.

¹² Kɛ bɔ tanmue sɔ'm be tɛnndɛn wa tra tannin sua'n su'n, tannin'n i bue ng'ɔ ko tɔ su'n, ɔ ´bu gua tannin sua'n i sin lɔ.

¹³ I sa su sa su'm bé su'n, i ng'ɔ tra su mɛtri kun'n, man be bu nun, be fɛ i sin be guɛ i tannin sua'n i bue kun wa, yɛ be `fɛ i sin'n kun'n be guɛ i i bue kun ekun'n su lɔ. Kɛ ɔ ko yo sɔ'n, Nyanmiɛn i tannin sua'n i su ´kata kpa.

¹⁴ Man be fa bua nene kplo bɔ b'a kan be ayre ɔkwlɛ'n be kata tannin sua'n su, yɛ man bé fa nnɛn uflɛ i kplo b'ɔ sɔ kpa'n be fa utu su.

¹⁵ Man be sɛ akasia waka paplaapla mun nan be `kplan be fa suan tannin sua'n i bo.

¹⁶ Man waka paplaapla sɔ'm be kwlaa be tɛnndɛn nun'n yo mɛtri nnun, yɛ man be tɛtrɛ nun'n yo santimɛtri ableso nin nnun.

¹⁷ Man waka paplaapla kun i ngua'n nyan ja tianman-tianman nnyɔn. Man i ja nnyɔn'm be nyin wɔ su. Man be yo waka paplaapla'm be kwlaa wafa kunngba.

¹⁸ Man tannin sua'n i bue kun ng'ɔ kpɛ ngua lɔ'n i waka paplaapla liɛ'm be yo ablaɔn.

¹⁹ Man be klo jɛtɛ ufue be fa yo waka paplaapla'm be ja'm be takawlɛ. Man waka paplapa kun nyan ja takawlɛ nnyɔn bɔ i nun yɛ i ja nnyɔn be ´wlu-ɔ.

²⁰ Man tannin sua'n i bue ng'ɔ kpɛ nglo lɔ'n i waka paplaapla'm be yo ablaɔn.

²¹ Man waka paplaapla'm be nyan ja takawlɛ ablanan bɔ be fa jɛtɛ ufue be yoli'n. Kun `nyan nnyɔn, kun `nyan nnyɔn.

²² Man be yo waka paplaapla nsiɛn, ɔ ti tannin sua'n i bue ng'ɔ o i sin lɔ wia atɔliɛ lɔ'n i liɛ.

²³ Man be yo i cɔnjɔ su waka paplaapla liɛ'm be wafa ngunmin, be `yo i sɔ nnyɔn.

²⁴ Kɛ waka paplaapla nnyɔn sɔ'm be fɛ i be ngua lɔ ba'n, man be afiɛn'n ti nun, sanngɛ be nglo-nglo lɔ, man be mantan su. Sika ɔkwlɛ tianman-tianman'n i wun lɛ yɛ be `mantan su-ɔ. Man waka nnyɔn sɔ'm be wafa'n yo kunngba. Be yɛ be wa yo sua'n i cɔnjɔ su waka mun-ɔn.

²⁵ Man tannin sua'n i bue ng'ɔ o i sin lɔ'n, i waka liɛ'm be `yo mɔcuɛ, yɛ man be takawlɛ'm bɔ be fa jɛtɛ ufue yoli'n be yo blu-nin-nsiɛn. Waka kun `nyɛn i takawlɛ nnyɔn, kun `nyɛn i takawlɛ nnyɔn.

²⁶ Man be sɛ akasia waka nnun, nan be fa ja tannin sua'n i bue kun su waka paplaapla'm bé su nan be `tra waka paplaapla'm be nun.

²⁷ Man bue kun'n su lɔ'n akasia waka'n yo nnun ekun, yɛ man wia atɔliɛ lɔ liɛ'n yo nnun ekun.

²⁸ Kɛ ɔ fɛ i tannin sua'n i bue kun su b'ɔ ´fa ju i bue kun'n su lɔ'n, man akasia waka ng'ɔ o afiɛn'n, ɔ kpɛ waka paplaapla'm be afiɛn sɛsɛ.

²⁹ Waka paplaapla nga be kplannin be'n, ɔ nin waka nga be fa jaja nun'n, man be klo sika ɔkwlɛ be gua be wun. Man be bo sika ɔkwlɛ kluklu kɛ nga sa. Be nun yɛ waka nga be fa jaja nun'm be `sin-ɔn.

³⁰ Moiz, kplan tannin sua'n kɛ n fa jajali n kleli wɔ oka'n su wa'n sa.

³¹ Man be yo rido kun, b'ɔ i nun klɛklɛwa'n ´yo ɔkwlɛ srosrowa, nin ɔkwlɛ kankankan, ɔ nin ɔkwlɛ youun. Man be yo i nin lɛn nyanman b'ɔ sɔ kpa. Man be fa jese nyanman be yo anz'm be nzɔliɛ nun.

³² Man be fa akasia be sɛ waka mlomlo nnan nan be klo sika ɔkwlɛ gua bé wun. Be `bobo be nun sika ɔkwlɛ kpɛngbɛ yɛ be `fa rido'n `sende be su. Man be klo jɛtɛ ufue be fa yo waka sɔ'm bé bo takawlɛ.

³³ Man rido'n tran sɔtɔwlɛ sɔtɔwlɛ'm bé bo. Rido sɔ'n i sin lɔ yɛ be ´sie min alaka nga yɛbuɛ paplaapla nnyɔn nga mmla blu'm be klɛ su nin-ɔn. Man rido sɔ'n kpɛ min lika'n nin lika kpa tra su'n be afiɛn.

³⁴ Man be fa min alaka'n i su tre'n be kata su min lika kpa tra su'n nun lɔ.

³⁵ Man be fa tabli'n be sie min lika kpa'n nun wa min tannin sua'n i bue ng'ɔ kpɛ nglo lɔ'n nun. Man be fa kannin'm be takawlɛ like'n be `sie i tabli'n i ndɛnman su sua'n i lika ng'ɔ kpɛ ngua lɔ'n nun.

³⁶ Man be nga be di tannin nun aba'n be `yo rido kun bɔ be fa lɛn nyanman ng'ɔ sɔ kpa'n, ɔ nin bua ndrɛ ɔkwlɛ srosrowa nin ɔkwlɛ kankankan nin ɔkwlɛ youun be yoli'n, be `sie min tannin sua'n i anuan'n nun.

³⁷ Man be fa akasia be sɛ waka mlomlo nnun, nan be `klo sika ɔkwlɛ gua bé wun. Man be bobo bé wun sika ɔkwlɛ kpɛngbɛ nga bé su yɛ be ´sende rido'n. Man be klo aaba be gua waka sɔ'm bé bo nan ɔ `yo bé takawlɛ.»