Ezipt Lɔ Tulɛ'n 13 - NYANMIƐN NDƐ'N 1998

Delɛ-cɛn'n i su mmla wie mun ekun

¹ Anannganman seli Moiz kɛ:

² «Ba klikli mun'n, fa be wla mín sa nun, afin bla kun i wa yasua klikli'n ɔ nin nnɛn kun i wa yasua klikli'n, be ti min liɛ .»

³ Moiz seli nvlefuɛ'm be kɛ: «Man amún wla kpɛn cɛn nga su, afin cɛn sɔ'n nun yɛ Anannganman i tinmin dan bɔ sran fi kwla jrɛn-mɛn i nyrun'n ti ɔ fali amun Ezipt lɔ bali nin-ɔn. Kɛ ɔ ´yo sɔ'n, wuun amun tɛ o kanga'n nun. Kɛ amun ´di cɛn sɔ'n, nán amun di kpaun bɔ kpaun ayre o nun'n.

⁴ Abib anglo'n nun yɛ amun fiteli-ɔ.

⁵ Kɛ Anannganman ko fa amun ko wɔ mɛn bɔ Kanaanfuɛ mun, nin Ɛtfuɛ mun, nin Amɔrfuɛ mun, nin Ferezfuɛ mun, nin Evfuɛ mun, yɛ Zɛbisfuɛ'm be tran nun lɔ'n i nun'n, afuɛ kwlaa nun anglo kunngba nga nun'n, amun `di cɛn sɔ'n. Mɛn sɔ'n yɛ Anannganman kan kleli amun nannan'm be kɛ ɔ ´fa man amun nin-ɔn. Lɔ asiɛ'n ɔ yo like ye kpa. I kunngba'n, ɔ ti nnɛn tawlɛ klanman.

⁶ Amun `di kpaun nga b'a gua-man nun kpaun ayre'n sɔ lele cɛn ba nso, yɛ i le nso'n su'n, amun `di cɛn be fa manman Anannganman.

⁷ Cɛn sɔ'm be nun, nán amun di kpaun bɔ kpaun ayre o nun'n. Nán be wun kpaun bɔ kpaun ayre o nun'n annzɛ kpaun ayre amun awlo'm be nun mɛn wunmuan'n nun.

⁸ Kɛ a nin ɔ wa'n be di cɛn sɔ'n, tu i bo kle i kɛ: ‹Sɛ n yo sa nga mun'n, ɔ fin like nga Nyanmiɛn yo mannin min i nun bɔ n ´tu m bo Ezipt lɔ'n.›

⁹ Cɛn sɔ'n wa yo amún wla kpɛnlɛ like kɛ amún sa'n i su annzɛ amun ngban su nzɔliɛ wie sa. Man ɔ kpɛn amún wla kɛ ɔ fata kɛ amun kan Anannganman i mmla'n i ndɛ. Afin i yɛ ɔ fali i tinmin bɔ be jrɛn i nyrun-ɔn ɔ yo-man ye'n, ɔ fali amun Ezipt lɔ bali.

¹⁰ Afuɛ kwlakwla nun kɛ i blɛ ko ju'n, amun `di cɛn sɔ'n.»

¹¹ Moiz seli ekun kɛ: «Kɛ Anannganman ko fa amun ko wɔ Kanaan mɛn'n nun b'ɔ ko fa ko man amun kɛ ɔ fa boli i kasiɛ kleli amun nannan mun ɔ nin amun bɔbɔ'n sa'n,

¹² amun `fa amún wa yasua klikli'm be mɛn i. Amun nnɛn'm bé wa yasua klikli'm be kusu be ti i liɛ.

¹³ Aflunmun'm be wa yasua klikli'm be liɛ'n, amun `fa bua nga b'a kpɛ cro'n annzɛ boli nga b'a kpɛ cro'n kaci be, annzɛ kusu amun `fa like fin be kɔmin sin `kun be. Amun mma yasua klikli nga be o amun nvle'n nun'n be liɛ'n, amun `kpɔ bé ti.

¹⁴ Sɛ cɛn kun amun mma'm be usa amun kɛ: ‹?Ɔ yo sɛ ti yɛ be yo sa nga-a?› Amun `tɛ bé su kɛ: ‹Anannganman i tinmin bɔ be jrɛn i nyrun-ɔn, ɔ yo-man ye'n ti ɔ fali e Ezipt lɔ bali. Kɛ ɔ ´yo sɔ'n, wuun e o kanga nun.

¹⁵ Ezipt famiɛn'n waan be wu be bla, ɔ su kplin-man su kɛ e wɔ, i ti Anannganman yoli man Ezipt lɔ ba klikli'm be ngba be wuli. Kɛ ɔ fɛ i sran'm bé wa yasua klikli'm be su lele b'ɔ ´fa wlu nnɛn'm be liɛ nun be wuli. Sa nga ti bɔ e fa nnɛn'm bé wa yasua klikli mun e fa man Anannganman i bo yɛ ɔ o lɛ-ɔ, sanngɛ sran'm be liɛ'n, e kpɔ bé wa klikli'm bé ti.›

¹⁶ Tɛ sɔ'n bɔ amun ´yi'n, ɔ ´yo amún wla kpɛnlɛ like kɛ amún sa i su annzɛ amun ngban su nzɔliɛ wie sa. Man ɔ kpɛn amún wla kɛ Anannganman i tinmin bɔ be jrɛn i nyrun-ɔn yo-man ye ti'n, ɔ fali e Ezipt lɔ bali.»

Nyanmiɛn dun mmua Izraɛlfuɛ'm be nyrun

¹⁷ Kɛ Ezipt famiɛn'n yacili Izraɛlfuɛ'm be nun kɛ be wɔ'n, Nyanmiɛn ɔ'a fa-man be ɔ'a sin-man Filistifuɛ'm be mɛn'n i atin'n su, sanngɛ atin sɔ'n yɛ ɔ ti koko-ɔ. Nyanmiɛn seli i klun lɔ kɛ: «Sɛ be ko tɔ alɛ nun nan srɛ kun be'n, be ´sa bé sin Ezipt lɔ.»

¹⁸ I sɔ'n ti yɛ ɔ fali be sinnin atin klɛklɛ wie b'ɔ o aawlɛ flɛnnɛn'n nun lɔ'n su nin-ɔn. Atin sɔ'n kɔ ndɛma jenvie'n su lɔ'n. Kɛ Izraɛlfuɛ'm be ´jaso Ezipt lɔ'n, be siesieli bé wun alɛ kunlɛ'n ti.

¹⁹ Moiz fali Zozɛf i saka'n. Afin Zozɛf seli i niaan'm be kɛ: «Nyanmiɛn wa uka amun sakpa. Amun `ta min nda kɛ amun ´fa min saka'n amun ´kɔ .»

²⁰ Izraɛlfuɛ'm be jasoli Sikɔt lɔ be kɔ kpɛli be ngblaliɛ Etam lɔ aawlɛ flɛnnɛn'n i awieliɛ lɔ.

²¹ Anannganman dun mmua be nyrun, sin wɛnsrɛn wie ja sa tiaan yɛ ɔ fa kle be atin'n wia nun-ɔn. Kɔnguɛ ɔ dun mmua be nyrun, sin taaman wie ja sa tiaan yɛ ɔ kpaja be su-ɔ, i ti Izraɛlfuɛ'm be kwla nantili kɔnguɛ nin wia su.

²² Sin wɛnsrɛn'n b'ɔ ja tiaan wia nun'n nin sin taaman b'ɔ ja tiaan kɔnguɛ'n b'a yaci-man be nyrun mmua dunlɛ le.