Ɛstɛr 6 - NYANMIƐN NDƐ'N 1998

Famiɛn'n yoli man Aman manmannin Mardose

¹ Kɔnguɛ sɔ nun'n, famiɛn'n lafi-ɔ, ɔ yo-man ye. Kpɛkuun i waan be fa wla kpɛnlɛ fluwa'n bɔ yɛlɛ mɛn'n i sielɛ fluwa nga be klɛ sa dandan nga be ju i famiɛn diwlɛ'n nun'n be nun'n be blɛ i. Be fa bali nan b'a kanngan nun b'a kle i.

² Kɛ be ´kanngan be kɔ'n, be ko fiteli Mardose wun ndɛ'n su. Be klɛli i kɛ Bigtan nin Terɛs bɔ be ti famiɛn'n i bla'm bé sua'm be su nianfuɛ'n, be waan be ´kun famiɛn Asieris nan Mardose ɔ'a kan .

³ Yɛ famiɛn'n usali kɛ: «?Kɛ ɔ yoli sɔ'n, be manmannin Mardose wafa sɛ? ?Nguɛ sa su yɛ be mɛnnin i-ɔ?» I junman difuɛ'n be waan: «B'a mɛn-mɛn i like fi.»

⁴ Yɛ famiɛn'n usali kɛ: «?Min afɔtuɛ manfuɛ'm be nun kun wo awlo wa?» Kɛ ɔ ´yo sɔ'n, wuun Aman ɔ'a ba famiɛn'n i awlo nga be dun mmua fite su'n nun lɛ. Ɔ bali kɛ ɔ ´wa se famiɛn'n nan ɔ `fa Mardose mɛn i nan ɔ ko bo i kɔmin waka ng'ɔ yoli man be kplannin'n su.

⁵ Famiɛn i sran'm be waan: «Aman yɛ ɔ o awlo lɛ-ɔ.» Yɛ famiɛn'n waan: «Be `se i kɛ ɔ wlu wa.»

⁶ Aman wluli kan famiɛn'n wo lɔ'n. Famiɛn'n usɛli i kɛ: «?Sɛ famiɛn waan ɔ ´manman sran kun'n, nguɛ yɛ ɔ fata kɛ ɔ yo mɛn i-ɔ?» Aman seli i klun lɔ kɛ: «Nga, n si kɛ min cɛ yɛ famiɛn'n kan min manmanlɛ ndɛ lɛ-ɔ, nán sran uflɛ-ɔ.»

⁷ Yɛ Aman tɛli i su kɛ: «Sɛ famiɛn'n waan ɔ ´manman sran kun'n,

⁸ man be fa famiɛn'n i tralɛ ng'ɔ wla'n kun nin nnɛn kpanngɔ nga i bɔbɔ fu su'n blɛ sran sɔ'n. Man be fa famiɛn kle'n be wlɛ i nnɛn'n i ti.

⁹ Man be fa tralɛ'n nin nnɛn kpanngɔ'n be wla famiɛn'n i mantanfuɛ dan'n kun sa nun, nan ɔ fa tralɛ'n wla sran nga famiɛn waan ɔ ´mɛnmɛn i'n, nan man sran sɔ'n nga famiɛn'n waan ɔ mɛnmɛn i'n fu nnɛn kpanngɔ'n su. Man sran kun dun mmua i nyrun nan ɔ kpan kɛ: ‹Sɛ famiɛn'n waan ɔ ´manman sran'n, kɛ ɔ yo i sa.› »

¹⁰ Yɛ famiɛn'n seli Aman kɛ: «Kɔ ndɛndɛ ko fa tralɛ nin nnɛn kpanngɔ nga a kɛnnin i ndɛ'n nan yo nga a kannin'n man Zuif bian bɔ be flɛ i kɛ Mardose'n, b'ɔ ti famiɛn'n i awlo'n i anuan'n nun lɛ'n. Yo i kɛ a kannin'n sa cɛ, nán kpa wie fi su.»

¹¹ Yɛ Aman fali tralɛ'n nin nnɛn kpanngɔ nin-ɔn. Ɔ fali tralɛ'n wlali Mardose, ɔ fɛ i wlannin klɔ'n nun, ɔ dun mmua i nyrun yɛ ɔ kpan-an: «Sɛ famiɛn waan ɔ ´manman sran'n, kɛ ɔ yo i sa.»

¹² Kɛ ɔ yoli sɔ'n, Mardose sɛli i sin ko trannin famiɛn'n i awlo'n i anuan'n nun lɔ. Aman kusu ɔli i awlo ndɛndɛ kpa ɔ nin i nyrun nyannzuɛn'n. Kɛ Aman ´kɔ'n, ɔ fali tannin kɛtɛli i ti.

¹³ Aman kannin sa ng'ɔ juli'n kleli i yi Zeres nin i bɔbɔ i janvuɛ'm be kwlaa. I afɔtuɛ manfuɛ sɔ mun nin i yi Zeres be seli i kɛ: «Kɛ Mardose bɔ i ti ɔ́ nyin ɔ'a gua ase yɛ'n ti Zuif'n ti'n, a su kwlɛ-mɛn le. San tɔlɛ yɛ a ´tɔ i nyrun sa titi-ɔ.»

¹⁴ Bé nuan'n tɛ o ndɛ'n su, kpɛkuun famiɛn'n i sran mun yɛ b'a ba yɛ, yɛ ndɛndɛ yɛ be fa Aman ɔli Ɛstɛr i cɛn dilɛ'n bo-ɔ.