Efɛzfuɛ Mun 6 - NYANMIƐN NDƐ'N 1998

Ba nin i si nin i nin

¹ Ba kanngan mun, man amún nyin yi amún si nin amun nin e Min'n liɛ bɔ an ti'n ti, afin i sɔ'n ti kpa.

² Be klɛli mmla nun kɛ: «Bu ɔ́ si nin ɔ nin be sran,» mmla bɔ Nyanmiɛn fa mannin sran mun b'ɔ uka su kɛ sɛ be yo-ɔ ɔ ´yo be ye'n, ɔ ti be nun klikli. Ye sɔ'n yɛlɛ kɛ:

³ «Ɔ wun jɔ wɔ fɔuun, a ´cɛ .»

⁴ Nja mun, amun kusu, nán an yo sa b'ɔ kun amun mma'm be ya, sanngɛ an `ta be kpa e Min'n liɛ'n su, yɛ an `tu be fɔ, an `kle be ngwlɛlɛ.

Kanga nin i min

⁵ Kanga mun, man amún nyin yi amun min mun, an `bu be sran, an `mian amún nyin kɛ like nga amun ´yo'n ɔ jɔ be klun, amun yo i kɛ Krist yɛ an su yo mɛn i sa-a, nán an bu i sin.

⁶ Nán kɛ kɛ be o lɛ'n i ngunmin yɛ an yo i sɔ nan be klun jɔ amun wun-ɔn, sanngɛ kɛ an ti Krist i kanga'n ti'n, an `tu amun klun yo sa ng'ɔ ti Nyanmiɛn klun su'n.

⁷ Man amun klun jɔ sulɛ nga an fa su be'n su kɛ e Min'n yɛ an su su i sa, nán an bu i kɛ sran yɛ an su yo mɛn i-ɔ.

⁸ Afin an si kɛ like kpa kwlaa nga sran kun yo'n, sɛ kanga o, sɛ diewa o, like ng'ɔ yo'n, ɔ ´nyɛn i nuan like e Min'n sa nun.

⁹ Amun bɔ an lɛ kanga'n, amun kusu, akunndan kunngba nga amun kanga'm be bu i amun wun'n, an `bu bé wun wie. Nán an kpankpan bé su, afin an si kɛ amun kwlaa amun Min'n ti kun, ɔ o nyanmiɛn su lɔ, i liɛ'n ɔ kpa-man sran nun .

Kristfuɛ'm be alɛ ninnge

¹⁰ Min ndɛ'n i atabo'n yɛ: Man e Min'n tin amun sran wunmuan bɔ amun nin i amu'an kaci nin i kwlalɛ b'ɔ lɛ-man wunsu'n ti.

¹¹ Kɛ ɔ ko yo nan amu'an kwla jran mmusu'm bé si Satan b'ɔ kpɛ amun gblɛ'n i nyrun'n ti'n, an `fa Nyanmiɛn i alɛ ninnge'n kwlaa wla amun wun.

¹² Afin nán e nin klɔ sran yɛ e kun-ɔn, sanngɛ e nin mmusu mun, nin aosin tuun nga e o nun yɛ'n i min'n i kpɛnngbɛn mun, yɛ mmusu tɛtɛ bɔ be o nglo lɔ'n yɛ e kun-ɔn.

¹³ I sɔ'n ti'n, an `fa Nyanmiɛn i alɛ ninnge'n kwlaa nan sɛ lika'n yo tɛ'n amu'an kwla kpli amún ti, yɛ kɛ an kwla be kwlaa'n, amun ´jran kekle.

¹⁴ Ɔ man an `tanndan amun wun an `jran kekle. An `fa nanwlɛ'n yo kɛ kplo sa, an `fa ci amún bo. An `yo sa ng'ɔ ti i nuan su'n, man ɔ yo kɛ like kokloko bɔ an ´fa kata amun wue'n su'n sa.

¹⁵ Man amun anwlɛn bɔ an tra kan jasin fɛ'n yo kɛ amun ngbabua sa.

¹⁶ Sa kwlaa ng'ɔ tɔ amun su'n, man Krist su bɔ an lafi'n ɔ yo kɛ amun nyrɛn sa nan Klunwifuɛ'n i ta'n b'ɔ sɔ i nuan to'n, i kwlaa'n wie su.

¹⁷ Man delɛ bɔ Nyanmiɛn de amun'n ɔ yo kɛ kpongbo kle sa, an `fa wla amún ti. An `fa Nyanmiɛn ndɛ'n b'ɔ ti kɛ i Wawɛ'n i tokofi'n sa b'ɔ fa mannin amun'n .

¹⁸ Kɛ an ko yo i kwlaa sɔ'n, an `srɛ Nyanmiɛn kɛ ɔ jran amún sin. Sa'n kwlaa nun'n, amun nin Nyanmiɛn koko yalɛ i Wawɛ'n i fanngan nun tititi. An `niɛn i sɔ'n su yo i titi, nán an kpɔnzɔ. An `srɛ Nyanmiɛn kɛ ɔ niɛn i sran'm be kwlaa bé su.

¹⁹ Yɛ an `srɛ i ekun kɛ kɛ n uke min nuan'n, ɔ kle min ndɛ nga n kan-an ɔ ti su'n yɛ n yi jasin fɛ'n b'ɔ fiɛli i sran'm be nyrun'n i nglo kle be weiin yakpa su,

²⁰ afin jasin fɛ sɔ'n ti yɛ n ti Nyanmiɛn i ja nun jranfuɛ bɔ be ci min nin jrɔkɔ nga-a. I sɔ'n ti'n, an `srɛ Nyanmiɛn kɛ ɔ man n `kan ndɛ sɔ'n yasua su kɛ n kan-an ɔ ti su'n sa.

Pɔl i nuan yralɛ

²¹ E niaan Tisik b'ɔ nian e Min'n i junman'n nun kpa di'n ɔ wa kan mín wun wa ndɛ kle amun nan an si sa nga n wo nun'n.

²² N sunmɛnnin i amun wun lɔ nan an si sa ng'ɔ o e su'n yɛ ɔ ´gua amun anwlɛn su nzue.

²³ Man e Si Nyanmiɛn nin e Min Jésus-Krist man e niaan'm be kwlaa bé wun jɔ be fɔuun, yɛ be `klo sran, yɛ ɔ `yo man be lafi Krist su.

²⁴ Yɛ e Si Nyanmiɛn man be kwlaa nga be klo e Min Jésus-Krist lele guɛ i ti nin i bo'n be nyan ye!