Daniɛl 8 - NYANMIƐN NDƐ'N 1998

Daniɛl i aolia nun like wunlɛ i nnyɔn su'n: Bua nene'n nin Boli kpakpuɛ'n

¹ «Kɛ famiɛn Bɛlsazar trannin bia'n su, i afuɛ nsan su'n, min bɔbɔ min Daniɛl, n wunnin aolia nun like uflɛ. Kɛ n wunnin klikli liɛ'n, i sin yɛ n wa wunnin ng'ɔ o yɛ'n ekun-ɔn.

² Kɛ n ´cɛn laliɛ'n, n ´wun i-ɔ, n wo Sizi b'ɔ ti Elam akpasua'n i famiɛn klɔ'n su, n wo nzue nga be flɛ i Ilai'n i nuan lɛ.

³ M ´man mín nyin'n su n ´nian-an, bua nene kun yɛ ɔ jin nzue ba i nuan yɛ. I wɛ'm be ti nnyɔn. I wɛ sɔ'm be ti fleiinfleiin kpa, sanngɛ kun ti tɛnndɛn tra kun. Tɛnndɛn kpafuɛ sɔ'n, ɔ fili kasiɛn.

⁴ Kɛ n ´nian'n, n wunnin kɛ bua nene'n ɔ toto i wɛ'n wia atɔliɛ bue liɛ'n su lɔ nin nglo lɔ, nin ngua lɔ. Nnɛn uflɛ fi kwla jrɛn-mɛn i nyrun. Be kwla de-man sran fi i sa nun. Like kwlaa ng'ɔ klo kɛ ɔ ´yo'n yɛ ɔ yo-ɔ. Kpɛkuun ɔ yo dan kɔ i nyrun.

⁵ Blɛ bɔ m ´bu nga n wunnin i'n i akunndan'n, n ´nian-an boli kpakpuɛ kun fin wia atɔliɛ lɔ su ba. Ɔ sin asiɛ'n i lika'n kwlaa. Wanndilɛ ng'ɔ wanndi'n, ɔ ti-man blɛblɛ. I ti ɔ kan-man asiɛ'n mlɔnmlɔn. Boli kpakpuɛ sɔ'n i wɛ'n ti abonuan, ɔ o i nyinma'm be afiɛn.

⁶ Ɔ juli bua nene b'ɔ lɛ wɛ nnyɔn bɔ n wunnin i nzue ba'n i nyrun lɛ'n i wun lɔ. Ɔ fɛli i wunmiɛn'n kwlaa bɛli i su.

⁷ N ´wun i-ɔ, ɔ'a si bua nene'n ɔ jin i su ɔ su bo i, ɔ bubuli i wɛ nnyɔn mun. Ɔ suli bua nene'n yili i ase. Bua nene sɔ'n kwla jrɛn-mɛn i nyrun mlɔnmlɔn. Ɔ tiɛtiɛli i su. Sran fi ɔ'a kwla de-mɛn i i sa nun.

⁸ Boli kpakpuɛ'n ɔ nyannin wunmiɛn dan kpa. Sanngɛ kɛ ɔ nyannin fanngan juli i juwlɛ'n, kpɛkuun i wɛ dan'n buli. I wɛ nnan uflɛ be fifili klikli'n i osu'n nun. I wɛ sɔ'm be ti sroesroe, bé nyin kpɛ mɛn i bue nnan'm be su.

⁹ I wɛ kaan kpa kun fifili laa liɛ sɔ'm be nun kun nun, ɔ trɛ ɔli ngua bue liɛ'n su lɔ nin wia afiliɛ bue'n su lɔ, ɔ nin mɛn klanman kpa'n i bue liɛ'n su lɔ.

¹⁰ Ɔ ti nyanman lele toli nyanmiɛn su lɔfuɛ'm be lɔ, ɔ yili be nun kpanngban be ase. Ɔ yili nzraama wie'm be ase. Ɔ tiatiali lɔfuɛ ɔ nin nzraama sɔ'm be su .

¹¹ Ɔ ti nyanman lele toli nyanmiɛn su lɔfuɛ'm bé su kpɛn'n i lɔ. Ɔ man be yacili tɛ nga be yi man kpɛn sɔ'n cɛn kwlakwla'n i yilɛ, nan ɔ'a yo kpɛn'n i tranwlɛ'n i fiɛn.

¹² Nyanmiɛn su lɔfuɛ'm be trɛnnin i tinmin'n i bo. Tɛ nga be yi i cɛn kwlakwla'n, ɔ yoli i yilɛ'n i su kpɛn. Ɔ sacili Nyanmiɛn i sulɛ kpa'n. Like ng'ɔ yoli'n i kwlaa yoli kpa mɛnnin i.

¹³ N tili anz kun nɛn. Kpɛkuun anz uflɛ kun usɛli i kɛ: ‹?Aolia nun ninnge nga'm be ´di blɛ nnyɛ? ?Sraka nga be nunnunnin su'n nin sa tɛ b'ɔ saci like'n, nin Nyanmiɛn tranwlɛ, ɔ nin nyanmiɛn su lɔfuɛ mun bɔ be tiatiali be su'n, be ´yo sɔ lele cɛn onin?›

¹⁴ Anz klikli'n tɛli su kɛ: ‹Ɔ fata kɛ nglɛmun nin nnɔsua, nglɛmun nin nnɔsua sɔ lele akpi nnyɔn ya nsan (2.300) be sin kwlaa nan Nyanmiɛn i tranwlɛ'n ɔ'a yo saun ekun.› »

Aolia nun ninnge nnyɔn su'n i bo tulɛ

¹⁵ «Blɛ bɔ m bɔbɔ min Daniɛl n ´nian aolia nun ninnge sɔ'n, bɔ n kunndɛ kɛ n ´si i bo'n, n ´wun i-ɔ like kun ti kɛ sran sa ɔ wa jrannin min nyrun lɛ.

¹⁶ Kpɛkuun n tili sran kun nɛn, i nɛn sɔ'n ɔ fin Ilai'n nzue'n nun lɔ, ɔ seli kɛ: ‹Gabriɛl, tu aolia nun ninnge nga bian'n wunnin i'n i bo kle i.›

¹⁷ Gabriɛl bali lika nga n wo nun'n i wun koko lɛ. Kɛ ɔ mantannin min'n, srɛ dan kpa kunnin min, yɛ n utuli mín nyin ase-ɔ. Ɔ seli min kɛ: ‹Wɔ, klɔ sran, si kɛ like nga a wunnin i lɛ'n, ɔ ti mɛn'n i awieliɛ'n i wun ndɛ.›

¹⁸ Kɛ ɔ ´ijɔ kle min'n, wuun mín nyin tɛ utu ase, mín nyrun bluli. Ɔ fɛ i sa kannin min, kpɛkuun ɔ yoli man n jasoli.

¹⁹ I sin ɔ seli min kɛ: ‹B'a sie blɛ kun bɔ Nyanmiɛn i ya'n ɔ wa jɔ, bɔ mɛn'n ɔ wa wie-ɔ. I sɔ blɛ'n i nun'n, sa nga be wa ju'n mun yɛ n wa tike be su n ´kle wɔ lɛ-ɔ.

²⁰ Bua nene b'ɔ lɛ wɛ nnyɔn bɔ a wunnin i'n, ɔ ti Medi nin Pɛrs be famiɛn'm be nzɔliɛ.

²¹ Boli kpakpuɛ'n ɔ ti Grɛk famiɛn diwlɛ'n i nzɔliɛ, i wɛ tɛnndɛn ng'ɔ jin i nyinma nnyɔn'm be afiɛn'n, ɔ ti famiɛn diwlɛ sɔ'n i famiɛn klikli'n i nzɔliɛ.

²² Kɛ i wɛ sɔ'n buli'n, wɛ nnan uflɛ be fifili i osu'n nun, wɛ nnan sɔ'm be ti famiɛn diwlɛ nnan'm be nzɔliɛ, be wa sin klikli liɛ'n i osu'n nun. Sanngɛ be tinmin'n su ju-man kɛ i liɛ'n sa.

²³ Kɛ famiɛn diwlɛ sɔ'n be ko sin ko wie, bɔ sran'm be sa tɛ yolɛ'n ɔ'a yo dan ɔ'a tratra su'n, famiɛn tutrefuɛ kun b'ɔ ti gblɛ kpɛfuɛ dan kpa'n ɔ wa ba.

²⁴ I tinmin'n wa yo dan kpa, sanngɛ nán kɛ tinmin sɔ'n fin i bɔbɔ ti-ɔ. Ɔ wa saci ninnge mun kpa, like kwlaa ng'ɔ wa yo'n, ɔ ´yo ye i sa nun. Ɔ ´nunnun sran nga be ti tinwa mun nin Nyanmiɛn i nvle'n nunfuɛ mun bɔbɔ .

²⁵ Gblɛ b'ɔ si i kpɛ dan'n ti'n, ɔ ´laka sran mun. I wun tulɛ'n ti'n, ɔ ´nunnun sran kpanngban bɔ be bu i kɛ be su di alaje'n. Yɛ ɔ wa jaso famiɛn'm be Famiɛn'n i wun. Sanngɛ ɔ wa tɔ, sran sa su kɛn-mɛn i nan ɔ'a tɔ .

²⁶ Aolia nun sraka nga be yi i nnɔsua nin nglɛmun nga a wunnin be'n, be ti nanwlɛ. Sanngɛ ɔ liɛ'n, man ninnge sɔ nga a wunnin be lɛ'n be ka ɔ klun lɔ, afin ɔ ti blɛ ng'ɔ ba mmua-mmua lɔ'n i nun ndɛ mun.›

²⁷ Kɛ ɔ yoli sɔ'n, min Daniɛl, min wunnɛn'n lololi min sa kplɛkɛɛ, yɛ n tɔli tukpacɛ, n dili cɛn kaka. I sin n jasoli nan m'an di famiɛn i junman mun. Srɛ dan kpa kunnin min like nga n wunnin be bɔ n si-man bé bo'n ti.»