Daniɛl 12 - NYANMIƐN NDƐ'N 1998

Awlaboɛ blɛ'n nin nguan nyanlɛ blɛ'n

¹ «I blɛ sɔ nun'n, Mikaɛl b'ɔ ti anz'm be su kpɛn'n, b'ɔ sasa ɔ nvle nunfuɛ mun'n, ɔ ´ba. Blɛ sɔ'n wa yo awlaboɛ blɛ. I sɔ awlaboɛ liɛ'n, kɛ ɔ fin cɛn bɔ mɛn'n wo lɛ lele b'ɔ ´fa ju ndɛ yɛ'n, be nian wun-mɛn i sɔ le. Blɛ sɔ nun'n, ɔ nvle nunfuɛ bɔ be klɛli be dunman nguan fluwa'n nun'n be ´fite nun .

² Sran kpanngban bɔ be o ndia nun'n be ´jaso. Wie'm be ´nyan anannganman nguan, wie'm be kusu be ´wun nyannzuɛn b'ɔ lɛ-man awieliɛ'n.

³ Sran ngwlɛlɛfuɛ'm be ´yo nyɛnmɛn kɛ nyanmiɛn su lɔ'n fa yo klanman'n sa. Be nga be kle sran'm bé Nyanmiɛn i atin'n, be ´kpaja kɛ nzraama'm be sa tititi.

⁴ Wɔ Daniɛl, fa ndɛ nga sie ɔ klun, nán yi fluwa nga i nun ndɛ'n i nglo kle sran fi ka nan awieliɛ blɛ'n ɔ'a ju. Blɛ sɔ nun'n, sran kpanngban kpa be ´kanngan nun, yɛ be silɛ'n ɔ ´uka su .»

Awieliɛ cɛn'n ti nvialiɛ nun like

⁵ «Blɛ bɔ n ´nian aolia nun like sɔ'n, sran uflɛ nnyɔn be fiteli. Kun jin nzue'n i bue kun wa, yɛ kun jin i bue kun lɔ.

⁶ Kun kannin ndɛ kleli bian nga bɔ lɛn tannin tralɛ wo i wun'n b'ɔ o nzue'n su'n. Ɔ usɛli i kɛ: ‹?Blɛ onin yɛ abonuan ninnge nga'm be wie-ɔ?›

⁷ Sran nga bɔ lɛn tannin tralɛ wlɛ i wun'n mɛnnin i sa nnyɔn'm bé su nglo, yɛ n tili ndɛ ng'ɔ kannin'n. I waan: ‹N kan Nyanmiɛn bɔ i nyin o su titi'n, sa sɔ'm be ´di afuɛ nsan nin sin. Kɛ sa sɔ'm be ´wie'n, wuun Nyanmiɛn i nvle nunfuɛ'm be wunmiɛn'n ɔ'a wie mlɔnmlɔn .›

⁸ M bɔbɔ min Daniɛl, n tili ndɛ sɔ mun, sanngɛ m'an wun-man be wlɛ. I sɔ ti nan m'an usɛ i kɛ: ‹?Nannan, sa sɔ'n i bo wa gua sɛ?›

⁹ Ɔ tɛli min su kɛ: ‹Daniɛl kɔ, nán ɔ klun titi wɔ, afin ndɛ sɔ'm be ´yo fiawa lele san awieliɛ blɛ'n ɔ ´ju.

¹⁰ Afɛ'n ti, sran kpanngban kpa be wa yo saun, be ´yo weiin, yɛ be ´yo jrɛiin. Sran tɛtɛ bɔ be wun-man sa wlɛ'n, be ´yo sa tɛ'n be ´kɔ be nyrun, sanngɛ ngwlɛlɛfuɛ'm be ´wun sa ng'ɔ su ju'n i wlɛ.

¹¹ Kɛ ɔ ´fɛ i cɛn bɔ be ´tannin sraka nga be yi be man Nyanmiɛn cɛn kwlakwla'n i atin'n, bɔ be ´fa tete like'n be ´sie i Nyanmiɛn sɔwlɛ'n su'n, cɛn ba akpi kun cɛn ba ya nnyɔn cɛn ba ablangwlan (1.290) ɔ ´sin .

¹² Be nga be jran kekle nan be minndɛ cɛn akpi kun cɛn ya nsan cɛn ablasan-nin-nnun'n (1.335) be liɛ su ti ye.

¹³ Yɛ wɔ Daniɛl, ɔ liɛ'n, tra wɔ anwlɛn lele fa ju awieliɛ lɔ. A wa de wunmiɛn. I sin a wa jaso ko fa wɔ akatua'n mɛn'n i awieliɛ lɔ .› »