Bo Bolɛ 44 - NYANMIƐN NDƐ'N 1998

Zozɛf i niaan be sa nianlɛ i kpɛ nnyɔn su

¹ Zozɛf seli i awlo'n i su nianfuɛ'n kɛ: «Gua minniɛn sɔ'm be bajɛ'm be nun aliɛ nga be sua-a ɔ yo ye'n, sanngɛ gua nun pɛ kpɛkuun fa be sika'n sie i bajɛ'm be nun.

² Fa min sika klowa'n fa wlɛ i gbanflɛn kan'n i bajɛ liɛ'n nun nan fɛ i ble sika'n nannan su.» Bian'n niannin ndɛ nga Zozɛf kannin'n su yoli.

³ Be lali, kɛ i aliɛ cɛnnin cɛ'n, yɛ be mannin be atin yɛ be nin be aflunmun mun be ɔli-ɔ.

⁴ Kɛ be fin klɔ'n nun fiteli'n, be nian ju-man mmua bɔbɔ, kpɛkuun Zozɛf seli i awlo'n su nianfuɛ'n kɛ: «Jaso su minniɛn sɔ'm be su ko to be, nan usa be kɛ: ‹?Nguɛ ti yɛ an fa tɛ be tua kpa'n kalɛ nin-ɔn?

⁵ ?Klowa nga i nun yɛ min min'n nɔn'n, bɔ i kunngba'n yɛ ɔ fa yi wunnzue'n, kpɛkuun i yɛ an wunnin i be fali-ɔ? ?Sa kpa yɛ amun yoli i lɛ-ɔ? Nga an yoli i lɛ'n, amu'an yo-mɛn i kpa mlɔnmlɔn.› »

⁶ Kɛ bian'n ko toli be'n, yɛ ɔ kɛn i sɔ kle be-ɔ.

⁷ Nan b'a tɛ i su kɛ: «?Aa, baba, ɔ yo sɛ ti yɛ a kan e ndɛ sa-a? E ti-man sa kɛ nga sa i yofuɛ mlɔnmlɔn.

⁸ ?Sɛ e ko wua sika annzɛ sika ɔkwlɛ ɔ min'n i awlo lɔ'n, wuun le kun wie sika nga e wunnin i e trɔ'n be nun'n Kanaan mɛn'n nun lɔ'n, wuun e ´fa blɛ wɔ?

⁹ Sran kwlaa nga be wun klowa'n i trɔ'n nun'n, man be kun i, nan e kusu e ´kaci e min'n i kanga.»

¹⁰ Bian'n waan: «Yoo, n tili, e ´yo i kɛ nga an kɛn i lɛ'n sa. Sran nga n wun klowa'n i trɔ'n nun'n, ɔ ´yo min kanga. Amun nga mun e nin amun lɛ-man ndɛ.»

¹¹ Yɛ ndɛndɛ yɛ be ´sike bajɛ mun yɛ be ´nyannji bé ti-ɔ.

¹² Bian'n boli be trɔ'n be nian-nianlɛ bo be kpɛnngbɛn'm be su yɛ ɔ kɔ-ɔ. Ɔ ´ju Bɛnzamɛn b'ɔ ti be sinma kaanfuɛ'n i bajɛ liɛ'n su-ɔ, klowa'n yɛ.

¹³ Yɛ be ´titi bé wun tralɛ'n be nun yɛ be ´cici be trɔ mun be ´sa be sin klɔ'n nun lɔ-ɔ.

Zida i Bɛnzamɛn ti kplilɛ

¹⁴ Kɛ Zida nin i niaan'm be ´ju Zozɛf i awlo lɔ'n, wuun ɔ tɛ o lɛ. Yɛ be bubu guali asiɛ wun gblo i nyrun lɛ-ɔ.

¹⁵ Zozɛf usali be kɛ: «?Nguɛ sa yɛ an yoli i sɔ-ɔ? ?An si-man kɛ kɛ n wo yɛ'n, sa ng'ɔ wa ju'n n kwla si i?»

¹⁶ Zida waan: «?Nannan, e ´kan sɛ yɛ e ´kle wɔ-ɔ? ?E ´ijɔ e se sɛ? ?E ´kan sɛ nan w'a wun kɛ y'a yo-man sa? Afin Nyanmiɛn bɔbɔ yɛ ɔ yili é sa tɛ'n i nglo-ɔ. Ɔ man e nin sran nga be wunnin klowa'n i trɔ'n nun'n, e kwlakwla e ti ɔ kanga e yɛ e o yɛ.»

¹⁷ Zozɛf waan: «Nyanmiɛn dunman nun ti, n yo sɔ-ɔ ɔ yo-man ye. Sran nga be wunnin klowa'n i sa nun'n, i kunngba yɛ ɔ ti min kanga-a. Amun nga mun an `wɔ amún si sin blɛlɛlɛ.»

¹⁸ Yɛ Zida wunngeli i wun lɔ nan ɔ'a se i kɛ: «Nannan, n tu wɔ kpli, kaflɛ, n su wa kan ndɛ, nán ɔ lo wɔ ngasi. Afin a ti kɛ Ezipt famiɛn'n sa yɛ a o lɛ-ɔ.

¹⁹ Nannan, a usali ye kɛ: ‹?Amún si o lɛ? ?An lɛ niaan uflɛ lɔ?›

²⁰ E tɛli wɔ su kɛ: ‹E si'n ɔ'a yo oke. E lɛ e sinma kun, ɔ ti é si i kpɛnngbɛn nun ba. I niaan'n wuli, ɔ man i nin i mma'm be nun i kunngba yɛ ɔ'a ka-a. I si kusu klo i kpa.›

²¹ Kpɛkuun a seli ye kɛ: ‹An `fɛ i be bla man min nyinma guɛ i wun.›

²² E seli wɔ kɛ: ‹Ba'n ɔ jaso i si wun lɔ-ɔ ɔ yo-man ye, sɛ ɔ yo sɔ'n, i si'n ɔ ´wu.›

²³ Ɔ kusu a waan: ‹Sɛ amun nin amun sinma'n b'a ba-man'n, nán n wun amun wa kun.›

²⁴ E ko toli é si lɔ, e waan famiɛn'n i ndɛ bɔ ɔ'a kan yɛ.

²⁵ Kɛ é si'n seli e kɛ: ‹An `wɔ be `ko to aliɛ kan be bla'n›

²⁶ e tɛli i su kɛ: ‹E lɛ-man atin bɔ e kɔ-ɔ. Sɛ a wun kɛ e ´kɔ'n, wuun e sinma'n nin ye yɛ e kɔ-ɔ. Afin bian'n waan sɛ nán e nin e sinma'n yɛ e kɔ'n, nán ɔ wun e lɔ kun.›

²⁷ Yɛ é si'n i waan: ‹An si kɛ mín yi'n ɔ wuli ba kunngun nnyɔn.

²⁸ Kun tuli anunman. Kɛ n wun i lɛ'n, nnɛn wie cɛ yɛ ɔ ´di i-ɔ, afin m'an wun-mɛn i kun yɛ ɔ'a fa ju yɛ.

²⁹ Sɛ an fa nga ekun'n nan sa wie ko nyɛn i'n, oke nga m'an yo i yɛ'n, klunngbɔ'n ´kun min.›

^30-31 Ɔ man sɛ n ´ko ju mín si wun lɔ nan bakan'n nun-man mín sa nun'n, san ɔ ´wu, wuun be ´se kɛ e yɛ man klunngbɔ'n ɔ'a kun é si nin-ɔn.

³² N seli mín si'n kɛ ɔ fa ba'n wla mín sa nun nan sɛ m'an fɛ-mɛn i m'an sa-man min sin'n, nán mín wun sa wie i klun le nan kɛ ɔ ´yo-ɔ ɔ'a yo.

³³ Ɔ man i ti yaci, man m bɔbɔ n sin ba'n i ajalɛ nun n yo wɔ kanga nan ɔ nin be nga'm be wɔ.

³⁴ ?Sɛ nán e nin ba'n yɛ e kɔ'n, n ´ju mín si i nyrun lɔ sɛ yɛ ɔ ´yo ye-ɔ? N kwla tran-man lɛ n nian-man sa yalɛ sa ɔ tɔ-man mín si'n i su.»