Bo Bolɛ 26 - NYANMIƐN NDƐ'N 1998

Izaak nin Abimelɛk

¹ Abraam blɛ su awe liɛ'n i sin awe uflɛ wa kpɛnnin mɛn'n nun ekun. Nan Izaak ɔ'a ɔ Gerar, Filistifuɛ'm be famiɛn Abimelɛk i mɛn'n nun lɔ.

² Anannganman fiteli i nyrun nan ɔ'a se i kɛ: «Nán kɔ Ezipt. Lika nga n wa kle wɔ lɛ'n, lɛ yɛ tran-an.

³ Tran mɛn sɔ'n nun lɔ, n ´jran ɔ sin, n ´yo wɔ kpa. N ´fa lika nga kwlaa m man wɔ nin wɔ anunman mun. Nda nga n tali ɔ́ si Abraam'n, n ´yiɛ i nuan.

⁴ N ´yo man ɔ osu nunfuɛ'm be ´sɔn kpanngban kɛ nglo lɔ nzraama mun sa. Kpɛkuun n ´fa lika nga kwlaa m ´man be. Be ti yɛ n ´yo asiɛ'n su nvle-nvle'm be kwlaa be ye-ɔ.

⁵ Yɛlɛ kɛ Abraam fali mín nuan ndɛ'n su. Ɔ niannin min mmla fanunfanun'm be su.»

⁶ Yɛ Izaak trannin Gerar lɛ-ɔ.

⁷ Kɛ lɛfuɛ'm be ´usɛ i yi i wun ndɛ'n, ɔ se kɛ: «Min niaan bla-a.» Srɛ kun i. I waan sɛ ɔ se be kɛ ɔ ti i yi'n, sran sɔ'm be ´kun i Rebeka dunman nun, afin Rebeka ti klanman.

⁸ Kɛ ɔ cɛli lɛ lɔun kan'n, le kun Filistifuɛ'm be famiɛn Abimelɛk ɔ ´niɛn i fenɛtri'n nun-ɔn, Izaak yɛ ɔ nin i yi Rebeka be su tra ndalie yɛ.

⁹ Yɛ Abimelɛk flɛli Izaak nan ɔ'a se i kɛ: «Ɔ yi cɛ yɛlɛ bla'n! ?Ɔ yo sɛ ti yɛ ɔ waan ɔ niaan bla-a?» Izaak waan: «Min waan wuun sɛ m'an se-man sɔ-ɔ, be ´kun min i dunman nun.»

¹⁰ Yɛ Abimelɛk waan: «?Nzu ti yɛ a yo e sɔ-ɔ? Ɔ kali kan nan e wa sran wie nin ɔ́ yi'n b'a la. A wa yo man nzue flɔlɔ ´wlu e bo ngbɛn.»

¹¹ Nan Abimelɛk ɔ'a kan kle i sran mun kɛ: «Sran ng'ɔ kan bian nga annzɛ i yi'n, san ɔ ´wu.»

¹² Afuɛ sɔ'n nun'n, Izaak guali ble nin ɔrz kpɛkuun ɔ nyannin mma ng'ɔ luali'n i wunsu sɔ fa ya, afin Anannganman mɛnnin i muae.

¹³ Ɔ nyɛnnin i wun, i ninnge'm be ɔli be nyrun, ɔ man ɔ yoli anyanbeunfuɛ dan.

¹⁴ B'ɔ ti kɛ klɔ nnɛn sa'n, i bua o, i boli o, i nannin o, ɔ nyannin wie kpa. Yɛ i sa nun sran'm be sɔnnin. Filistifuɛ'm be nyin bloli Izaak i ninnge'm bé wun.

Izaak nin Abimelɛk be aenguɛ tralɛ

¹⁵ Gbo nga bɔ kɛ i si Abraam i nyin o su'n i sran'm be kpɛli'n, Filistifuɛ'm be tanninnin be nin fa.

¹⁶ Yɛ Abimelɛk seli Izaak kɛ: «W'a yo dan a tra e ngboko, i ti, jaso wa kɔ.»

¹⁷ Nan Izaak ɔ'a jaso lɛ. Ɔ ko boli i nanmue Gerar kongo'n nun lɔ, nan ɔ'a tran lɛ.

¹⁸ I si blɛ su gbo nga be kpɛli nan ɔ'a wu'n bɔ Filistifuɛ'm be tanninnin be'n, ɔ wa kpɛli be nun ekun. Dunman kunngba nga i si fa tɔnnin be'n yɛ ɔ fa flɛli be-ɔ.

¹⁹ Izaak i sufuɛ'm be kpɛli gbo kongo'n nun. Kɛ be ´kpɛ gbo sɔ'n be ko tɔli nzue ti kun nun.

²⁰ Gerar lɔ nnɛn kankanfuɛ'm be nin Izaak liɛ'm be kpɛli ndɛ. Be waan: «E liɛ yɛlɛ nzue'n.» Ndɛ bɔ be nin Izaak kpɛli'n ti ɔ flɛli gbo sɔ'n kɛ Esɛk. Esɛk i bo'n yɛlɛ utre.

²¹ I sran'm be kpɛli gbo'n kun ekun, akplowa tɔli su ekun. Izaak flɛli i gbo sɔ'n kɛ Sitna. Sitna i bo'n yɛlɛ akplowa.

²² Ɔ yacili i lɛ ko kpɛli gbo kun ekun, b'a kɛn-mɛn i li su ndɛ kun nan ɔ'a flɛ i kɛ Reobɔt. Reobɔt i bo'n yɛlɛ lika tɛtrɛ. I waan: «Anannganman ɔ'a yo man y'a kpɛn lika gbaun nun, ɔ man e wa nyan ye lika nga nun.»

²³ Ɔ fɛli i lɛ ɔli Beɛr-Seba.

²⁴ Kɔnguɛ Anannganman fiteli i nyrun. Ɔ seli i kɛ: «N ti ɔ́ si Abraam i Nyanmiɛn, e nin wɔ e o nun, nán srɛ kun wɔ. N ´yo wɔ kpa. N ´yo man ɔ osu'n ɔ trɛ min sufuɛ Abraam dunman nun.»

²⁵ Izaak kplannin Nyanmiɛn sɔwlɛ kun lɛ, ɔ bo guali Anannganman wun, nan ɔ'a kplɛn i tannin sua'n lɛ. Kpɛkuun i sran'm be kpɛli gbo kun ekun.

²⁶ Abimelɛk fɛli i Gerar lɔ wa toli Izaak. Ɔ ´ba-a, ɔ nin i janvuɛ Aizat, ɔ nin i sonja'm bé su kpɛnngbɛn Pikɔl yɛ be bali-ɔ.

²⁷ Izaak usali be kɛ: «?Amun bɔ amun nyin ci min bɔ an fuannin min amún mɛn'n nun'n, nzu yɛ an bɛ i yolɛ min wun wa-a?»

²⁸ Be tɛli i su kɛ: «E wun kɛ Anannganman nin wɔ o nun, ɔ man e waan e nin wɔ e ´tra aenguɛ. Sɛ e tra'n, e `ta su nda e fa cici i bo.

²⁹ Nan i ti, ta e nda kɛ a su yo-man e tɛ, afin y'a yo-man wɔ tɛ, sa kpa cɛ yɛ e yoli wɔ-ɔ. Kɛ a ´kɔ'n, e yacili ɔ nun a ɔli fɔuun. Yɛ Anannganman kusu ɔ'a man wɔ muae klanman yɛ.»

³⁰ Izaak man be tɔnnin aliɛ kpa mannin be. Be dili be nɔnnin nzan,

³¹ be jasoli nglɛmun ndɛ be tatali be wun nda. I sin Izaak jasoli atin'n su mannin be klanman nan b'a ɔ.

³² Le kunngba sɔ nun'n, Izaak i sran'm be wa kannin gbo wie bɔ be su kpɛ'n i nun jasin'n kleli i. Be waan: «Y'a tɔ nzue nun.»

³³ Izaak tɔnnin gbo sɔ'n i dunman kɛ Siba. Siba i bo'n yɛlɛ nda talɛ. I sɔ'n ti yɛ lele ndɛ be flɛli klɔ'n kɛ Beɛr-Seba nin-ɔn.

Ezau i bla jalɛ

³⁴ Kɛ Ezau dili afuɛ ablanan'n, ɔ jali Beri b'ɔ ti Ɛtfuɛ'n i wa Zidit nin Elɔn i wa Basmat. Elɔn kusu ti Ɛtfuɛ wie.

³⁵ Bla sɔ'm be wlali Izaak nin Rebeka be klunngbɔ.