Bo Bolɛ 25 - NYANMIƐN NDƐ'N 1998

Abraam i wulɛ

¹ Abraam jali bla kun ekun, be flɛ i kɛ Kɛtira.

² Ɔ nin i be wuli Zimran, nin Zɔksan, nin Mɛdan, nin Madian, nin Zisbak yɛ Sua.

³ Zɔksan wuli Seba nin Dɛdan, i anunman mun yɛlɛ Asirfuɛ mun, nin Lɛtusfuɛ mun, ɔ nin Lɛmifuɛ mun.

⁴ Madian kusu wuli Efa, nin Efɛr, nin Enɔk, nin Abida, yɛ Ɛlda. Be kwlaa sɔ'm be ti Kɛtira i anunman mun.

⁵ Abraam fɛli i bo ninnge'n kwlakwla mannin Izaak.

⁶ I soman'm be mma'm be liɛ'n, ɔ cɛcɛli be ninnge kpɛkuun ɔ man be jasoli Izaak wun lɛ be ɔli wia afiliɛ lɔ mɛn kun nun.

⁷ Abraam dili afuɛ ya afuɛ ableso-nin-nnun,

⁸ nan ɔ'a wu. Ɔ yoli oke, ɔ cɛli kpa. Ɔ dili ye lele guɛli i ti nin i bo. Yɛ ɔ wu toli i nannan'm be lɔ-ɔ.

⁹ I wa Izaak nin Ismaɛl be sieli i Makpela yɛbuɛ buɛ'n nun Zosar b'ɔ ti Ɛtfuɛ'n i wa Efrɔn i asiɛ b'ɔ o Mamre ndɛnman lɛ'n i nun.

¹⁰ Asiɛ sɔ'n yɛ Abraam toli i Ɛtfuɛ'm bé sa nun nin-ɔn. Be sieli Abraam i yi Sara i wun lɛ.

¹¹ Kɛ Abraam wuli'n, Nyanmiɛn yoli i wa Izaak i kpa. Izaak trannin Lasai-Rɔi gbo'n wun lɛ.

¹² Ismaɛl b'ɔ ti Abraam nin Sara i afanniɛn bla Agar b'ɔ fin Ezipt'n bé wa'n, i osu yɛ.

¹³ Ismaɛl i mma mun, kɛ ɔ fɛ i kpɛnngbɛn'm be nun b'ɔ fa ´ju kanngan'm be nun'n be yɛ: klikli'n, be flɛ i kɛ Nɛbazɔt. I sin liɛ mun yɛlɛ Kedar, Adbeɛl, Mibsam,

¹⁴ Misma, Dima, Masa,

¹⁵ Adad, Tema, Zɛtir, Nafis, yɛ Kɛdma.

¹⁶ Ismaɛl i wa blu-nin-nnyɔn'm be dunman mun yɛ be o lɛ-ɔ. Be ti wlengbi blu-nin-nnyɔn. Be dunman'm be o be klɔ nin be nanmue'm be su.

¹⁷ Ismaɛl dili afuɛ ya afuɛ ablasan-nin-nso nan ɔ'a wu nan b'a sie i.

¹⁸ I bo mma'm be trannin Avila nin Sir be afiɛn'n nun. Sir nin Ezipt be mantan su. Ɔ o Asiri i ndɛnman lɛ. Be nin be niaan'm be mantan-man.

ZAKƆB I WUN NDƐ Ezau nin Zakɔb

¹⁹ Abraam i wa Izaak i ndɛ'n yɛ.

²⁰ Izaak dili afuɛ ablanan yɛ ɔ jali Bɛtiɛl b'ɔ ti Aramfuɛ'n i wa bla Rebeka-a. Aram lika'n wo Mezopotami mɛn'n i nglo lɔ. Rebeka i niaan bian yɛlɛ Laban.

²¹ Rebeka i klun ti kpan, nan i wun Izaak ɔ'a srɛ Anannganman ɔ'a mɛn i. Anannganman tili i srɛwa'n nan Rebeka ɔ'a wunnzɛ nda nnyɔn.

²² Ba'm be tu ngondin i klun lɔ yɛ Rebeka se kɛ: «?Sɛ ɔ ko yo sa'n, wuun ɔ yo sɛ ti yɛ m'an ka-man lɛ-ɔ?» Nan ɔ'a ko usa Anannganman.

²³ Anannganman seli i kɛ: «Akpasua nnyɔn be o ɔ klun. A wa wu nvle nnyɔn. Kun ´kwla kun, ba kpɛnngbɛn'n ɔ ´su i sinma'n.»

²⁴ Rebeka i ba wulɛ cɛn ´ju-ɔ, ɔ'a wu ba nda nnyɔn sakpa.

²⁵ Klikli'n i wunnɛn'n ti zoun. I wun ndrɛ kpa'n sa ɔ waan tralɛ nga be fa nnɛn ndrɛ be yo nin-ɔn. I sɔ'n ti be flɛli i kɛ Ezau .

²⁶ I osu b'ɔ cɛ kan'n yɛ be wuli i niaan bian nin-ɔn. I sa'n ɔ lɛ Ezau i ja sin nanndi'n nun. I sɔ'n ti be flɛli i kɛ Zakɔb. Kɛ be ´wu be'n, wuun Izaak ɔ'a di afuɛ ablesiɛn.

²⁷ Ba'm be nyinnin. Ezau yoli koniɛn difuɛ dan kpa. Ɔ ti bo nun sran. Zakɔb kusu ti diin, tannin sua'n nun yɛ ɔ o i liɛ-ɔ.

²⁸ Izaak klo Ezau afin blo nnɛn'n yo i fɛ kpa. Rebeka kusu klo Zakɔb.

²⁹ Le kun Zakɔb o lɛ ɔ tɔn i akpesi kpɛkuun Ezau fin blo ɔ'a ba, afɛ'n ɔ'a ti i kpa sakpa.

³⁰ Ɔ seli Zakɔb kɛ: «Zakɔb, yaci man n di wɔ akpesi nyrun zoun nga wie, m'an fɛ ngboko.» (I ti yɛ be flɛli i kɛ Edɔm nin-ɔn.)

³¹ Zakɔb tɛli i su kɛ: «Sɛ a ´wun kɛ m ´man wɔ wie'n, wuun w'a yo wɔ awuliɛ kpɛnngbɛn'n i atɛ mín sa nun.»

³² Yɛ Ezau waan: «?N su wa wu ɔ waan kpɛnngbɛn, n ´yo awuliɛ kpɛnngbɛn'n sɛ?»

³³ Yɛ Zakɔb waan: «Yoo, ta min nda e.» Nan Ezau ɔ'a ta Zakɔb nda kɛ ɔ'a yo i awuliɛ kpɛnngbɛn i atɛ i sa nun .

³⁴ Yɛ Zakɔb mannin Ezau i kpaun nin lanti akpesi'n wie-ɔ. Ezau dili, ɔ nɔnnin nzan nan ɔ'a jaso ɔ'a ɔ. Kɛ Ezau yoli i awuliɛ kpɛnngbɛn'n i finfin sa.