Abakik 3 - NYANMIƐN NDƐ'N 1998

Abakik i Nyanmiɛn kpatalɛ

¹ Abakik b'ɔ ti Anannganman i nuan ijɔfuɛ i Anannganman srɛlɛ b'ɔ ti kɛ kokolɛ sa'n yɛ ɔ o yɛ.

² Anannganman, ɔ sa dandan nga a yoli be'n, be kannin bé wun ndɛ n tili. Ɔ man n sro wɔ. Blɛ'n kwlakwla, yo i sɔ sa mun ekun kle ye. Kannzɛ bɔ a fa ya'n, sanngɛ ɔli yi ɔ klun-ufue'n i nglo kle ye ekun.

³ Nyanmiɛn fin Teman lɔ ba. Nyanmiɛn bɔ i nzuɛn nin klɔ sran liɛ'n ti-man kun'n, ɔ fin Paran oka'm be su lɔ ba. Nglo lɔ'n, i nyɛnmɛn b'ɔ ti'n, ɔ fite su lika'n kwlaa, yɛ asiɛ'n sufuɛ'm be kwlaa be mɛnmɛn i.

⁴ Ɔ bo nyɛnnyɛnnyɛn. Like'n ti kɛ wia je sa, ɔ fin i sa klun fite. Lɛ yɛ i wunmiɛn'n fia-a.

⁵ Ɔ to tukpacɛ tɛ bɔ sa ndɛndɛ'n yi i nyrun yɛ ɔ ba-a. Kan ɔ sin lɛ'n, ɔ ti tukpacɛ ngunmin .

⁶ Kɛ ɔ jran'n, asiɛ'n keje, kɛ ɔ nian mɛnfuɛ mun'n, kpɛkuun be bo bli srɛ b'ɔ kun be'n ti. Oka'm bɔ be ti be liɛ kɛ yɛbuɛ sa'n, be nun kpacikpaci, kpɔlɛ nga be o lɛ-ɔ nán ndɛ sa'n, be trotro, be yɛ be ti atin b'ɔ sin su laa nin-ɔn.

⁷ Etiopifuɛ'm be wla bɔ ɔ'a bo bé wun'n, n wun i. Madianfuɛ'm be kusu srɛ ng'ɔ kun be'n, n wun i ekun.

⁸ ?Nzue ba dandan'm be yɛ be kun wɔ ya-a, Anannganman? ?Nzue ba dandan mun-ɔn? ?Jenvie'n wun yɛ a fa ya dan nga-a? A fu nyanmiɛn ble'n su kɛ kakaklolo bɔ i nnɛn kpanngɔ'm be su fɛ i kɔ alɛ kunlɛ nan ɔ nyan kwlalɛ'n sa.

⁹ A siesie ɔ ta'n i ye. Ɔ ta mma'n yɛlɛ ɔ nda nga a tali mun. A fa nzue ba dandan fa kpaci asiɛ'n nun.

¹⁰ Kɛ oka'm be wun wɔ'n, be usu. Kɛ nzue'n ɔ tɔ dandan'n, kpɛkuun ɔ'a kata asiɛ'n su kplu. Jenvie'n ɔ bo kpɛkuun ɔ wunndun kendengleiin to nyanmiɛn'n.

¹¹ Kɛ ɔ ta mma'm bɔ a to be'n be ´kɔ bɔ be ´kpa sin'n, bɔ wuun ɔ cua'm be ´bo mianmian be ´kɔ'n, kpɛkuun bi, wia nin anglo'n b'a jran .

¹² A fa ɔ klun ya'n yɛ a wlan asiɛ wunmuan'n su-ɔ. Ya ble b'ɔ o ɔ klun'n yɛ a fa nunkun mɛnfuɛ mun-ɔn.

¹³ Ɔ sran'm be delɛ yɛ a ´tiatia kɔ blɛblɛ lɛ-ɔ. Ɔ famiɛn bɔ a fa sieli'n, i delɛ yɛ a su kɔ lɛ-ɔ. A ´kun klunwifuɛ'm be famiɛn'n, kpɛkuun a ´nunnun i bo mma'm be kwlaa kpan.

¹⁴ E kpɔfuɛ'm bé su kpɛnngbɛn nga be ´kpla be ´ba sa'n, a ´se kɛ aunngban dan wie yɛ ɔ su fita-a. Kɛ be ´ba'n, wuun be ´kpan aklunjuɛ kpanlɛ'n be ba kɛ be wa keje e nun. Be ´ba'n, be buabua bé wun kɛ be ´fia be ´kun ye, sanngɛ a de be bɔbɔ bé sa nun ta mma mun fa fitifiti bé ti'n.

¹⁵ Kɛ jenvie'n ɔ ´wunndun kpɔlu-kpɔlu'n, wuun a ´fa ɔ nnɛn kpanngɔ mun sin nun.

¹⁶ Kɛ n tili nganniɛn'n, nanwlɛ, i liɛ'n n wieli je mlɔnmlɔn. N gua sa yɔyɔyɔ kokolɛ'n dunman nun. Kpɛkuun srɛ b'ɔ kun min'n ti, mín wun glɔli min. Mín ja'm be lololi mín bo kplokoo. I ti n wa tran lɛ bɔ koun m ´minndɛ be nga be kle e yalɛ'n be awlaboɛ cɛn'n nan e nin be e ´ko kun.

¹⁷ Kannzɛ mma nun-man figie'm be su'n, kannzɛ be nyan-man vinyi mma be ti-man'n, kannzɛ like fi nun-man olivie'm be su'n, kannzɛ be nyan-man aliɛ fie'm be su'n, kannzɛ bua nun-man tuin'm be nun'n, kannzɛ nannin nun-man tuin'm be nun'n,

¹⁸ sanngɛ n liɛ'n, n lɛ aklunjuɛ Anannganman dunman nun, kɛ Nyanmiɛn ti min defuɛ'n ti n lɛ aklunjuɛ .

¹⁹ Anannganman Nyanmiɛn'n ti min wunmiɛn manfuɛ, ɔ yo man mín wun kpɛ kɛ álua mun sa, ɔ yo man n nanti oka fleinflein'm be su .