2 Samiɛl 4 - NYANMIƐN NDƐ'N 1998

Baana nin Rekab be kunnin Is-Bosɛt

¹ Kɛ Sail i wa'n tili i kɛ Abnɛr wuli Ebrɔn lɔ'n, i sa sin bubuli i. Srɛ kunnin Izraɛlfuɛ'm be kwlaa dan kpa.

² Sail i wa'n i sonja su kpɛn nnyɔn be o lɛ. Be flɛ kun Baana, yɛ be flɛ kun ekun Rekab. Rimɔn b'ɔ fin Bɛnzamɛn akpasua'n su'n, i mma mun-ɔn. Rimɔn fin Beerɔt. Be ka Beerɔt be wlɛ i Bɛnzamɛn nvle'n nun,

³ afin kɛ Beerɔtfuɛ'm be wanndi ko trannin Gitaim'n, lele ndɛ be tɛ o lɔ.

⁴ Sail i wa Zonatan i wa yasua kun o lɛ. I ja'm be ti saciwa, ɔ kwla-man nanti. Kɛ be wa kan Sail nin Zonatan be wulɛ'n i ndɛ'n, wuun ɔ'a di afuɛ nnun. Jasin sɔ'n fin Ziriɛl yɛ ɔ bali-ɔ. Bla nga ɔ tɛ i'n mɛnnin i su kɛ ɔ ´wanndi ndɛndɛ ´kɔ, nan ba'n ɔ'a tɔ, kpɛkuun ɔ'a kwla nanti-man kun. Be flɛ i kɛ Mɛfibɔsɛt.

⁵ Rimɔn ng'ɔ fin Beerɔt'n i wa Rekab nin i wa Baana be ɔli Is-Bosɛt i sua lɔ wia klakla kpa'n nun. Kɛ ɔ ´yo sɔ'n, wuun ɔ su lafi.

⁶ Rekab nin Baana be wluli i sua'n klun lɔ. Be yoli bé wun kɛ be su ko fa ble sa, kpɛkuun be wɔli Is-Bosɛt klun tokofi be kunnin i. Yɛ be wanndi ɔli-ɔ.

⁷ Kɛ be ´wlu sua'n nun lɔ'n, wuun Is-Bosɛt la i bɛ'n su i sua ba'n nun lɔ, yɛlɛ nga be kunnin lɛ'n. Be kpɛli i ti'n. Be fa fali atin ng'ɔ kɔ lika kpɛtɛkplɛɛ nun lɔ'n su, be nantili kɔnguɛ wunmuan'n nun.

⁸ Be fali Is-Bosɛt i ti'n be ko mannin David Ebrɔn lɔ. Be seli i kɛ: «Nannan, ɔ kpɔfuɛ Sail nga i waan ɔ kun wɔ laa'n i wa Is-Bosɛt i ti'n yɛ. Anannganman ɔ'a yi tɛ nga Sail nin i osu nunfuɛ'm be yoli wɔ'n ɔ'a man be.»

⁹ David tɛli Rekab nin i niaan Baana bɔ be ti Rimɔn b'ɔ fin Beerɔt i mma mun'n be su kɛ: «N kan Anannganman b'ɔ deli min sa yalɛ'n kwlaa nun'n!

¹⁰ Sran ng'ɔ wa kannin kɛ Sail wuli'n, ɔ bu i kɛ jasin kpa yɛ ɔ su bo-ɔ. N trɛli i n kunnin i Ziklag lɔ. I jasin kpa'n i nuan akatua bɔ m mɛnnin i'n yɛ ɔ o lɛ-ɔ.

¹¹ ?Yɛ a ´se kɛ sran tɛfuɛ'n bɔ b'a ko wlu sran kpa kun i sua'n nun b'a kun i i bɛ'n su'n, yɛ n su man-man be sran kunlɛ'n i nuan like-ɔ? N ´yo man amun su tran-man mɛn'n nun kun.»

¹² Yɛ David flɛli i gbanflɛn mun nan b'a kun be. Be kpɛli bé sa nin bé ja mun, yɛ be sendeli be nglo Ebrɔn nzue'n nuan lɛ. Yɛ be fali Is-Bosɛt i ti'n be ko sieli i Abnɛr i asieliɛ'n nun Ebrɔn lɔ.