2 Korɛntfuɛ Mun 9 - NYANMIƐN NDƐ'N 1998

Kristfuɛ'm be lika nianlɛ

¹ M bo-man yɛ n klɛ-man Nyanmiɛn i sran'm bɔ be o Zide lɔ'n be lika nianlɛ ndɛ'n, i wun fluwa man-man amun.

² N si amun aklunye dan'n b'ɔ man n fa amun di min nuan kle Maseduanifuɛ mun'n, n seli be kɛ afuɛ sin yɛ Akaifuɛ'm be buli akunndan kɛ be ´yo sa sɔ nin-ɔn. Amun akunndan sɔ'n man be kpanngban lika be waan be ´yo wie.

³ Kɛ ɔ ko yo nan é nuan bɔ e fa sa nga an yo'n di'n ɔ'a yo-man ngbɛn'n ti yɛ n sunmannin e niaan sɔ mun amun wun lɔ-ɔ. Kɛ be ju lɔ'n, man be wun kɛ like nga n kɛn i ndɛ n kleli be'n, amu'an wie i yo.

⁴ Sɛ amu'an yo-mɛn i sɔ'n, sɛ Maseduanifuɛ'm be wie'm be ba n sunmanlɛ'n nan like nga e lafi amun su kpa kɛ amun ´yo'n amu'an wie-mɛn i yo'n, wuun amu'an gua é nyin ase dan kpa yɛ kusu amun liɛ sin-ɔn.

⁵ I sɔ'n ti'n, m buli akunndan kɛ sɛ n srɛ e niaan mun nan be dun mmua min nyrun be ko tiantian ninnge sɔ'n bɔ amun waan amun ´fa di nɛnnɛn'n i nuan nan m'an ju lɔ'n, ɔ ti kpa. I sɔ'n nun'n, ɔ su yo-man kɛ amún sa ti tankaan, sanngɛ an yo i nɛnnɛn su sakpa.

⁶ An si kɛ sran ng'ɔ di fie kaan'n, i su like ng'ɔ nyɛn i'n ti kaan, yɛ sran ng'ɔ di fie dan'n, ɔ nyan like kpanngban.

⁷ Man sran kun i like ng'ɔ bu i akunndan kɛ sɛ ɔ man-an ɔ ti kpa'n, ɔ fa man, nán man ɔ yo i klunngbɔ su nin mianlɛ su, afin sran ng'ɔ man Nyanmiɛn like i klun-ufue su'n, i klun jɔ i wun .

⁸ Nyanmiɛn kwla man amun like kpakpa'n kwlaa lele bé ti sin yia amun. Ɔ man cɛn kwlaa amun ´nyan like ng'ɔ mian amún sa'n i kwlaa, yɛ amun ´nyan wie kpanngban amun ´fa yo aklunye,

⁹ afin Nyanmiɛn Ndɛ nga be klɛli'n be klɛli kɛ: «Ɔ fɛ i sa nun ninnge'n cɛcɛli yalɛfuɛ mun, ɔ su yaci-mɛn i aklunye'n mlɔnmlɔn .»

¹⁰ Nyanmiɛn b'ɔ man awie guafuɛ'n i awie b'ɔ gua'n, b'ɔ man sran nuan nun aliɛ'n , i kunngba'n ɔ ´man amun like nga amun ´fa yo aklunye'n, ɔ man ɔ ´yo kpanngban, yɛ amun agualiɛ'n ɔ ´gua amun kpa.

¹¹ Nyanmiɛn ´man amun like'n kwlaa bɔ amun ´fa yo aklunye titi, yɛ amun nɛnnɛn nga amun ´di bɔ e ´fa ko man be'n, ɔ man be ´la Nyanmiɛn ase.

¹² Afin Nyanmiɛn i sran'm be lika nianlɛ sɔ'n, nán kɛ bé wun nyanman nun tilɛ ngunmin ti-ɔ, sanngɛ ɔ man Nyanmiɛn asenna'n ɔ ´yo dan.

¹³ Kɛ an nian be lika sɔ'n, Krist i jasin fɛ'n bɔ an se kɛ an lafi su'n, ɔ kle kɛ an fa su kpa. Kɛ sran kpanngban bé wun i sɔ'n ɔ nin ye dan nga an yo be nin sran wie mun'n, ɔ man be ´bo Nyanmiɛn dunman.

¹⁴ Yɛ aklunye dan nga Nyanmiɛn man an yo'n ti be ´bu amun akunndan kpa, yɛ be ´yra bé nuan kɛ Nyanmiɛn jran amún sin.

¹⁵ Nyanmiɛn b'ɔ man e like dan b'ɔ lɛ-man wunsu'n, i kwla o!