2 Korɛntfuɛ Mun 8 - NYANMIƐN NDƐ'N 1998

Be klun-ufue su like manlɛ

¹ Aniaan mun, e klo kɛ an si ye dan nga Nyanmiɛn man Maseduani lɔ asɔnunfuɛ'm be yoli'n.

² Sa ng'ɔ tɔli lɔfuɛ'm bé su'n, ɔ man be wunnin nyrɛnnɛn kpa. Be ti yalɛfuɛ, sanngɛ be klun b'ɔ jɔ dan'n ti, be yoli aklunye kpa.

³ Nanwlɛ, n wun i kɛ like nga bé sa ju su'n be mannin, be man trali su bɔbɔ be klun-ufue su.

⁴ Be bɔbɔ be srɛli ye kpa kɛ e yaci man nɛnnɛn nga be ´ko di Nyanmiɛn i sran mun Zide lɔ'n be di wie.

⁵ Nga bɔ e bu i kɛ be ´yo'n, be yo trali su, afin be dun mmua fa bé wun mannin e Min'n, i sin be fa bé wun mannin ye kusu, i sɔ'n ɔ ti Nyanmiɛn klun su.

⁶ Ɔ man e srɛli Tit b'ɔ boli junman sɔ'n bo amun wun lɔ'n, kɛ ɔ ko uka amun nan an guagua nɛnnɛn dilɛ sɔ'n bo.

⁷ Like kpakpa'n kwlaa ti a sin a yia amun: an lafi Krist su kpa, an si ijɔ, an wun sa wlɛ, an lɛ anwlɛn sa'n kwlaa nun, yɛ an klo ye dan. N klo kɛ an yo aklunyefuɛ dan kusu.

⁸ N kan sran wie'm be anwlɛn bɔ be lɛ'n i ndɛ kle amun, nán amun mianlɛ ti yɛ n kan-an, sanngɛ n klo kɛ n ´wun i wlɛ sɛ an klo Nyanmiɛn nin sran sakpa o.

⁹ Afin an si ye dan nga e Min Jésus-Krist yoli ye'n: i b'ɔ ti anyanbeunfuɛ'n, ɔ kacili i wun yalɛfuɛ amun ti nan i yalɛ sɔ'n nun an kaci anyanbeunfuɛ.

¹⁰ An `nian min akunndan bɔ m bu i sa sɔ su'n yɛ: sɛ an sa like nga bɔ an boli i yolɛ bo afuɛ b'ɔ sin lɔ su'n, ɔ ti kpa, afin amun yɛ an dun mmua buli nɛnnɛn sɔ'n i dilɛ akunndan-an.

¹¹ I sɔ'n ti'n, an `guɛguɛ i bo siɛn'n! Akunndan nga b'ɔ man amun waan amun ´yo'n, an `bu akunndan kunngba sɔ'n an `yo nga amún sa ju su'n.

¹² Afin sɛ sran kun bɔbɔ klun su i waan ɔ ´man Nyanmiɛn like'n, like nga i sa ju su b'ɔ fa mɛn i'n, ɔ sɔ nun, ɔ mian-man sran kɛ ɔ mɛn i like b'ɔ lɛ-mɛn i'n.

¹³ Nán kɛ an ´fa amún sa nun ninnge'n kwlaa ´man sran wie mun nan an ´di i sin yalɛ-ɔ, sanngɛ man amún sa nun ninnge'm be sɛ.

¹⁴ Amun liɛ'n, kɛ e ´se yɛ'n, amún sa nun yo fɛ, i sɔ'n ti'n, sɛ amun waan amun ´ti be nga bé sa mian'n bé wun nyanman nun'n, an kwlɛ i yo. Amun kusu sɛ cɛn wie amún sa mian bɔ be kusu bé sa nun yo fɛ'n, be ´ti amún wun nyanman nun. Kɛ ɔ ko yo sɔ'n, wuun amún sa nun ninnge'm b'a sɛ.

¹⁵ Afin be klɛli i Nyanmiɛn Ndɛ'n nun kɛ: «Sran ng'ɔ isa kpanngban'n, ɔ'a nyan-man wie ɔ'a tra-man su, yɛ sran ng'ɔ isali kaan'n, i sa a mian-man .»

Tit nin i wiengu mun

¹⁶ Nyanmiɛn kwla o! Afin ɔ yoli man amun ndɛ lo Tit kusu.

¹⁷ Like nga e srɛli Tit kɛ ɔ yo'n, ɔ kplinnin su, yɛ kusu amun ndɛ b'ɔ lo i dan'n ti, i bɔbɔ klun su ɔ ɔli amun wun lɔ.

¹⁸ E sunmɛnnin i nin e niaan nga i jasin fɛ bolɛ'n ti be bo i dunman asɔnun'n kwlaa nun'n.

¹⁹ Yɛ kusu asɔnunfuɛ'm be yili i kɛ ɔ ko sunman ye. Kɛ e nin i e fa nɛnnɛn like sɔ'n ko man'n, e ´yo nan e Min'n nyan nyrun, yɛ amun ´wun kɛ be lika nianlɛ'n wo e klun sakpa.

²⁰ E klo-man kɛ e dunman saci junman nga e fa sika dan sɔ'n e di'n su.

²¹ Nán like nga e Min'n i nyrun ɔ ti nanwlɛ'n i ngunmin yɛ e yo-ɔ, sanngɛ e yo ng'ɔ ti nanwlɛ sran'm be nyrun'n kusu wie .

²² E sunmannin be nin e niaan bɔ e niɛnnin i sa sunman nun lele e wunnin kɛ sran'm be lika nianlɛ'n lo i kpa'n. Yɛ i wla b'ɔ o amun su'n ti'n, sran'm be lika nianlɛ'n lo i kpa tra laa'n.

²³ Tit liɛ'n, ɔ ti n wiengu bɔ e nin i e di junman man amun, sanngɛ e niaan ng'ɔ nin be kɔ'n be liɛ'n, asɔnun mun yɛ be sunmannin be-ɔ. Be man Krist nyan nyrun.

²⁴ An `yo be man asɔnun'm be wun kɛ an klo sran yɛ be si kpa kɛ é nuan bɔ e fa amun di kle be'n e di-mɛn i ngbɛn.