2 Korɛntfuɛ Mun 7 - NYANMIƐN NDƐ'N 1998

¹ N sran kpa mun, sa nga Nyanmiɛn seli kɛ ɔ ´yo be'n, i kwlaa sɔ'n ti'n, man e wla sa ng'ɔ saci sran'n i kwlaa nin akunndan tɛtɛ'n kwlaa be ase. Sɛ e waan e nyin yi Nyanmiɛn'n, man e nian e wun kpa kɛ nán man sa kaan sa tran e nin i ye afiɛn.

Pɔl klun b'ɔ jɔli'n

² Man e ndɛ lo amun kpa! Y'a yo-man sran fi tɛ, y'a saci-man sran fi, yɛ y'a di-man sran fi ndrunmun.

³ Nán amun dunman sacilɛ ti yɛ n kɛn i sɔ-ɔ, afin n dun mmua seli kɛ klolɛ bɔ n klo amun'n ti, sɛ amun ´wu o, sɛ amun ´nyan nguan o, e nin amun-ɔn.

⁴ N wla wo amun su kpa, n fa amun di min nuan kpa. Sa ng'ɔ tɔ e su'n, i kwlaa nun Nyanmiɛn cici n wla, n klun jɔ dan.

⁵ Afin kɛ e juli Maseduani lɔ'n, y'a nyan-man alaje bɔ kaan sa, sa kekleekle'n kwlaa sin yiali ye. Ndɛnngan'n jin e wun, srɛ kunnin ye.

⁶ Sanngɛ Nyanmiɛn b'ɔ cici be bɔ bé wla bo'n be wla'n, ɔ man kɛ Tit bali'n, ɔ wa guali ye anwlɛn su nzue.

⁷ Nán i balɛ'n ngunmin yɛ ɔ guali ye anwlɛn su nzue-ɔ, sanngɛ kɛ ɔ kannin fɔnvɔlɛ wafa nga an fa fɔnvɔli i'n i ndɛ'n, ɔ man é wla'n guali ase dan. I waan an le min awuliɛ kpa, an wo ngokoɛ nun yɛ an jin min sin, ɔ man n klun jɔ dan kpa siɛn'n.

⁸ Sɛ fluwa nga n klɛli amun'n i nun ndɛ'n boli amun wla'n, ɔ yo-man n ya. Kɛ n wunnin kɛ ɔ bo amún wla kaan'n, ɔ yo n ya,

⁹ sanngɛ siɛn'n, n klun jɔ, nán amun ya b'ɔ yoli amun'n ti-ɔ, sanngɛ ya b'ɔ yoli amun b'ɔ man an kacili amun nzuɛn'n, i ti yɛ n klun jɔ-ɔ. Amun ngokoɛ sɔ'n nun'n, an yoli sa ng'ɔ yo Nyanmiɛn fɛ'n, ɔ man sa nga e yoli amun'n, ɔ'a yo-man tɛ.

¹⁰ Afin kokolɛ nga Nyanmiɛn man sran koko'n, i agualiɛ yɛlɛ nzuɛn kacilɛ b'ɔ man sran nyɛn i ti'n, i sɔ liɛ'n yo-man ya, sanngɛ klɔ sran kokolɛ liɛ'n i agualiɛ yɛlɛ wie.

¹¹ An `nian amun ngokoɛ'n b'ɔ yo Nyanmiɛn fɛ'n, kɛ i agualiɛ ti kpa-a. Ɔ man an nian amun wun su kpa, an kpli amún ti, an fa ya sa tɛ'n ti, amun nyin yi Nyanmiɛn, an de min awuliɛ kpa, an jran min sin, yɛ an tu sran ng'ɔ yo sa'n i fɔ kpa! Sa sɔ'n kwlaa nun, e wun kɛ amún wun sa'n ɔ'a wie .

¹² Nán sran ng'ɔ yoli sa'n ɔ nin sran nga be yoli i sa sɔ'n, be ti yɛ n klɛli fluwa sɔ nin-ɔn. Sanngɛ kɛ ɔ ko yo nan e ndɛ ɔ'a lo amun kpa Nyanmiɛn nyrun'n, i ti yɛ n klɛli-ɔ.

¹³ I sɔ'n ti'n, é wla'n gua ase. Nán kɛ e wla'n ngunmin yɛ ɔ gua ase-ɔ, sanngɛ kɛ e wun kɛ Tit klun jɔ dan'n, bɔ amun ti i anwlɛn'n tɔ nzue nun'n, ɔ man e klun jɔ dan kpa ekun.

¹⁴ N fa amun di min nuan kleli Tit, yɛ an kusu amu'an gua-man mín nyin ase. Kɛ ndɛ nga n kan kleli amun'n i kwlaa ti nanwlɛ'n, i kunngba nin-ɔn, min nuan bɔ n fa amun di kleli i'n i kusu ti nanwlɛ.

¹⁵ Kɛ ɔ bu i sran bɔ an buli i'n, ɔ nin amun wun b'ɔ blili amun bɔ an sɔli i nun'n, ɔ nin amún nyin b'ɔ yi i'n i akunndan'n, ɔ man ɔ klo amún sa dan kpa.

¹⁶ Kɛ bɔ sa'n kwlaa nun n kwla fa min wla gua amun su'n, ɔ man n klun ti jɔwa.