2 Korɛntfuɛ Mun 4 - NYANMIƐN NDƐ'N 1998

Like kpakpa b'ɔ o sɛ nun'n

¹ Nyanmiɛn i aunnvuɛ b'ɔ si ye b'ɔ fa e wlali junman nga nun'n ti'n, é sa sin bubu-man ye.

² E wla like nga be yo nyannzuɛn ti be fiafia su'm be ase, e yo-man like gblɛgblɛ nun, yɛ e sanngan-man Nyanmiɛn ndɛ'n, sanngɛ kɛ e kan ndɛ weinwein Nyanmiɛn nyrun'n, ɔ man sran'm be kwlaa be wun e wafa nga e ti'n.

³ Sɛ e jasin fɛ nga e kan'n ɔ tɛ o bui bo'n, wuun be nga be su mlin'n be nyrun yɛ ɔ tɛ o bui bo-ɔ.

⁴ Be liɛ'n, be lafi-man su yɛlɛ kɛ mɛn nga i min'n ɔ sacili be akunndan'n nan Krist b'ɔ fa Nyanmiɛn'n i wafa ng'ɔ ti'n i kwlaa i jasin fɛ'n, b'a wun-mɛn i wlɛ.

⁵ E kan-man e bɔbɔ é wun ndɛ, Krist-Jésus b'ɔ ti e Min'n i ndɛ yɛ e kan-an, i ti e ti amun akua.

⁶ Nyanmiɛn b'ɔ seli kɛ: «Man lika'n kpaja'n,» i kunngba'n yɛ man e wun sa wlɛ weiin-ɔn. Ɔ man kɛ e nian Krist'n, e wun wafa nga Nyanmiɛn ti'n i kwlaa, afin i yɛ man e sili i-ɔ .

⁷ E bɔ e lɛ Nyanmiɛn ninnge kpakpa sɔ mun'n, e ti kɛ sɛ sa, ɔ man be wun i wlɛ kɛ e kwla yo-man like fi, sanngɛ Nyanmiɛn b'ɔ kwla like kwlaa yo'n yɛ ɔ yo sa-a.

⁸ E wun nyrɛnnɛn wafa-wafa'n kwlaa, sanngɛ e nyan é ti, e akunndan sanngan, sanngɛ é wla bo-man,

⁹ be su e su, sanngɛ Nyanmiɛn yaci-man ye, be tɛ ye ase, sanngɛ be kwla-man ye.

¹⁰ Kɛ ɔ ´yo nan b'a wun kɛ y'a nyan nguan kunngba nga Jésus lɛ i'n wie'n, cɛn kwlaa nyrɛnnɛn kunngba nga Jésus wunnin i b'ɔ fa wuli'n, e wun wie.

¹¹ Kɛ ɔ ´yo nan b'a wun kɛ e bɔ e ti wie'n i nnɛn'n y'a nyan nguan kunngba nga Jésus lɛ i'n wie'n, e ´jran wie'n i nuan Jésus ti lele e ´fa wu.

¹² E liɛ'n, wie'n su e su tititi, sanngɛ amun liɛ'n, an lɛ nguan.

¹³ Be klɛli i Nyanmiɛn ndɛ'n nun kɛ: «N lafili Nyanmiɛn su, i ti yɛ man n kannin-ɔn.» E kusu, kɛ e lɛ anwlɛn kunngba sɔ'n bɔ e fa lafi i su'n, i sɔ'n ti yɛ e kan-an .

¹⁴ E si kɛ Nyanmiɛn b'ɔ cɛnnin e Min Jésus'n ɔ wa cɛn e wie kɛ ɔ cɛnnin Jésus'n sa, yɛ ɔ ´fa e nin amun e ´ko yiɛ i nyrun lɔ.

¹⁵ Amun ye yolɛ ti yɛ sa sɔ'n kwlaa yoli sɔ-ɔ, ɔ man kɛ Nyanmiɛn yo sran kpanngban bɔ bé nuan uka su titi'n be ye dan'n, ɔ man sran sɔ'm be kusu be wa lɛ i ase, yɛ be ´bo i dunman.

Sa nga be bɔ be lafi Nyanmiɛn su'n be yo'n

¹⁶ I sɔ'n ti'n, é sa sin bubu-man ye. Kannzɛ e wunnɛn ng'ɔ o yɛ'n ɔ saci'n, like nga bɔ man be flɛ min sran'n, cɛn kwlaa Nyanmiɛn bo i mɔnnɛn.

¹⁷ Nyrɛnnɛn kaan nga e wun i yɛ'n ɔ man e ´nyan tranwlɛ kpa nyanmiɛn su lɔ, e su jao-man nun le.

¹⁸ Nán ninnge nga be wun be'n be akunndan yɛ e bu-ɔ, nga be wun-man be'n, be akunndan yɛ e bu-ɔ, afin ninnge nga be wun be'n, be cɛ-man, sanngɛ nga be wun-man be'n, be cɛ be saci-man le.