2 Korɛntfuɛ Mun 3 - NYANMIƐN NDƐ'N 1998

Aenguɛ uflɛ i nun junman difuɛ'n

¹ ?Ndɛ nga e kɛnnin i lɛ'n ɔ kle kɛ e bɔbɔ e dunman yɛ e kunndɛli ekun-ɔn? ? E kunndɛ fluwa b'ɔ kan e wun ndɛ kle amun kɛ sran wie'm be yo'n sa? ?Yɛ kusu, e kunndɛ i sɔ fluwa amún sa nun?

² Amun bɔbɔ yɛ an ti e fluwa nin-ɔn, be klɛli i ye anwlɛn'n nun, sran'm be kwlaa be si i, be kanngan.

³ Be wun kɛ an ti fluwa bɔ Krist klɛ fa sunmannin ye. W'a fa-man kleyɔn a klɛ-mɛn i yɛbuɛ paplapa wie su, sanngɛ ɔ fa Nyanmiɛn b'ɔ lafi-man'n i Wawɛ'n yɛ ɔ fa klɛli i sran'm be anwlɛn'n nun-ɔn .

⁴ E wla bɔ Krist ti e fa guɛ i Nyanmiɛn su'n, i ti yɛ e kɛn i sɔ-ɔ.

⁵ Nán kɛ e kwla sa wie yo b'ɔ man e bu e wun kɛ e bɔbɔ e kwla yo like wie-ɔ. Sanngɛ sa nga e yo be'n, Nyanmiɛn yɛ man e yo-ɔ.

⁶ I kunngba sɔ'n i yɛ man e kwla di aenguɛ uflɛ nga ɔ nin sran'm be trali'n i junman nin-ɔn. Ɔ ti-man mmla bɔ be klɛli-ɔ, sanngɛ ɔ ti Nyanmiɛn Wawɛ'n liɛ. Afin mmla nga be klɛli'n, ɔ man sran wu, sanngɛ Nyanmiɛn Wawɛ'n liɛ'n, ɔ man sran nyan nguan .

⁷ Mmla nga be klɛklɛli i yɛbuɛ'n su'n ɔ man sran wu, sanngɛ i nun nga Nyanmiɛn ´fa man'n, be wunnin i bɔbɔ nyannyannyan. Ɔ ti like b'ɔ wie, sanngɛ ɔ man Moiz nyrun'n yoli nyannyannyan lelele ɔ man Izraɛlfuɛ'm b'a kwla niɛn-mɛn i nyrun a cɛ-man . Sɛ i balɛ'n nun ɔ yoli sɔ'n,

⁸ Nyanmiɛn Wawɛ'n liɛ'n ɔ trɛ fatifati!

⁹ Sɛ like nga be yo-ɔ ɔ man be bu sran fɔ'n ɔ lɛ nyrun dan sɔ'n, like nga kusu bɔ be yo-ɔ ɔ man Nyanmiɛn bu sran sran kpa'n, ɔ lɛ nyrun trɛ i fatifati.

¹⁰ Afin like nga laa ɔ lɛ nyrun dan sɔ'n, siɛn'n ɔ lɛ-man nyrun kun nga b'ɔ lɛ nyrun trɛ i kpa'n ti.

¹¹ Sɛ like ng'ɔ cɛ-man'n ɔ nyannin nyrun dan sɔ'n, nga b'ɔ ´ka lɛ mlɔnmlɔn'n ɔ lɛ nyrun trɛ i fatifati.

¹² E wla'n bɔ e fa guɛ i su kɛ nga sa'n ti yɛ man e kan ndɛ sɔ'n weinwein nin-ɔn.

¹³ E liɛ'n, e yo-man kɛ Moiz liɛ'n sa. Ɔ fa tannin kɛtɛli i nyrun kɛ nán man Izraɛlfuɛ'm be niɛn i nyrun'n i nyannyannyan b'ɔ cɛ-man'n.

¹⁴ Sanngɛ Nyanmiɛn man b'a kwla wun-man sa fi wlɛ. Ɔ man lele ndɛ, kɛ be ´kanngan sa laa nga Nyanmiɛn waan ɔ ´yo man sran'n i fluwa'n nun'n, tannin kunngba sɔ'n b'ɔ man be wun-man sa wlɛ'n ɔ tɛ o lɛ. Afin san be nga be nin Krist b'a kaci sran wunmuan'n be liɛ'n yɛ ɔ'a yi-ɔ.

¹⁵ Lele ndɛ'n, kɛ be kanngan Moiz fluwa'n nun'n, tannin sɔ'n man be wun-man sa wlɛ.

¹⁶ Sanngɛ be klɛli i Nyanmiɛn Ndɛ'n nun kɛ: «Sɛ sran kun i nyin kaci e Min'n i wun'n, ɔ yi tannin sɔ'n.»

¹⁷ E Min nga be kɛn i ndɛ wa'n yɛlɛ Nyanmiɛn Wawɛ'n, yɛ lika kwlaa nga e Min'n i Wawɛ'n wo lɛ'n, be di alaje .

¹⁸ E kwlaa nga Nyanmiɛn a yi e nyrun tannin ng'ɔ kata e nyrun'n, e wun wafa nga e Min'n i dan'n ti'n i kwlaa kɛ niannun nun sa. E ´kaci kɛ i wafa nga e fa wun i'n sa tititi lelele e ´fɛ i kpa. E Min'n i Wawɛ'n yɛ man e yo sɔ-ɔ.