2 Korɛntfuɛ Mun 2 - NYANMIƐN NDƐ'N 1998

¹ I sɔ'n ti, m buli akunndan kɛ n su kɔ-man amun wun lɔ n ko bo-man amun wla kun.

² ?Afin sɛ m bo amun bɔ amun man n klun jɔ'n amun wla'n, wan yɛ ɔ man n klun ´jɔ ekun-ɔn?

³ Sa nga ti yɛ n klɛli amun fluwa yɛ: n klo-man kɛ sɛ n ju amun wun lɔ'n, be nga be yɛ man n klun ko jɔ'n be bo n wla. Afin n lafi amun kwlaa amun su kpa, ɔ man n si kɛ sa ng'ɔ jɔ n klun'n, ɔ jɔ amun kwlaa amun klun wie.

⁴ Kɛ n ´klɛ amun fluwa sɔ'n, ń wla ti bowa dan kpa, min anwlɛn'n kpɛ n klun, yɛ min nyinmuɛn gua. Nán amún wla bolɛ ti yɛ n klɛli-ɔ, sanngɛ n yo i sɔ nan an si klolɛ dan nga n fa klo amun'n.

Sran i wun sa yaci cɛlɛ

⁵ Sɛ sran wie yoli sa wie b'ɔ bo wla'n, ɔ yo-man n ya, amun yɛ ɔ yoli amun ya-a, sanngɛ kɛ ɔ ´yo nan ɔ'a yo-man kɛ n su wla jɔlɛ'n, wienun-ɔn nán amun ngba yɛ ɔ yoli amun ya-a.

⁶ Fɔ nga amun nun kpanngban lika an fa tuli sran sɔ'n ɔ ju i.

⁷ Ɔ man an `yaci i wun sa cɛ i, an `yo man i wla gua ase, sɛ ɔ'a yo-man sɔ-ɔ, ɔ cɛ-man nan awlaboɛ'n ɔ'a kun i.

⁸ I sɔ'n ti'n, n ´srɛ amun kɛ an yo like ng'ɔ kle kɛ an klo i'n.

⁹ Kɛ n ´klɛ amun fluwa sɔ'n, n waan n ´sa amun nian nan n ´wun i wlɛ sɛ amun fa ndɛ nga n kan kleli amun'n su o.

¹⁰ Sran nga an yaci i wun sa cɛ i'n, n kusu n ´yaci cɛ i wie, afin sɛ n yacili sran wie wun sa cɛli i'n, amun ti yɛ n yaci cɛli i-ɔ, ɔ yoli Krist nyrun.

¹¹ Sɛ ɔ'a yo-man sɔ-ɔ, ɔ cɛ-man nan Satan ɔ'a nyan e, afin e si i nzuɛn'n.

Pɔl i akunndan sanngannin Troas lɔ

¹² Kɛ n juli Troas lɔ Krist i jasin fɛ bolɛ'n ti'n, e Min Nyanmiɛn'n mannin min atin kɛ n di junman'n kpa,

¹³ sanngɛ ɔ nin i sɔ'n ngba'n, kɛ m'an to-man min niaan Tit lɛ'n, min wla a gua-man ase, i sɔ'n ti n srɛli lɛfuɛ'm be atin nan m'an ɔ Maseduani.

Krist man e kwla

¹⁴ Nyanmiɛn i kwla o! Afin kɛ e nin Krist y'a kaci sran wunmuan'n ti'n, ɔ fa e yi i kwlalɛ'n nglo tititi. Yɛ ɔ fa e kɛ e yo man be si Krist lika'n kwlaa kɛ like b'ɔ bɔn fannin kpa'n sa.

¹⁵ Afin e ti kɛ parfɛn bɔ Krist fa man Nyanmiɛn'n sa, e ti sɔ be nga be su fite nun'n nin be nga be su mlin'n be nyrun.

¹⁶ Be nga be su mlin'n be liɛ'n ɔ ti kɛ duwlɛ kpukpuwa sa, ɔ kun sran, yɛ be nga be su fite nun'n be liɛ'n ɔ ti like kpa, ɔ man be nyan nguan. ?Wan yɛ ɔ kwla di i sɔ junman nin-ɔn?

¹⁷ E ti-man kɛ sran wie bɔ be yo Nyanmiɛn ndɛ'n kɛ be nga be yo ninnge sukusuku'm be atɛ'n be liɛ'n sa. Sanngɛ kɛ Nyanmiɛn sunmannin ye'n, bɔ i nyin ta ye'n, bɔ e nin Krist e ti sran wunmuan'n, ɔ man e kɛn i ndɛ'n nanwlɛ nun.