2 Korɛntfuɛ Mun 1 - NYANMIƐN NDƐ'N 1998

Pɔl klɛ fluwa nga ko mannin Korɛnt lɔ Kristfuɛ mun

¹ M Pɔl bɔ Nyanmiɛn klo kɛ Krist-Jésus sunman min'n, min nin e niaan Timote e ´klɛ fluwa nga blɛ amun bɔ an ti Nyanmiɛn i asɔnunfuɛ Korɛnt lɔ'n, ɔ nin be kwlaa bɔ b'a kaci Nyanmiɛn liɛ Akai akpasua wunmuan su'n.

² Man e Si Nyanmiɛn nin e Min Jésus-Krist be man an nyan ye, yɛ man amún wun jɔ amun fɔuun!

Pɔl la Nyanmiɛn ase

³ E Min Jésus-Krist i si Nyanmiɛn i kwla o! Ɔ ti e Si, ɔ si aunnvuɛ, ɔ ti Nyanmiɛn kun b'ɔ jran é sin sa'n kwlaa nun.

⁴ Sa kwlaa b'ɔ tɔ e su'n, i yɛ ɔ fɔnvɔ ye-ɔ, ɔ man fɔnvɔlɛ kunngba ng'ɔ fa fɔnvɔ ye'n, e kusu e fa fɔnvɔ wie mun sa kwlaa b'ɔ tɔ bé su'n i nun!

⁵ Afin kɛ Krist ti e wun nyrɛnnɛn kɛ i bɔbɔ wunnin nyrɛnnɛn dan sa'n, i kunngba nin-ɔn, Krist ti'n, Nyanmiɛn fɔnvɔ e dan.

⁶ Sa ng'ɔ tɔ e su'n, amun ukalɛ nin amún ti nyanlɛ ti-ɔ, fɔnvɔlɛ nga Nyanmiɛn fa fɔnvɔ ye'n, amun fɔnvɔlɛ ti-ɔ, ɔ man sa kwlaa ng'ɔ sɔn e nun'n, ɔ sɔn amun nun wie.

⁷ E lafi Nyanmiɛn su kpa, afin e si kɛ kɛ amun wun nyrɛnnɛn wie'n, Nyanmiɛn wa fɔnvɔ amun kusu.

⁸ Aniaan mun, e klo kɛ an si kpa kɛ sa ng'ɔ tɔli ye su Azi mɛn'n nun lɔ'n, ɔ tili ye kpa, ɔ man é nyin a tran-man su kɛ e ´fite nun bɔbɔ.

⁹ Nanwlɛ, e bu kɛ b'a sie e kɛ be kun e. Sa sɔ'n yoli sɔ nan y'a lafi-man e bɔbɔ e su, sanngɛ y'a lafi Nyanmiɛn b'ɔ cɛn sran nga be wu'n i su.

^10-11 I yɛ ɔ deli ye nyrɛnnɛn wie sɔ nun-ɔn, yɛ ɔ wa de ye. E wla o i su kɛ sɛ an uka ye e se i kɛ ɔ jran é sin'n, ɔ ´de ye ekun. Ɔ man kɛ sran sunman be srɛ i kɛ ɔ yo e ye'n, b'ɔ yo'n, sran sunman kusu be ´lɛ i ase e ti.

Pɔl kacili i akunndan'n

¹² Sa nga ti yɛ e di é nuan'n yɛ: e si e klun lɔ kpa kɛ nantilɛ wafa nga e fa nanti mɛn nun'n, e nanti i sɔ kpa amun nyrun tra su. E nuan nun ti-man nnyɔn-nnyɔn, Nyanmiɛn man e di nanwlɛ. Nán klɔ sran ngwlɛlɛ bɔ e si'n ti yɛ man e yo sɔ-ɔ, sanngɛ Nyanmiɛn yɛ ɔ jran é sin yɛ man e yo sɔ-ɔ.

^13-14 Ndɛ nga sɛ an kanngan-an amun ´wun i wlɛ'n, i cɛ yɛ e klɛ blɛ amun-ɔn. N wla o su kɛ e Min Jésus i cɛn'n nun'n, sa nga ndɛkɛn an wun-man be wlɛ kpa'n, amun wa wun be wlɛ weiin kpa. Sa sɔ'n yɛlɛ kɛ amun wa fa e di amún nuan, yɛ e kusu e ´fa amun di é nuan.

^15-16 Kɛ m buli sa sɔ'n i akunndan'n, laa n waan kɛ n ´kɔ Maseduani'n, m ´bo nun amun wun lɔ yɛ kɛ m ´ba'n, n ´sin amun wun lɔ ekun, nan kɛ n ´kɔ Zide'n, an gua min atin klanman. Sɛ n sin amun wun lɔ kpɛ nnyɔn sɔ'n, ɔ ´yo amun fɛ dan.

¹⁷ ?Kɛ n waan n ´yo sɔ bɔ m'an yo-man'n, nuan nun nnyɔn-nnyɔn yɛ n dili-ɔ? ?Sa nga n se kɛ n ´yo'n, an bu kɛ n kɛn i ngbɛn kɛ sran wie'm be yo'n sa, bɔ n kan ndɛ-ɔ n kacikaci i, ndɛ n se kɛ: «Ɛɛn,» kpɛkuun ainman n waan: «Cɛcɛ»?

¹⁸ Kɛ Nyanmiɛn di nanwlɛ ti'n, ndɛ nga e kan kleli amun'n, e kacikaci-mɛn i.

¹⁹ Afin Nyanmiɛn Wa Krist-Jésus bɔ min nin Silvɛn, ɔ nin Timote e kɛn i ndɛ kleli amun'n, ɔ ti-man nuan nun nnyɔn-nnyɔn difuɛ, ɔ ti nanwlɛfuɛ.

²⁰ Afin sa kwlaa nga Nyanmiɛn waan ɔ ´yo'n, Krist kplin su yɛ ɔ yiɛ i nuan. I sɔ'n ti, Jésus ti e kusu e yra é nuan se kɛ: «Man ɔ yo sɔ!» I sɔ'n nun Nyanmiɛn nyan nyrun.

²¹ Nyanmiɛn yɛ ɔ kle e nin amun e weiin kpa kɛ e nin Krist y'a kaci sran wunmuan-an, i bɔbɔ yɛ ɔ sieli e kɛ e yo i liɛ mlɔnmlɔn-ɔn,

²² ɔ sieli e nzɔliɛ ɔ man i Wawɛ'n tran e anwlɛn'n nun, ɔ man e si kɛ ɔ'a tra e ase.

²³ Sa ti bɔ n nian ɔ-man Korɛnt lɔ kun'n, amun nyrun aunnvuɛ ti-ɔ. Sɛ nɛ́n i sɔ ti'n, man Nyanmiɛn wun min.

²⁴ Nán kɛ e waan e mian amun Nyanmiɛn atin'n su ti-ɔ, afin kɛ an lafi Krist su'n, an jran kekle, sanngɛ e klo kɛ e ´uka amun e ´di junman nan amun klun `jɔ.