2 Be Nyoliɛ 9 - NYANMIƐN NDƐ'N 1998

Seba lɔ famiɛn bla'n i Salomɔn wun wunlɛ ndɛ

¹ Seba famiɛn bla'n tili Salomɔn ngan, afin i dunman'n fuli. Ɔ bali lele juli Zerizalɛm. I waan ɔ wa usa Salomɔn i akunndan nun sa mun ´fa sɛ i nian sɛ sakpa ɔ si ngwlɛlɛ o. Kɛ ɔ ´ba'n, ɔ man sran kpanngban kpa be wa sunmɛnnin i. Nyɔnngɔnmɛn ng'ɔ nin be bali'n, be sua ayre fannin, nin sika ɔkwlɛ kpanngban kpa, yɛ yɛbuɛ kpakpa mun. Ɔ wa toli Salomɔn nan ɔ'a usɛ i kosan ng'ɔ o i klun lɔ'n kwlakwla.

² Sa ng'ɔ usali'n, Salomɔn yiyili i kwlakwla nun mɛnnin i. Kosan fi ɔ'a ka-man bɔ ɔ'a wun-mɛn i su tɛwlɛ-ɔ.

³ Seba famiɛn bla'n wunnin kɛ Salomɔn i ngwlɛlɛ'n i dan'n fa ti ju'n. Ɔ niannin sua b'ɔ kplannin'n.

⁴ Ɔ wunnin aliɛ nga be tɔn be mɛn i b'ɔ di'n. Ɔ wunnin wafa ng'ɔ fa siesie i junman difuɛ'm be junman mun'n. Ɔ wunnin i junman difuɛ sɔ'm be sua mun, ɔ nin be tralɛ nga be wla'n, ɔ nin nzan sufuɛ'm bé wun tralɛ mun. Yɛ ɔ wunnin asikalie nga be fu su kɔ Anannganman i sua'n nun lɔ'n. Kɛ bla'n wunnin i sɔ ninnge mun'n, i nuan boli i wun, ɔ'a si-man wie se kun, kpɛkuun ɔ seli famiɛn'n kɛ:

⁵ «Kannzu ɔ ndɛ nga a kan be'n bɔ be kan kleli min'n, ɔ nin ɔ ngwlɛlɛ'n i wun ndɛ nga n tili i min mɛn'n nun lɔ'n, ɔ ti nanwlɛ.

⁶ Kɛ be ´kɛn i lɔ'n n lafi-man su. M bɔbɔ m'an ba, m'an wun i nin min nyinma. Sanngɛ nian, ɔ ngwlɛlɛ dan'n i bue kaan sa yɛ be kan kleli min-ɔn. Wafa nga a fa ti'n, ɔ tra nga n tili lɔ'n fatifati.

⁷ Ɔ sran mun nin ɔ sufuɛ nga be tran ɔ́ wun wa titi'n, bɔ be ti ɔ ngwlɛlɛ ndɛ mun'n, be liɛ su ti ye o.

⁸ Anannganman ɔ Nyanmiɛn'n bɔ ɔ́ wun yoli i fɛ, b'ɔ kpali wɔ kɛ a yo famiɛn i dunman nun'n, n ´yo i mo. Kɛ bɔ ɔ Nyanmiɛn'n klo Izraɛl mɛn'n, bɔ i waan mɛn sɔ'n tran lɛ tititi'n, i ti yɛ ɔ fali wɔ sieli i famiɛn-ɔn, kɛ ɔ ´yo nan w'a di sran'm be jɔlɛ kɛ ɔ fata sa'n ti.»

⁹ Seba famiɛn bla'n fali sika ɔkwlɛ bɔ ju tɔnun nsan nin sin, ɔ nin parfɛn kpanngban kpa, ɔ nin yɛbuɛ kpakpa mun mannin famiɛn'n. Kɛ ɔ fin lɛ'n, parfɛn nga Seba famiɛn bla'n fa mannin famiɛn Salomɔn'n, b'a wun-mɛn i wunsu sɔ le.

¹⁰ Iram i sufuɛ mun nin Salomɔn i sufuɛ mun bɔ be fali sika ɔkwlɛ Ɔfir lɔ bali'n, be fali santal waka nin yɛbuɛ kpakpa mun bali wie.

¹¹ Famiɛn'n fali santal waka'n wie yoli Anannganman i sua'n nin i bɔbɔ i sua'n be asikalie'n. Ɔ fali wie ekun yoli jru nin sanngo mannin jue tofuɛ mun. B'a wun-man waka kɛ nga sa Zida mɛn'n nun laa le.

¹² Famiɛn Salomɔn kusu fali like nga Seba famiɛn bla'n klo i'n b'ɔ usali'n i kwlaa mɛnnin i. Ninnge sɔ'm be sɔnnin trɛ i liɛ ng'ɔ fa blɛli famiɛn'n. I sin ɔ nin i sufuɛ mun be sali bé sin ɔli be mɛn nun.

Salomɔn i anyanbeun'n i ndɛ

¹³ Afuɛ nuan kunngba sika ɔkwlɛ nga be fa blɛ Salomɔn'n ti tɔnun ablaɔn.

¹⁴ Nga b'ɔ nyɛn i sika ɔkwlɛ atɛ yofuɛ'm be sa nun'n, ɔ nin sika ɔkwlɛ nin jɛtɛ ufue bɔ Arabfuɛ'm be famiɛn mun, nin mɛn siefuɛ'm be fa blɛ i'n, i kwlakwla ng'ɔ o lɛ'n, be ka wla-man nun.

¹⁵ Famiɛn Salomɔn yoli nyrɛn dandan ya nnyɔn. Be boli sika ɔkwlɛ'n kɛ blalɛ sa yɛ be fa yoli be-ɔ. Nyrɛn kun nun sika ɔkwlɛ'n ti kilo nsiɛn. Nyrɛn kun nun sika ɔkwlɛ'n ti kilo nsiɛn.

¹⁶ Ɔ yoli nyrɛn kanngan ya nsan. Be boli sika ɔkwlɛ'n kɛ blalɛ sa yɛ be fa yoli be-ɔ. Nyrɛn kun nun sika ɔkwlɛ'n ti kilo nsan. Nyrɛn kun nun sika ɔkwlɛ'n ti kilo nsan. Ɔ fali be sieli i sua nga be flɛ i «Liban bo'n» nun lɔ.

¹⁷ Salomɔn man be fali sui je be yoli famiɛn bia dan kun, kpɛkuun be kloli sika ɔkwlɛ jrɛiin be guɛli i wun.

¹⁸ Be yoli like gbagblagba kun asiɛ wun. I su yɛ famiɛn bia sɔ'n taka-a. Be yoli asikalie. I su yɛ be fu be ju bia'n i wun lɔ-ɔ. Bé ja tiatiawlɛ nga be fa fu asikalie'n su'n be ti nsiɛn. Bia sɔ'n lɛ bé ja takawlɛ, ɔ ti sika ɔkwlɛ, ɔ nin bia'n be sa su kunngba. Be yoli bé sa siewlɛ nnyɔn, kun wo i bue kun su, yɛ kun wo i bue kun'n su. Kpɛkuun be yoli asɔmɔli nnyɔn be nzɔliɛ, be jinjin bia'n i sa'm bé wun lɛ.

¹⁹ Yɛ be yoli asɔmɔli blu-nin-nnyɔn, be o asikalie'n su sɛsɛsɛ. Nsiɛn o bue kun, yɛ nsiɛn o bue kun. Be nian yo-mɛn i sɔ like mɛn uflɛ fi nun le.

²⁰ Salomɔn i klowa'm be kwlaa be ti sika ɔkwlɛ. I ninnge nga be o Liban Bo'n nun lɔ'n, atiɛ mun o, ninnge nga be ti kɛ i kpongbo sa mun o, be kwlaa be ti sika ɔkwlɛ jrɛiin. Wie fi ti-man jɛtɛ ufue. Salomɔn blɛ su'n, be bu-man jɛtɛ ufue'n i like.

²¹ Famiɛn'n lɛ mmeli mun. Ɔ man Iram i sufuɛ'm be fa be kɔ mmua kpa. Be kɔ Tarsis. Afuɛ nsan kwlaa be fɛ i lɔ be ba kpalɛ kun. Kɛ be ´ba'n, be fa sika ɔkwlɛ, nin jɛtɛ ufue, nin sui je, nin ndo, ɔ nin anunman fanunfanun mun ba.

²² Sika nun o, ngwlɛlɛ nun o, famiɛn Salomɔn i dan trali asiɛ'n su famiɛn'm be ngba.

²³ Asiɛ'n su famiɛn'm be kwlaa be ba Salomɔn wun wunlɛ. Be ba kɛ be wa ti ndɛ ng'ɔ kan be'n, afin ngwlɛlɛ nga Nyanmiɛn fa mɛnnin i'n yɛ ɔ fa kan-an.

²⁴ Kɛ be ´ba'n, like o bé sa nun sɛsɛsɛ kɛ be wa fa cɛ i. Wie'm be fa like nga be fa jɛtɛ ufue yo be'n, annzɛ like nga be fa sika ɔkwlɛ yo be'n, annzɛ parfɛn mun, annzɛ kusu nnɛn kpanngɔ mun, ɔ nin milɛ mun. Afuɛ kwlakwla kɛ be yo i sɔ-ɔ.

²⁵ Salomɔn lɛ sua akpi nnan (4.000) b'ɔ fa kakaklolo mun nin nnɛn kpanngɔ mun sie be nun. Ɔ lɛ nnɛn kpanngɔ akpi-akpi blu-nin-nnyɔn (12.000). Ɔ fali be siesieli klɔ wie b'ɔ ti be siewlɛ'm be su. Yɛ ɔ sieli wie Zerizalɛm, i bɔbɔ wun lɛ.

²⁶ Famiɛn nga be o Efrat nzue'n nuan lele fa ju Filistifuɛ'm be mɛn'n nun'n nin Ezipt anyialiɛ'n su lɔ'n, Salomɔn sie be.

²⁷ Salomɔn yoli man Zerizalɛm lɔ sika'n truli kɛ yɛbuɛ mma sa. Yɛ ɔ yoli man sɛdri waka'n kusu truli kɛ sikomɔr waka'm bɔ be o lika kpɛtɛkplɛɛ nun lɔ'n sa.

²⁸ Salomɔn i nnɛn kpanngɔ'm be nin be fin Ezipt nin mɛn'n kwlaa nun.

Salomɔn i wulɛ'n

²⁹ Salomɔn wun ndɛ'n i onga'n, kɛ ɔ fɛ i i bo bolɛ'n nun lele b'ɔ ´fa ju i agualiɛ'n, ɔ ti klɛwa Natan b'ɔ ti Nyanmiɛn nuan ijɔfuɛ'n i fluwa'n nun. Ɔ ti klɛwa Asiza b'ɔ fin Silo'n i Nyanmiɛn nuan ndɛ b'ɔ kannin'n i fluwa'n nun. Ɔ ti klɛwa Zeɛdo b'ɔ ti Nyanmiɛn nuan ijɔfuɛ'n i aolia nun ninnge b'ɔ wunnin i'n b'ɔ o fluwa'n nun'n nun. Fluwa kasiɛn bɔ be fin i ndɛ kanlɛ icra'n yɛ'n, ɔ kan Zeroboam b'ɔ ti Nɛbat wa'n i wun ndɛ.

³⁰ Salomɔn sieli Izraɛl mɛn wunmuan'n afuɛ ablanan.

³¹ Kɛ ɔ wuli'n, be sieli i David b'ɔ ti i si'n i klɔ lɔ. I wa Rɔbɔam yɛ ɔ sinnin i osu-ɔ.