2 Be Nyoliɛ 3 - NYANMIƐN NDƐ'N 1998

Nyanmiɛn i sua'n i kplanlɛ

¹ Salomɔn boli Anannganman i sua'n kplanlɛ bo Moriza oka'n b'ɔ o Zerizalɛm lɛ'n su. Lɛ yɛ Anannganman fɛli i wun kleli Salomɔn i si David laa nin-ɔn. Lɛ yɛ David siesieli lika Ɔrnan b'ɔ ti Zɛbisfuɛ'n i asiɛ'n su nin-ɔn .

² Kɛ Salomɔn yoli famiɛn'n, i afuɛ nnan'n su yɛ ɔ boli sua'n i kplanlɛ bo-ɔ. Afuɛ sɔ'n i anglo nnyɔn'n su'n i le nnyɔn'n su yɛ ɔ boli i bo-ɔ.

³ Nyanmiɛn i sua'n, i tɛnndɛn nun bɔ Salomɔn kleli'n ti mɛtri ablasan, yɛ i tɛtrɛ nun'n ti mɛtri blu.

⁴ Ala b'ɔ o sua'n nyrun lɛ'n, i tɛnndɛn nun'n ti mɛtri blu kɛ sua'n i tɛtrɛ nun'n sa, yɛ i nglo-nglo su'n ti mɛtri ablesiɛn. Sua'n i klun lɔ'n kwlaa ti sika ɔkwlɛ jrɛiin.

⁵ Nyanmiɛn i sua'n i sua ba danfuɛ'n, be fali siprɛs waka yɛ be fa katali i talɛ'n su-ɔ, kpɛkuun be kloli sika ɔkwlɛ'n i kpakpafuɛ'm be guɛli i wun. Yɛ be yoli nun mme nnya nin jrɔkɔ kanngan'm be nzɔliɛ mun.

⁶ Be fali yɛbuɛ kpakpa mun siesieli talɛ'n wun ekun fa yoli i klanman. Sika ɔkwlɛ nga be fa dili junman sɔ'n, be nin i fin Parvaim.

⁷ Sua wunmuan'n, nin i janvlɛ mun, nin i anuan nun lɛ'n, nin i talɛ mun, nin i anuan mun, be kloli sika ɔkwlɛ be guɛli i kwlaa sɔ'n wun. Be yoli anz nga be nian Nyanmiɛn i ninnge'm be su'n be nzɔliɛ talɛ'm be su.

⁸ Be yoli Nyanmiɛn i lika kpa tra su'n. I tɛnndɛn nun'n nin sua'n i tɛtrɛ nun'n sɛ, ɔ ti mɛtri blu. Yɛ i tɛtrɛ nun'n ti mɛtri blu. Sika ɔkwlɛ nga be fa yoli i klun lɔ'n ti sika ɔkwlɛ kpafuɛ'n wie. Ɔ ti tɔnun ablaɔn.

⁹ Sika ɔkwlɛ yɛ be fa yoli kpɛngbɛ mun-ɔn, sika sɔ'n ti kilo bue. Nglo sua'm be nun ti sika ɔkwlɛ wie.

¹⁰ Be yoli anz sɔ'm be nzɔliɛ nnyɔn. Be kloli sika ɔkwlɛ guali bé wun. Yɛ be fa be sieli Nyanmiɛn i lika kpa tra su'n nun.

¹¹ Anz sɔ'n be ndɛwa'n kwlakwla ti mɛtri blu. Kun i ndɛwa'n kun ti mɛtri nnyɔn nin sin, ɔ to talɛ'n. I ndɛwa'n kun ekun ti mɛtri nnyɔn nin sin, ɔ to anz nnyɔn su'n i ndɛwa liɛ'n.

¹² I kusu i ndɛwa'n kun ti mɛtri nnyɔn nin sin, ɔ to talɛ'n, i ndɛwa'n kun ekun ti mɛtri nnyɔn nin sin, ɔ to kun'n i liɛ'n.

¹³ Anz'm be ndɛwa'm be nun ti tinngɛwa. I kwlakwla'n ti mɛtri blu. Anz'm be jin nglo, bé nyin kaci sua'n su wa.

¹⁴ Be fali lɛn mma plili be yoli tannin dan kun. Be wlɛli i ble nzue-nzue, nin ɔkwlɛ kankankan, ɔ nin ɔkwlɛ youun. Be yoli anz'm be nzɔliɛ tannin sɔ'n su.

Sua ja bɔ be ti aaba'n, ɔ nin Nyanmiɛn sɔwlɛ'n

¹⁵ Be yoli like mlomlo nnyɔn sua'n i nyrun lɛ. Be nglo-nglo su'n ti mɛtri blu-nin-nso. Yɛ be yoli like gbagblagba nnyɔn bé ti su lɔ. Be nglo-nglo su'n ti mɛtri nnyɔn nin sin.

¹⁶ Be yoli jrɔkɔ kanngan mun kɛ nga be o sua'n nun lɔ'n sa. Be fa be sieli like mlomlo'm be su nglo lɔ, kpɛkuun be yoli like kɛ grenadie mma sa sɔ ya. Be fa be sendeli jrɔkɔ'm be su.

¹⁷ Be kplannin like mlomlo nnyɔn sɔ mun Nyanmiɛn i sua'n nyrun lɛ, kun wo fama su, yɛ kun wo bɛ su. Salomɔn tɔnnin fama su liɛ'n i dunman kɛ Zakɛn bɔ i bo'n yɛlɛ kɛ Nyanmiɛn man wunmiɛn. Ɔ tɔnnin bɛ su liɛ'n i dunman kɛ Bɔaz bɔ i bo'n yɛlɛ kɛ Nyanmiɛn nun yɛ wunmiɛn'n wo-ɔ.