2 Be Nyoliɛ 2 - NYANMIƐN NDƐ'N 1998

¹ Salomɔn fali sran akpi-akpi ableso (70.000) kɛ be yo trɔ suafuɛ, ɔ fali sran akpi-akpi ablaɔcuɛ (80.000) kɛ be sɛ yɛbuɛ oka'm be su, yɛ ɔ fali sran akpi nsan sran ya nsiɛn (3.600) kɛ be nian junman'n su.

² Ɔ sunmannin sran Iram b'ɔ ti Tir famiɛn'n sin kɛ be ko se i kɛ: «Like nga a yoli mannin min si David'n, yo i kunngba'n wie man min. Sɛdri waka nga a kpɛ blɛli i b'ɔ fa kplɛnnin i sua'n, kpɛ i sɔ blɛ min wie.

³ N klo kɛ n kplan sua m ´man Anannganman min Nyanmiɛn'n. Sua sɔ'n ´yo i liɛ mlɔnmlɔn. I liɛ'n, be ´yra ansans be ´mɛn i, be ´fa kpaun nga be fa sie i nyrun blɛ'n kwlaa'n be ´fa sie i nyrun, yɛ be ´yi tɛ nga be yra be nnɛn'n kɔlikɔli'n. Be ´yi tɛ sɔ mun nglɛmun nin nnɔsua, ɔ nin wunmiɛn-delɛ-cɛn'm be nun, ɔ nin anglo le kun, ɔ nin i bɔbɔ Anannganman e Nyanmiɛn'n i cɛn nga be di'n be nun. Mmla'n kun kɛn i kɛ Izraɛlfuɛ'm be `yo sa sɔ mun tititi.

⁴ Sua nga n ´kplan'n, ɔ ´yo sua dan, afin e Nyanmiɛn'n i dan tra like nga be su be'n be kwlaa.

⁵ Sran fi kwla kplan-man i wun su sua mɛn-mɛn i, afin nyanmiɛn ng'ɔ nannan nglo lɔ lɛ yɛ'n bɔbɔ ti kaan, ɔ sɔn-man nun bɔ ngbɛn! ?Wan yɛlɛ min bɔ n kwla kplan sua m ´mɛn i-ɔ? Ansans yrawlɛ kan yɛ n ´kwla kplan mɛn i-ɔ.

⁶ Nan i ti'n, blɛ min ajuin difuɛ kun b'ɔ si sika ɔkwlɛ, nin jɛtɛ ufue, nin aaba, ɔ nin blalɛ'n be su junman di kpa'n. Tannin nga be wla be ɔkwlɛ kankankan'n annzɛ ɔkwlɛ youun'n nin ble nzue-nzue'n, man ɔ yo sran b'ɔ si be junman'n di ekun, yɛ man ɔ si ninnge'm be nzɔliɛ'm be yi. I liɛ'n, min ajuin difuɛ liɛ nga min si David flɛli be'n, ɔ nin be be ´di junman. E nin wie mun yɛ e o Zerizalɛm wa-a, yɛ wie'm be o Zida mɛn'n i lika uflɛ.

⁷ Fa sɛdri waka, nin siprɛs waka, ɔ nin santal waka Liban mɛn'n nun lɔ blɛ min, afin n si kɛ ɔ sufuɛ'm be si Liban lɔ waka'n i kpɛ kpa. Min sufuɛ'm be ´ko uka ɔ liɛ mun.

⁸ Man be kpɛ waka'n kpanngban kpa blɛ min, afin sua nga n waan n ´kplan'n, ɔ ´yo dan, yɛ i kunngba'n ɔ ´yo klanman.

⁹ Ɔ sufuɛ nga be ´kpɛ waka'n, m ´man be ble mma tɔnun akpi nsiɛn (6.000), nin ɔrz tɔnun akpi nsiɛn (6.000), nin nzan litri ya mɔcuɛ, yɛ ngo litri ya mɔcuɛ.»

¹⁰ Iram b'ɔ ti Tir famiɛn'n klɛli fluwa fa ko tɛli Salomɔn su kɛ: «Anannganman klo i nvle'n, i ti yɛ ɔ fali wɔ yoli famiɛn-ɔn.

¹¹ N la Anannganman b'ɔ ti Izraɛl Nyanmiɛn'n, b'ɔ yili nglo nin asiɛ'n i ase, afin ɔ man famiɛn David wuli ba kun b'ɔ lɛ akunndan, b'ɔ si ngwlɛlɛ, b'ɔ si sa, b'ɔ wa kplan sua kun man Anannganman, b'ɔ wa kplɛn i bɔbɔ i famiɛn sua kun.

¹² Ajuin difuɛ kun yɛ n ´fa blɛ wɔ yɛ. Ɔ si junman kpa. Be flɛ i Iram-Abi.

¹³ Dan akpasua su bla kun nin Tir bian kun bé wa-a. Sika ɔkwlɛ, nin jɛtɛ ufue, nin aaba, nin blalɛ, nin yɛbuɛ, nin waka, ɔ nin tannin nga be wlɛ i ɔkwlɛ kankankan'n, ɔ nin nga be wlɛ i ble nzue-nzue'n, ɔ nin tannin nga be fa lɛn mma plili be wu'n, ɔ si be junman'n di. Ninnge'm be nzɔliɛ nga be yo'n, ɔ si i wafa'n kwlaa yo. Junman ng'ɔ ti ajuin dilɛ liɛ'n, i kwlaa nga be fa mɛn i'n, ɔ ´si i yo. Wɔ ajuin difuɛ mun nin ɔ si famiɛn David i liɛ ng'ɔ kpali be'n, ɔ nin be ´kwla di junman.

¹⁴ I ti'n, nannan, ble nin ɔrz, nin ngo, ɔ nin nzan nga a kannin be ndɛ'n, fa blɛ ye.

¹⁵ E kusu, Liban wa waka ng'ɔ ko ju wɔ'n, e ´kpɛ i kwlaa e ´cici e ´guɛ i jenvie'n su e ´blɛ wɔ Zafo lɛ, kpɛkuun ɔ sran'm be su fa kɔ Zerizalɛm.»

¹⁶ Aofuɛ nga be o Izraɛl mɛn'n nun'n, bɔ David kali be'n, Salomɔn kali be kwlaa'n ekun. Be ti sran akpi-akpi ya sran akpi-akpi ablenun-nin-nsan sran ya nsiɛn (153.600).

¹⁷ Ɔ kpali be nun sran akpi-akpi ableso (70.000) kɛ be yo trɔ suafuɛ, ɔ fali akpi-akpi ablaɔcuɛ (80.000) kɛ be sɛ yɛbuɛ oka'm be su, yɛ akpi nsan sran ya nsiɛn (3.600) kɛ be nian junman bɔ be kwlaa sɔ'm be di'n su.