1 Samiɛl 8 - NYANMIƐN NDƐ'N 1998

Izraɛlfuɛ'm be waan be `sie be su famiɛn

¹ Kɛ Samiɛl yoli oke'n, ɔ fɛli i mma yasua mun sieli Izraɛl nvle'n su kpɛn.

² I wa klikli'n be flɛ i Zoɛl, i nnyɔn su'n be flɛ i Abiza. Be tran Beɛr-Seba, be ti jɔlɛ difuɛ.

³ Sika klolɛ'n ti, ba sɔ'm b'a nanti-man kɛ bé si sa. Be nga be man be like'n, be yɛ be bu be ndɛ klanman-an.

⁴ Yɛ Izraɛl kpɛnngbɛn'm be sin yiali nan b'a ba Samiɛl i wun wunlɛ Rama lɛ.

⁵ Be wa seli i kɛ: «Wɔ yɛ w'a yo kpɛnngbɛn yɛ. Ɔ mma'm be kusu be nanti-man kpa kɛ wɔ sa. I sɔ'n ti, kunndɛ famiɛn kun man ye, man ɔ sie ye kɛ nvle kun nga'm be liɛ'n sa .»

⁶ Kɛ be seli Samiɛl kɛ ɔ kunndɛ famiɛn sie bé su'n, ɔ'a yo-mɛn i fɛ. Ɔ srɛli i ti Nyanmiɛn.

⁷ Anannganman seli Samiɛl kɛ: «Tie ndɛ nga be kan'n, nian i kwlakwla'n su yo, afin nán wɔ yɛ be yi wɔ blo-ɔ, min yɛ be yi min blo-ɔ. Afin be klo-man kɛ n yo be famiɛn kun.

⁸ Kɛ ɔ fin cɛn bɔ n fali be Ezipt mɛn'n nun n bali'n, like kunngba nga be fa yo min'n yɛ be fa yo wɔ-ɔ. Be yaci min lɛ be sɔ like uflɛ mun.

⁹ I sɔ'n ti'n, nian nga be usa wɔ'n su, yo, sanngɛ kan sa nga famiɛn sɔ'n ɔ wa fa wla be nun'n i weiin kle be.»

Sa nga famiɛn ɔ wa fa wla Izraɛlfuɛ'm be nun'n

¹⁰ Samiɛl kannin sa nga Anannganman kan kleli i'n i kwlaa kleli be nga be kunndɛ famiɛn'n.

¹¹ Ɔ seli be kɛ: «Famiɛn ng'ɔ wa sie amun'n, sa ng'ɔ wa fa yo amun'n yɛ. Ɔ ´fa amun mma'm be sonja kɛ be tinngɛ i kakaklolo mun, nan be fu i nnɛn kpanngɔ'm bé su. Be wie'm be ´wanndi dun mmua i bɔbɔ i kakaklolo'n i nyrun.

¹² Ɔ ´fa wie mun yo i sonja akpi su kpɛn annzɛ sonja ablenun su kpɛn. Wie'm be kusu be ´tutu i lika, be ´ti i fie'n su ninnge mun. Be wie'm be ´yo i alɛ ninnge nin i kakaklolo'm bé wun ninnge mun.

¹³ Ɔ ´fa amun mma mmla mun ´fa yo parfɛn yifuɛ. Wie'm be ´tɔn aliɛ, wie'm be ´tɔn kpaun.

¹⁴ Ɔ ´de amun fie kpakpa mun nin amun vinyi fie mun, ɔ nin amun olivie fie mun, ɔ ´fa mɛn i sran mun.

¹⁵ Ɔ ´de amun fie'm bé su ninnge'm be blusu'n, ɔ ´fa mɛn i sufuɛ wie mun ekun.

¹⁶ Ɔ ´fa amun kanga yasua mun, nin amun kanga bla mun, nin amun mma gbanflɛn nga be kwla junman di'n, ɔ nin amun aflunmun mun, ɔ ´fa be kɛ be di i junman liɛ'n.

¹⁷ Ɔ ´fa amun bua annzɛ boli'm be blusu'n. E `kpɛ kpo e `se kɛ, amun ´yo i kanga.

¹⁸ Cɛn nga amun wa sun flɛ Anannganman amun famiɛn nga amun bɔbɔ amun kunndɛli i'n, i dunman nun ti'n, Anannganman su tɛ-man amun su.»

¹⁹ Izraɛlfuɛ'm b'a tie-man Samiɛl nuan ndɛ'n. Be waan: «E ndɛ nun-man nun! Man e famiɛn man ɔ sie ye

²⁰ kɛ nvle kun nga'm be liɛ'n sa. I liɛ'n, e famiɛn'n ɔ ´di e jɔlɛ mun man ye. Kɛ e ´kun alɛ'n, ɔ ´dun mmua e nyrun.»

²¹ Samiɛl sieli i su tieli ndɛ nga Izraɛlfuɛ'm be kannin'n. Ɔ kan kleli Anannganman.

²² Anannganman seli Samiɛl kɛ: «Like nga be kunndɛ'n, fa man be. Man be famiɛn kun man ɔ sie be.» Yɛ Samiɛl seli Izraɛlfuɛ'm be kɛ: «Amun `sa amun sin wɔ amun klɔ'm bé su.»