1 Samiɛl 13 - NYANMIƐN NDƐ'N 1998

Sail i fɔnlɛ

¹ Kɛ Sail dili afuɛ … yɛ be sieli i famiɛn nin-ɔn, ɔ yoli famiɛn lele afuɛ … nnyɔn Izraɛl mɛn'n nun .

² Ɔ kpali sonja akpi nsan (3.000) Izraɛlfuɛ'm be nun. Be nun akpi nnyɔn (2.000) be o i sa nun Mikmas lɔ nin Betɛl oka-oka'n nun lɔ. Yɛ akpi kun kusu o Zonatan sa nun Gibea klɔ b'ɔ o Bɛnzamɛn akpasua'n su lɔ'n i su lɔ. Sail mannin be nga'm be atin kɛ be wɔ be tranwlɛ.

³ Le kun Zonatan kunnin Filistifuɛ'm be siefuɛ ng'ɔ tran Gɛba'n. Filistifuɛ'm be tili. Sail kusu boli awɛ sinnin mɛn wunmuan'n nun. I waan: «Man Ebre'm be ti.»

⁴ Izraɛlfuɛ'm be kwlakwla be tili i kɛ Sail kunnin Filistifuɛ'm be siefuɛ'n nan Filistifuɛ'm be nin Izraɛl b'a nyɛn. Yɛ Izraɛl sonja'm be kwlakwla be yiali Sail wun Gilgal lɔ-ɔ.

⁵ Filistifuɛ'm be kusu be yiali kɛ be nin Izraɛlfuɛ'm be ´kun. Bé sa nun kakaklolo'n ti akpi-akpi ablasan (30.000), nnɛn kpanngɔ fufuɛ'm be ti akpi nsiɛn (6.000), sonja'm be ka be-ɔ, ɔ ka-man, be sɔnnin kɛ jenvie nuan aunnyan sa. Be bali be wa boli be nanmue Mikmas lɛ. Mikmas klɔ'n o Bɛt-Avɛn i bue ng'ɔ kpɛ wia afiliɛ lɔ nun.

⁶ Izraɛlfuɛ'm be ´nian-an, Filistifuɛ mun b'a mantan be koko kpa, kɛ be wun-man bé wun fɛ'n, be ko fiali yɛbuɛ buɛ'm be nun, wie'm be ko fiali susrɛ'm be nun, nin yɛbuɛ dandan'm be afiɛn, nin lika nga be sisili bé wun'n be nun, ɔ nin nzue gbo'm be nun lɔ.

⁷ Ebre wie'm be kpɛli Zurdɛn'n be ɔli Gad nin Galaad nvle'n nun. Kɛ ɔ ´yo sɔ'n, wuun Sail tɛ o Gilgal, be nga be o i sa nun b'a wie wu kpo.

⁸ Sail minndɛli cɛn nso nga Samiɛl kleli'n. Nán balɛ yɛ Samiɛl ko ba Gilgal-ɔ. Sran'm be su bo sanndi Sail wun.

⁹ Yɛ Sail waan: «Amun `fa nnɛn nga be fa yi tɛ nga be yrɛ i nnɛn'n kɔlikɔli'n, ɔ nin nnɛn nga be fa be yi bo kun yolɛ i su tɛ'n be bla.» Yɛ Sail yili tɛ nga be yrɛ i nnɛn'n kɔlikɔli nin-ɔn.

¹⁰ Kɛ ɔ wa wie tɛ i yi'n, kpɛkuun Samiɛl ɔ'a bo nun. Sail ɔli kɛ ɔ ´ko kpɛ i atin nan ɔ ´yo i like.

¹¹ Yɛ Samiɛl usɛli i kɛ: «?Nguɛ yɛlɛ nga a yoli i lɛ'n?» Sail waan: «N ´nian-an, sran'm be su bo sanndi mín wun. Ɔ kusu cɛn nga a kleli'n juli, n wun-man wɔ, kusu Filistifuɛ'm b'a yia Mikmas lɔ.

¹² Yɛ n waan: ‹Mín wun nian yo-man Anannganman fɛ yɛ Filistifuɛ'm be su wa to min Gilgal wa yɛ. Yɛ n waan: B'ɔ ti sɔ'n, n ´yi tɛ'n.› »

¹³ Samiɛl seli Sail kɛ: «A yoli sinnzin, w'a fa-man Anannganman ɔ Nyanmiɛn'n i nuan ndɛ'n su. Ɔ man klikli nun i waan wuun, ɔ osufuɛ mun yɛ be tran Izraɛl nvle'n su anannganman-an.

¹⁴ Sanngɛ sa nga a yo i yɛ'n ti, ɔ sielɛ'n su cɛ-man kun. Anannganman ɔ'a wun sran kun b'ɔ ti i anwlɛn su sran. I yɛ ɔ wa fɛ i kɛ ɔ sie i nvle nin-ɔn, afin w'a fa-man ndɛ nga Anannganman kan kleli wɔ'n su.»

¹⁵ Yɛ Samiɛl fɛli i Gilgal lɛ ɔli i bue liɛ'n su lɔ-ɔ. Sonja nga be kali lɛ'n, be ko sunmannin Sail. Be fɛli i Gilgal lɛ be ɔli Gibea b'ɔ o Bɛnzamɛn i akpasua'n su lɔ'n su. Sail kali sonja mun. Be ti kɔe ya nsiɛn.

¹⁶ Sail nin i wa Zonatan ɔ nin sran nga be kɛli i wun lɛ'n be trannin Gɛba b'ɔ o Bɛnzamɛn akpasua'n su'n su. Filistifuɛ'm be kusu be boli be nanmue'n Mikmas lɔ.

¹⁷ Filistifuɛ'm be sonja'm be nun kpakpa'm be kpacikpacili bé wun nun akpasua nsan: i akpasua kun fali Ofra atin'n su, ɔ o Sial.

¹⁸ Akpasua i nnyɔn su'n fali Bɛt-Ɔrɔn atin'n su. Akpasua nsan su fali awɛ su atin'n. Atin sɔ'n wo kongo nga be flɛ i kɛ gboklo'm be kongo'n i ti su nglo yɛ ɔ mantan aawlɛ flɛnnɛn'n.

¹⁹ Kɛ ɔ ´yo sɔ'n, wuun be nyan-man blalɛ bofuɛ bɔ kun sa Izraɛl nvle wunmuan'n nun. Filistifuɛ'm be waan: «Nán e man Ebre'm be atin kɛ be bo tokofi annzɛ cua.»

²⁰ Izraɛlfuɛ'm be kwlakwla be ko si be saru'm be tokpo mun, be ko si be sue nin be kpɛliɛ mun, ɔ nin be laliɛ mun Filistifuɛ'm bé wun lɔ.

²¹ Kɛ be si saru tokpo kun annzɛ sue kun annzɛ tokpo kun annzɛ kpɛliɛ kun, yɛ kɛ be siesie nannin kankanlɛ kpɔnman kun ye'n, be tua sika gram mɔcuɛ.

²² Ɔ man kɛ alɛ kunlɛ cɛn'n juli'n, sran nga be o Sail nin Zonatan bé sa nun'n be wie fi lɛ-man tokofi annzɛ cua, san Sail nin i wa Zonatan be cɛ yɛ be lɛ wie-ɔ.

²³ Filistifuɛ'm be sonja akpasua kun wa sali Mikmas oka nnyɔn'm be afiɛn nun.