1 Piɛr 1 - NYANMIƐN NDƐ'N 1998

Sran ng'ɔ klɛ fluwa'n ko mannin be'n

¹ M Piɛr bɔ Jésus-Krist sunmannin min'n, n ´klɛ fluwa nga blɛ amun bɔ Nyanmiɛn fali amun bɔ an sanndili'n, bɔ an ti aofuɛ Pɔnt, nin Galasi, nin Kapadɔs, nin Azi, nin Bitini mɛn nun'n.

² E Si Nyanmiɛn fali amun, afin ɔ dun mmua buli i akunndan sɔ nan i Wawɛ'n ti, an `kaci i liɛ nan amún nyin `yi Jésus-Krist, yɛ i mmoja'n ti amún wun sa'n `wie. Nyanmiɛn man an nyan ye titi, yɛ man amún wun jɔ amun fɔuun!

E wla o su kɛ e ´nyan é ti

³ E Min Jésus-Krist i Si Nyanmiɛn i kwla o! I aunnvuɛ silɛ dan'n ti, ɔ wuli ye ekun, ɔ man é wla o like bɔ e si weiin kpa kɛ ɔ o lɔ'n su Jésus-Krist i cɛnlɛ'n ti.

⁴ Ɔ wuli ye sɔ nan e `nyan like kpa ng'ɔ sieli i nyanmiɛn su lɔ'n. Like sɔ'n kwla saci-man, ɔ yo-man fiɛn, yɛ ɔ mlin-man.

⁵ Nyanmiɛn b'ɔ kwla like'n kwlaa yo'n ɔ sieli i lɔ sieli amun i su bɔ an lafi'n ti, ɔ ´nian amun su lele amun ´nyan amún ti, afin ɔ'a dun mmua sie i kɛ mɛn'n i awieliɛ ɔ ´yi amún ti nyanlɛ sɔ'n i nglo.

⁶ I sɔ'n ti, kannzɛ kɛ e ´se yɛ'n sa fanunfanun b'ɔ tɔ amun su'n ti amún wla bo le nnyɔn kun'n, man amun klun jɔ. Sa sɔ'n b'ɔ tɔ amún su'n, ɔ ti i su,

⁷ i sɔ'n nun yɛ be ´wun kɛ an lafi Nyanmiɛn su kpa-a. Sika ɔkwlɛ bɔ cɛn wie ɔ ´saci'n, be klo i nian. Amun kusu kɛ an lafi Nyanmiɛn su'n, an ti kpa tra sika ɔkwlɛ, sanngɛ san be ´sa amun nian. Yɛ kɛ be wun kɛ an lafi i su kpa'n, cɛn nga Jésus-Krist wa yi i wun nglo'n, be ´manman amun, be ´yi amun ayɛ, yɛ be ´yo amun mo.

⁸ Amu'an wun-mɛn i le, sanngɛ an klo i. Kannzɛ an nian wun-mɛn i'n, an lafi i su, ɔ man amun klun jɔ dan kpa, ɔ man an wun-man ndɛ nga an kan-an.

⁹ Afin kɛ an lafi Nyanmiɛn su'n, i agualiɛ amun ´nyan amún ti.

¹⁰ Nyanmiɛn nuan ijɔfuɛ bɔ be kannin ye dan nga Nyanmiɛn wa yo amun'n i ndɛ'n, be bɔbɔ be buli ti nyanlɛ wafa sɔ'n i akunndan kpa, be kunndɛli kɛ be ´wun i wlɛ weiin kpa.

¹¹ Krist Wawɛ'n wo Nyanmiɛn nuan ijɔfuɛ sɔ'm bé su. Krist i nyrɛnnɛn wafa ng'ɔ wa wun i'n, ɔ nin i manmanlɛ nga kɛ ɔ ko wun nyrɛnnɛn'n be ´fa mɛnmɛn i'n, ɔ kan i ndɛ kleli be. Be miannin bé nyin kɛ be ´si sa sɔ'n i blɛ'n ɔ nin i wafa ng'ɔ ´yo su'n.

¹² Nyanmiɛn kan kleli be kɛ i ndɛ ng'ɔ fa wla bé nuan kɛ be kan'n ɔ ti-man be bɔbɔ be liɛ, sanngɛ amun liɛ-ɔ. Be nga be kan jasin fɛ'n Nyanmiɛn Wawɛ b'ɔ sunmɛnnin i'n i fanngan nun'n, ndɛ sɔ'n yɛ be kan kleli amun nin-ɔn. Anz'm be bɔbɔ be klo kɛ be ´wun sa sɔ'm be wlɛ.

Ɔ seli be kɛ man be nzuɛn'n fa Nyanmiɛn liɛ'n

¹³ I sɔ'n ti an `bu akunndan, an `nian amun wun su, man amún nyin tran like nga cɛn nga Jésus-Krist ɔ wa yi i wun nglo'n ɔ ´fa man amun'n su kpa.

¹⁴ Man amún nyin yi Nyanmiɛn, like nga i nun bɔ an nian wun-man sa wlɛ'n amún nyin blo be su bɔ an yoli be'n, nán an yo be kun.

¹⁵ Nyanmiɛn b'ɔ flɛli amun'n, i nzuɛn'n nin klɔ sran liɛ'n ti-man kun, man amun nzuɛn liɛ'n kusu fɛ i liɛ'n sa'n kwlaa nun.

¹⁶ Afin be klɛli i kɛ: «Min nzuɛn'n nin klɔ sran liɛ'n ti-man kun, i sɔ'n ti man amun nzuɛn liɛ'n fa min liɛ'n .»

¹⁷ An flɛ Nyanmiɛn b'ɔ nian-man sran nyrun yɛ ɔ di jɔlɛ'n, sanngɛ ndɛ sin yɛ ɔ jran di jɔlɛ'n, amun Si. I sɔ'n ti, kɛ an tɛ wo asiɛ'n su wa'n, an `yo sa ng'ɔ kle kɛ amún nyin yi i'n.

¹⁸ Afin an si like nga be fa toli amun'n, b'ɔ man an nyan amún ti sa ngbɛn-ngbɛn nga amun nannan'm be fa kleli amun'n be nun'n. Nán like b'ɔ saci-ɔ, nán jɛtɛ ufue-ɔ, yɛ nán sika ɔkwlɛ-ɔ.

¹⁹ Sanngɛ Krist b'ɔ ti kɛ bua b'ɔ wa kpɛ cro sa'n bɔ lɛ fi nun-mɛn i wun'n, i mmoja'n b'ɔ ti kpa'n yɛ be fa toli amún ti-ɔ.

²⁰ Nyanmiɛn dun mmua fɛ i sieli i sin nan ɔ'a yi mɛn'n, yɛ amun ti'n, kɛ y'a ju mɛn'n i bue nuan'n, ɔ'a yi i nglo.

²¹ Nyanmiɛn b'ɔ cɛnnin i'n, b'ɔ man ɔ nyannin nyrun'n i ti yɛ amu'an lafi i su-ɔ, ɔ man Nyanmiɛn su yɛ amu'an lafi-ɔ, i su yɛ amu'an fa amún wla'n b'a gua-a.

²² Kɛ an fali ndɛ nanwlɛ'n su'n, bɔ amún wun sa'n wieli'n, ɔ man an klo-man amun niaan Kristfuɛ mun amún nuan bui su. I sɔ'n ti, an `klo amun wun kpa, an `tu amun klun yo sa ng'ɔ kle kɛ an klo amun wun'n.

²³ Nyanmiɛn ndɛ b'ɔ kaci-man'n, b'ɔ o lɛ titi'n ti, Nyanmiɛn wuli amun uflɛ, ɔ man amún si'n ti-man sran b'ɔ wu-ɔ, ɔ o lɛ tititi.

²⁴ Afin be klɛli i Nyanmiɛn Ndɛ'n nun kɛ: «Sran'm be kwlaa be ti kɛ ijre sa, yɛ be nyrun nga be lɛ i'n ti kɛ ijre'n i nyrɛ'n sa. Ijre'n wu, yɛ i nyrɛ'n gua.

²⁵ Sanngɛ e Min'n i ndɛ'n wo lɛ tititi .» Ndɛ sɔ'n yɛ kɛ be ´kan jasin fɛ'n be kan kleli amun nin-ɔn.