1 Korɛntfuɛ Mun 8 - NYANMIƐN NDƐ'N 1998

Amuɛn nnɛn'n

¹ Nga b'ɔ ti amuɛn nnɛn'n i ndɛ liɛ'n, e si kɛ e kwlaa e si i. Sanngɛ sa silɛ sɔ'n man sran tu i wun, sanngɛ sran klolɛ'n ɔ man sran yo sran.

² Sɛ sran kun bu i wun kɛ ɔ wun sa wlɛ'n, wuun ɔ su lɛkɛ i wun, ɔ nian bu-mɛn i bue kaan sa.

³ Sanngɛ sran ng'ɔ klo Nyanmiɛn'n, Nyanmiɛn si i sɔfuɛ'n.

⁴ I sɔ'n ti'n, nga b'ɔ ti amuɛn nnɛn'n i dilɛ i wun ndɛ liɛ'n, e si kɛ amuɛn'n ti-man like nanwlɛ, yɛ kusu e si kɛ Nyanmiɛn ti kunngba cɛ .

⁵ Kannzɛ be se kɛ asiɛ'n su wa nin nyanmiɛn su lɔ ninnge'm bɔ be sɔ be b'ɔ sie be'n be sɔnnin'n,

⁶ sanngɛ e liɛ'n, e Si Nyanmiɛn ti kunngba cɛ. I yɛ ɔ yili like'n kwlaa-a, i ti yɛ e o lɛ-ɔ. Yɛ e Min'n ti kunngba, yɛlɛ Jésus-Krist, i yɛ Nyanmiɛn man ɔ yili like'n kwlaa-a, i dunman nun yɛ man e o lɛ-ɔ .

⁷ Sanngɛ sran ngba si-mɛn i sɔ. Afin amuɛn ndɛ'n tɛ o wie'm be klun, ɔ man kɛ be ´di nnɛn'n, ɔ yo be kɛ amuɛn nnɛn yɛ be su di sa. Kɛ be wun-mɛn i wlɛ kpa'n ti, be klun titi be.

⁸ Nán aliɛ ti yɛ Nyanmiɛn klun jɔ e wun-ɔn. Sɛ e di like o, sɛ e di-man like o, Nyanmiɛn klun b'ɔ jɔ e wun'n, ɔ kaci-man.

⁹ Sanngɛ kusu an `nian amún wun kpa, nán man like nga an wun i wlɛ kɛ sɛ an yo-ɔ ɔ ti-man sa fi'n, ɔ saci be bɔ be wun-mɛn i wlɛ kpa'n.

¹⁰ ?Afin sɛ sran wie b'ɔ nian wun-mɛn i wlɛ kpa'n ɔ wun kɛ ɔ bɔ a wun i wlɛ'n a o amuɛn sua'n nun a su di like'n, i kusu ko di-man amuɛn nnɛn sɔ'n wie ɔ dunman nun?

¹¹ Kɛ ɔ ko yo sɔ'n, ɔ́ sa wlɛ wunlɛ sɔ'n man ɔ niaan b'ɔ wun-mɛn i wlɛ bɔ Krist wuli i ti'n ɔ ´mlin!

¹² Kɛ an yo amun niaan bɔ be wun-mɛn i wlɛ'n bé tɛ sɔ'n b'ɔ man be akunndan sanngan'n, Krist yɛ an yo i tɛ sɔ nin-ɔn.

¹³ I sɔ'n ti'n, sɛ nnɛn yɛ n ko di n ko saci min niaan'n, n su di-mɛn i kun le nan m'an saci-man min niaan'n.