1 Korɛntfuɛ Mun 5 - NYANMIƐN NDƐ'N 1998

Bla nin bian kunndɛlɛ i su ndɛ kanlɛ

¹ Be ti i lika'n kwlaa kɛ amu'an fa bla nin bian kunndɛlɛ'n amu'an cici amún ti lele ɔ man amun nun kun a de i si yi'n. Bla kunndɛlɛ wafa sɔ'n, be bɔ be ti-man Kristfuɛ'n bɔbɔ be yo-man .

² Yɛ an fa amun asɔnun'n di amún nuan! Sa sɔ'n ɔ'a yo-man amun ya nan amu'an yi sran ng'ɔ yo sa sɔ'n amun nun!

³ N liɛ'n, kannzɛ n nun-man lɔ'n, sanngɛ min akunndan'n wo lɔ. Sɛ ɔ ti kɛ n wo lɔ'n, wuun e Min Jésus dunman nun m buli sran b'ɔ yoli sa sɔ'n i fɔ ɔ'a cɛ.

⁴ Sɛ an yia e Min Jésus dunman nun'n, n jin amún sin,

⁵ an `fa sran sɔ'n wlɛ Satan sa nun man ɔ saci i wunnɛn'n nan ɔ'a fite nun e Min'n i cɛn'n nun!

⁶ Amún nuan dilɛ sɔ'n ti-mɛn i su! ?An si-man kɛ kpaun ayre kaan'n bɔ be fa guɛ i kpaun nzuɛn'n nun'n yɛ man i wunmuan'n wla-a?

⁷ An `gua kpaun ayre laa'n i ase, nan an yo kpaun uflɛ. Afin an ti kɛ kpaun bɔ b'a gua-man nun kpaun ayre'n sa, yɛ b'a kun Krist b'ɔ ti kɛ e Delɛ-cɛn i bua sa'n.

⁸ Man e di cɛn sɔ'n, sanngɛ kpaun bɔ ayre laa'n wo nun b'ɔ kle klunwi'n nin sa tɛ yolɛ'n, nán man e fa di. Sanngɛ man e fa kpaun bɔ b'a gua-man nun kpaun ayre'n e fa di, i yɛ ɔ kle kpa yolɛ nin nanwlɛ dilɛ nin-ɔn .

⁹ N fluwa laa liɛ'n nun'n, n seli amun kɛ nán man amun nin bla nin bian kunndɛfuɛ mun san nun.

¹⁰ M'an se-man amun kɛ nán amun nin bla nin bian kunndɛfuɛ bɔ be ti-man Kristfuɛ'n, nin be bɔ be de sran like wue kekle su'n, nin be bɔ bé nyin yi-man like'n, nin amuɛn sɔfuɛ mun yɛ nán amun nin be di nin-ɔn. Sɛ ɔ ti sɔ'n, wuun san amun ´jao mɛn'n nun mlɔnmlɔn.

¹¹ Sanngɛ ndɛ nga n klɛ blɛli amun'n yɛlɛ kɛ sɛ sran kun se i wun kɛ ɔ ti e niaan'n b'ɔ ti bla annzɛ bian kunndɛfuɛ'n, annzɛ ɔ ti sran bɔ i nyin yi-man like'n, annzɛ ɔ tɛ sɔ amuɛn'n, annzɛ ɔ ti nzowa kpɛfuɛ, annzɛ ɔ ti nzanboɛfuɛ, annzɛ ɔ de sran like wue kekle su'n, i sɔfuɛ'n yɛ n seli amun kɛ nán amun nin i san nun nin-ɔn, yɛ nán amun nin i di like bɔbɔ.

¹² ?Ɔ yo sɛ yɛ min ndɛ ko tran be bɔ be nin ye ti-man kun'n be ndɛ nun-ɔn? ?Nán be bɔ be nin ye ti kun'n yɛ amun ndɛ tran be ndɛ nun nin-ɔn?

¹³ Be bɔ be nin ye ti-man kun'n, Nyanmiɛn yɛ ɔ nin be lɛ i-ɔ. An `kan sa tɛ yofuɛ'n i bo amun nun lɛ .