1 Korɛntfuɛ Mun 4 - NYANMIƐN NDƐ'N 1998

Sran nga Krist sunmannin be'n

¹ I sɔ'n ti, man sran'm be si kɛ e ti Krist i ukafuɛ bɔ e nian like nga Nyanmiɛn fiɛli i sran'm be nyrun'n be su.

² Kusu sa ng'ɔ ti cinnjin'n, yɛlɛ kɛ sran ng'ɔ nian ninnge su'n, ɔ `yo sran kpa.

³ Sɛ an bu min sɛ o, sɛ jɔlɛ difuɛ'm be bu min sɛ o, n liɛ'n, ɔ ti-man n like fi, nán m bɔbɔ yɛ n di min wun jɔlɛ nin-ɔn.

⁴ N klun ti-man min sa fi nun, sanngɛ nɛ́n i sɔ'n ti yɛ man mín wun sali-ɔ. E Min'n yɛ ɔ ti n jɔlɛ difuɛ-ɔ.

⁵ I sɔ'n ti'n, nán an dun mmua di sran fi jɔlɛ nan blɛ nga be kleli ɔ'a ju. Amun minndɛ kɛ e Min bla'n ka. Afin sa ng'ɔ o nvialiɛ nun bɔ be wun-mɛn i'n, i yɛ man be ´wun i kwlaa-a. Yɛ akunndan ng'ɔ o sran klun'n, ɔ ´yi i kwlaa nglo. Kɛ ɔ ko yo sɔ'n, like nga sran kun yoli'n, i ti Nyanmiɛn ´yo i mo.

⁶ Aniaan mun, kɛ n ´kan ndɛ sɔ'n, m bo min nin Apolɔs e dunman n fa kle amun sa nzɔliɛ, min waan an `nian e liɛ'n su an yo, yɛ ndɛ nga be klɛli'n, an `fa su. Nán an bu i kɛ sran kun ti kpa tra sran kun, bɔ an ´fɛ i di amún nuan-an.

⁷ ?Wan yɛ ɔ se ɔ kɛ a ti kpa tra ɔ wiengu-ɔ? ?Nguɛ yɛ a lɛ i bɔ nán Nyanmiɛn yɛ ɔ mannin wɔ-ɔ? ?Sɛ i yɛ ɔ mannin wɔ'n, nguɛ ti yɛ a fa di ɔ́ nuan kɛ ɔ bɔbɔ ɔ́ sa ti like sa nin-ɔn?

⁸ Kɛ e o yɛ'n, like kwlaa nga an kunndɛ'n, amu'an nyɛn i, amu'an nyan amun wun! An su di famiɛn é sin! Sɛ an di famiɛn'n, ɔ yo e fɛ, man e kusu e di wie!

⁹ Afin m bu i kɛ Nyanmiɛn a yo e bɔ Jésus sunmannin ye'n kɛ e nun-man sran nun sa. Y'a kaci finfinfuɛ sran nin anz'm be nyrun kɛ sran bɔ be su wa kun i sa.

¹⁰ Krist ti y'a kaci sinnglinfuɛ, sanngɛ amun liɛ'n, sran wunmuan bɔ amun nin Krist amu'an kaci'n ti'n, an ti ngwlɛlɛfuɛ! E ti fuɛn, sanngɛ amun liɛ'n, an ti kekle! An lɛ nyrun, sanngɛ e liɛ'n, be bu-man e sran!

¹¹ Lele ndɛ awe nin nzue we tɛ kun ye,

¹² é wun ti kplɛn, be bo ye, e ti lalasinfuɛ, yɛ e di junman e fɛ kpa nan y'a nyan é nuan nun aliɛ. Be kpɛ e nzowa-a e yi man-man be nga be kpɛ e nzowa sɔ'n, muae yɛ e bo man be-ɔ. Be kle e yalɛ-ɔ ɔ sɔn e nun.

¹³ Be saci e dunman-an e tɛ-man su. Sran'm be nyrun y'a kaci kɛ wla sa, e ti kɛ bé ja bo fa sa, lele ndɛ be tɛ bu ye sɔ.

¹⁴ Nán kɛ amún nyin ase gualɛ ti yɛ n klɛ ndɛ sɔ nin-ɔn, sanngɛ amun bɔ an ti n sran kpa'n, amun afɔtuɛ manlɛ ti-ɔ.

¹⁵ Sɛ an lɛ sran akpi blu (10.000) bɔ be kle amun Krist ndɛ'n, sanngɛ amún si'n ti kunngba cɛ, afin jasin fɛ'n bɔ m bo kleli amun'n ti amun nin Krist-Jésus amu'an kaci sran wunmuan, ɔ man n ti amún si.

¹⁶ I sɔ'n ti'n, n ´srɛ amun, an `nian like nga n yo'n su, an `yo.

¹⁷ I ti yɛ man n sunmannin n sran kpa Timote b'ɔ ti Kristfuɛ kpa'n amun wun lɔ nin-ɔn. I yɛ ɔ wa fa wafa nga n fa fa Krist ndɛ'n su'n kpɛn amun wla ekun-ɔn. N kle ninnge sɔ'n asɔnun kwlaa nun.

¹⁸ Amun nun wie mun an wunndun-wunndun amun wun kɛ n su ba-man amun wun lɔ kun sa.

¹⁹ Sanngɛ sɛ Nyanmiɛn di su'n, ɔ cɛ kaan m ´ba amun wun lɔ. Nán be nga be wunndun-wunndun bé wun sɔ'n be ndɛ bɔ be kan'n ngunmin yɛ n wa ti-ɔ, sanngɛ m wa wun be yasua bɔ be ti'n!

²⁰ Afin nán ndɛ bɔ sran kan'n yɛ ɔ fa yi Nyanmiɛn sielɛ'n i nglo-ɔ, sanngɛ sa kekle bɔ be yo'n yɛ ɔ fɛ yi i nglo-ɔ.

²¹ ?An klo kɛ n fa ngble yɛ m bla amun wun lɔ-ɔ annzɛ m bla wɛtɛɛ su b'ɔ kle kɛ n klo amun, onin yɛ an klo-ɔ?