1 Korɛntfuɛ Mun 3 - NYANMIƐN NDƐ'N 1998

Sa nga Nyanmiɛn junman difuɛ'm be yo'n

¹ Aniaan mun, nán ndɛ nga n kan kle be nga Nyanmiɛn Wawɛ'n sie be'n yɛ n kan kle amun-ɔn, sanngɛ ndɛ nga n kan kle be nga be ti-man Kristfuɛ'n, nin be nga bɔ kɛ be yo Kristfuɛ'n be tɛ yo kɛ ba nɔnman sa'n, i kunngba'n yɛ n kan kle amun-ɔn.

² M'an man-man amun aliɛ, afin amun nian kwla-man like di ka, yɛ lele ndɛ kɛ e ´se yɛ'n, amun nian kwlɛ-mɛn i di, nyɔnflɛn yɛ an tɛ nɔn-ɔn ,

³ afin an tɛ yo kɛ sran bɔ be ti-man Kristfuɛ sa. ?Kɛ amún nyin ci amun wiengu bɔ utre wo amun afiɛn'n, an ti-man kɛ sran bɔ be ti-man Kristfuɛ sa? ?Yɛ nán sa nga klɔ sran yo'n yɛ an yo-ɔ?

⁴ ?Kɛ amun nun wie se kɛ: «N liɛ'n, Pɔl liɛ yɛlɛ min,» bɔ wie kusu waan: «M liɛ'n, Apolɔs liɛ yɛlɛ min'n,» nán klɔ sran nyoliɛ kpa yɛ an yo-ɔ?

⁵ ?Wan yɛlɛ Apolɔs? ?Wan yɛlɛ m Pɔl kusu? E ti junman difuɛ bɔ e ndɛ bɔ e kannin'n ti yɛ an lafili Jésus su-ɔ.

⁶ E Min'n mannin e junman ngunmin-ngunmin, sɛ ɔ ti waka-a, min yɛ n tali-ɔ, Apolɔs kusu yɛ ɔ guali su nzue-ɔ, sanngɛ Nyanmiɛn yɛ man ɔ yoli kpa-a.

⁷ I sɔ'n ti, sran ng'ɔ ta'n nin sran ng'ɔ gua su nzue'n be lɛ-man dunman, sanngɛ Nyanmiɛn b'ɔ man ɔ yo kpa'n i yɛ ɔ lɛ dunman nin-ɔn.

⁸ Sran ng'ɔ ta'n nin ng'ɔ gua su nzue'n, be nnyɔn'n be sɛ, kɛ sran kun fa di i junman'n juli'n, Nyanmiɛn ´mɛn i i nuan like.

⁹ Afin e nin Nyanmiɛn yɛ e di junman nin-ɔn. An ti kɛ Nyanmiɛn i fie sa, yɛ an ti kɛ i sua b'ɔ su kplan sa .

¹⁰ Nyanmiɛn klun-ufue'n ti m'an yo kɛ sua kplanfuɛ b'ɔ si sua kplan sa, n wlali sua'n i bo ase, yɛ sran uflɛ su taka su. Sanngɛ man sran ng'ɔ taka su'n, ɔ niɛn i wafa ng'ɔ fa taka su'n i su kpa.

¹¹ Afin sran fi kwla wla-man sua uflɛ bo ase kun san Jésus-Krist bɔ Nyanmiɛn fɛ i wlali sua'n i bo ase laa'n i cɛ.

¹² I sɔ'n ti, sua nga be wlɛ i bo ase'n, sɛ sran wie fa sika ɔkwlɛ o, jɛtɛ ufue o, yɛbuɛ kpakpa o, waka o, ijre o, awie ja o, taka sua i bo sɔ'n su'n,

¹³ like nga sran kun yoli'n be wa wun i. Afin jɔlɛ dilɛ cɛn'n nun'n, sin'n man ɔ ´fite nglo, yɛ like nga sran kun yoli'n be ´fa sin gua su nian.

¹⁴ Sɛ like nga sran kun fa kplannin'n ɔ ka lɛ'n, be ´yo i mo.

¹⁵ Sanngɛ sɛ nga sran kun yoli'n ɔ yra'n, wuun i sa a fua ase. I bɔbɔ yɛ ɔ ´nyɛn i ti-ɔ, sanngɛ ɔ ´yo kɛ ɔ fin sin nun yɛ ɔ'a fite sa.

¹⁶ ?An si-man kɛ an ti Nyanmiɛn i sua bɔ i nun yɛ i Wawɛ'n tran-an ?

¹⁷ Sran ng'ɔ saci Nyanmiɛn i sua'n, ɔ ´saci i sɔfuɛ'n wie, afin Nyanmiɛn i sua'n ti i ngunmin liɛ, amun yɛ an ti sua sɔ nin-ɔn.

¹⁸ Nán man sran fi lɛkɛ i wun, sran ng'ɔ bu i wun kɛ ɔ si sa'n, man ɔ yo i wun sinnglinfuɛ nan ɔ'a kaci ngwlɛlɛfuɛ .

¹⁹ Afin sran'm be ngwlɛlɛ'n bɔ be waan be si i'n, ɔ ti sinnzin Nyanmiɛn nyrun. Afin be klɛli i kɛ: «Ngwlɛlɛfuɛ'm be bɔbɔ be gblɛ bɔ be kpɛ'n yɛ Nyanmiɛn fa tra be-ɔ .»

²⁰ Yɛ be klɛli i ekun kɛ: «E Min'n si ngwlɛlɛfuɛ'm be akunndan'n. Ɔ si kɛ akunndan sɔ'n ti ngbɛn .»

²¹ I sɔ'n ti'n, nán man sran fi fa sran wie di tutre, afin sran nin like'm be kwlaa be ti amun liɛ,

²² Pɔl o, Apolɔs o, Sefas o, mɛn nin o, nguan o, wie o, like nga be o lɛ kɛ e ´se yɛ nin o, like nga be wa ba nin o,

²³ i kwlaa ti amun liɛ, an ti Krist liɛ, yɛ Krist kusu ti Nyanmiɛn liɛ.