1 Korɛntfuɛ Mun 2 - NYANMIƐN NDƐ'N 1998

Krist i waka'n su bobolɛ ndɛ

¹ Aniaan mun, i nun'n bɔ n ɔli amun wun lɔ'n, nán kɛ ijɔlɛ bɔ n si ijɔ annzɛ ngwlɛlɛ bɔ n si i ti yɛ n kannin sa nga Nyanmiɛn fiɛli i sran'm be nyrun'n kleli amun-ɔn.

² Afin n dun mmua buli i akunndan kɛ sɛ n kɔ amun wun lɔ'n, n su kan-man ndɛ fi san Jésus-Krist ɔ nin i waka'n su bɔ be boboli i'n i ndɛ'n cɛ yɛ n ´kan-an.

³ Kɛ n ɔli amun wun lɔ'n, n kwla-man like fi yo, srɛ kun min yɛ mín wun usu min dan kpa.

⁴ Min ijɔlɛ'n nin Nyanmiɛn ndɛ bɔ n kɛnnin i lɔ'n, ɔ'a yo-man ngwlɛlɛ ndɛ bɔ sɛ sran ti-ɔ ɔ fa su-ɔ, sanngɛ ɔ yoli ndɛ b'ɔ yi Nyanmiɛn Wawɛ'n nin i kwlalɛ'n nglo.

⁵ N kɛn i sɔ kleli amun nan amu'an fa-man amún wla a gua-man sran'm be ngwlɛlɛ bɔ be si i'n su, sanngɛ kɛ ɔ yo nan amu'an fa gua Nyanmiɛn i fanngan b'ɔ lɛ i su ti.

Nyanmiɛn i ngwlɛlɛ

⁶ Sanngɛ ngwlɛlɛ ndɛ yɛ e kan kle sran bɔ bé nyin a ti mun-ɔn. Ngwlɛlɛ sɔ'n fin-man e blɛ su, yɛ ɔ fin-man e wlengbi mun bɔ be blɛ liɛ'n ɔ wa wie'n.

⁷ Nyanmiɛn i ngwlɛlɛ b'ɔ yi-mɛn i nglo b'ɔ fiɛli i sran'm be nyrun'n, b'ɔ dun mmua sie mannin ye kɛ ɔ ba e nyrun nyan ka nan ɔ'a yi mɛn'n, i ndɛ yɛ e kan-an.

⁸ Mɛn'n nun wlengbi'm be wie fi b'a si-mɛn i, sɛ ɔ ti kɛ be sili i'n, wuun b'a bobo-man e Min'n b'ɔ lɛ nyrun waka'n su.

⁹ Sanngɛ b'a si-mɛn i, afin ɔ ti klɛwa kɛ: «Like nga sran fi nyinma a wun-mɛn i'n, bɔ bé su a ti-man, bɔ i wun akunndan a ba-man be klun'n, like sɔ'n yɛ Nyanmiɛn yo mɛnnin i klofuɛ mun-ɔn .»

¹⁰ E liɛ'n, Nyanmiɛn man i Wawɛ'n yi like sɔ'n nglo kleli ye. Afin kɛ Nyanmiɛn Wawɛ'n kunndɛ sa'n kwlaa bo'n ti'n, ɔ si Nyanmiɛn bɔbɔ i akunndan'n.

¹¹ Sran si-mɛn i wiengu klun akunndan san i bɔbɔ yɛ ɔ si i-ɔ ?Nɛ́n i-ɔ? I kunngba nin-ɔn, sran fi si-man Nyanmiɛn ninnge mun san Nyanmiɛn Wawɛ'n kunngba cɛ yɛ ɔ si be-ɔ.

¹² Afin e liɛ'n, akunndan nga sran'm be bu'n, nɛ́n i wie yɛ Nyanmiɛn man e bu-ɔ, sanngɛ Nyanmiɛn fɛ i Wawɛ'n mannin ye, kɛ e si like kwlaa ng'ɔ mannin ye i klun-ufue'n ti'n.

¹³ Kɛ e ´kan ninnge sɔ'm be ndɛ'n, nán like nga ngwlɛlɛfuɛ'm be kle ye'n i sɔ ndɛ yɛ e kan-an, sanngɛ nga Nyanmiɛn Wawɛ'n kle ye'n e fa tu Nyanmiɛn ninnge'm bé bo.

¹⁴ Klɔ Sran'n b'ɔ o sa'n, ɔ fa-man Nyanmiɛn Wawɛ ninnge'm bé su, afin be ti i nyrun sinnzin like, ɔ kwla wun-man be wlɛ mlɔnmlɔn, afin san Nyanmiɛn Wawɛ'n yɛ ɔ kle sran yɛ man ɔ wun be wafa'n i wlɛ-ɔ.

¹⁵ Sran nga Nyanmiɛn Wawɛ sie i'n, i liɛ'n, ɔ si sa ngbɛsungbɛsu'n kwlaa, sanngɛ sran fi wun-mɛn i bɔbɔ'n i wafa'n i wlɛ.

¹⁶ Afin be klɛli i kɛ: «?Wan yɛ ɔ si e Min'n i akunndan nin-ɔn? ?Wan yɛ ɔ kle i like-ɔ?» Sanngɛ e liɛ'n, e nin Krist ye akunndan'n ti kun .