1 Korɛntfuɛ Mun 1 - NYANMIƐN NDƐ'N 1998

Pɔl klɛ fluwa nga ko mannin Korɛnt lɔ Kristfuɛ mun

¹ M Pɔl bɔ Nyanmiɛn flɛli min yɛlɛ kɛ ɔ klo kɛ Krist-Jésus ´sunman min'n, min nin e niaan Sɔstɛni

² e ´klɛ fluwa nga blɛ amun bɔ an ti Nyanmiɛn i asɔnunfuɛ Korɛnt lɔ. Amun b'ɔ flɛli amun kɛ an ´kaci i liɛ mlɔnmlɔn sran wunmuan bɔ amun nin Jésus-Krist amu'an yo'n ti'n, amun nin be kwlaa nga be bo Jésus-Krist b'ɔ ti e kwlaa e Min'n i dunman'n, amun yɛ e klɛ blɛ amun-ɔn.

³ Man e Si Nyanmiɛn nin e Min Jésus-Krist be man an nyan ye, yɛ man amún wun jɔ amun fɔuun!

Pɔl lali Nyanmiɛn ase ye b'ɔ yoli be'n ti

⁴ Amun ti n la min Nyanmiɛn'n i ase titi, yɛlɛ kɛ ɔ yoli amun ye Krist-Jésus ti.

⁵ Afin kɛ amun nin Krist amu'an yo sran wunmuan'n, like kpakpa'n kwlaa ti a sin a yia amun, an si i ndɛ'n kwlaa kan, an wun i ninnge'm be kwlaa be wlɛ.

⁶ Ɔ kle kɛ amu'an fa Krist ndɛ'n su kpa.

⁷ I sɔ'n ti, kɛ amun ´minndɛ e Min Jésus-Krist i wun nglo yilɛ cɛn'n, Nyanmiɛn i ninnge b'ɔ fa man sran mun'n, i wie fi su mian-man amun.

⁸ I yɛ man amun ´jran cinnjin lele fa ju i awieliɛ-ɔ nan e Min Jésus-Krist i wun nglo yilɛ cɛn'n nun b'a kputu-man amun.

⁹ Nyanmiɛn b'ɔ flɛli amun kɛ amun nin i Wa Jésus-Krist b'ɔ ti e Min'n an di anuansɛ'n, ɔ ti nanwlɛfuɛ.

Korɛnt lɔ asɔnun'n i nun bubulɛ

¹⁰ Aniaan mun, e Min Jésus-Krist ti n ´srɛ amun, man amún nuan sɛ, nán an bubu amun wun nun, sanngɛ man amun akunndan'n nin amun nɛn'n ɔ yo kun.

¹¹ Afin n niaan mun, n ti amun wun ndɛ Klɔe awlofuɛ'm bé nuan nun, kɛ ndɛ wo amun afiɛn.

¹² Ndɛ sɔ'n yɛlɛ kɛ amun nun wie se kɛ: «N liɛ'n, Pɔl liɛ yɛlɛ min!» Wie waan: «Apolɔs liɛ yɛlɛ min!» Wie kusu waan: «Sefas liɛ yɛlɛ min!» Yɛ wie waan: «N liɛ'n, Krist liɛ yɛlɛ min!»

¹³ ?Be kpɛkpɛli Krist nun? ?Pɔl yɛ be boboli i waka'n su amun ti-ɔ? ?Yɛ Pɔl dunman nun yɛ be yoli amun batɛm-ɔn?

¹⁴ Kɛ nán min yɛ n yoli amun batɛm, bɔ san Krispis nin Gaiis be cɛ yɛ n yoli be batɛm'n, ɔ yo n fɛ kpa.

¹⁵ I sɔ'n nun'n, sran fi kwla se-man kɛ n dunman nun yɛ be yoli amun batɛm-ɔn.

¹⁶ Be nga n yoli be batɛm ekun'n yɛlɛ Stefanas nin i awlofuɛ mun, sanngɛ be nga'm be liɛ'n, n wun-mɛn i wlɛ sɛ n yoli be nun wie batɛm o.

¹⁷ Nán sran'm be batɛm yolɛ ti yɛ Krist sunmannin min-ɔn, Nyanmiɛn ndɛ kanlɛ ti yɛ ɔ sunmannin min-ɔn. Nán kɛ n si ngwlɛlɛ yɛ n si ijɔ ti yɛ i waan n kan-an. Sɛ ɔ ti sɔ ti'n, wuun Krist waka'n su wulɛ'n ɔ ´yo ngbɛn.

Nyanmiɛn ti kpli, ɔ si sa'n kwlaa

¹⁸ Afin Krist i waka'n su wulɛ ndɛ bɔ be kan'n ɔ ti sinnzin ndɛ be nga be su mlin'n be nyrun, sanngɛ e nga y'a fite nun'n, ɔ kle ye kɛ Nyanmiɛn kwla like kwlaa yo'n.

¹⁹ Yɛ be klɛli ndɛ wie kɛ: «N yo man ngwlɛlɛfuɛ'm be ´kaci sinnglinfuɛ, yɛ n yo man be bɔ be wun sa wlɛ'n be su wun-man sa wlɛ kun .»

²⁰ ?Ngwlɛlɛ sifuɛ'n wo nin? ?Mmla sifuɛ'n wo nin? ?Blɛ nga nun be bɔ be kunndɛ kɛ be ´si sa'm bé bo'n be o nin? ?Sran nga be ti ngwlɛlɛfuɛ mɛn nga nun'n, Nyanmiɛn bu-man be sinnglinfuɛ?

²¹ Nyanmiɛn wun kɛ ɔ ti kpa kɛ ɔ fa sinnzin ndɛ sɔ'n de be nga be fa su'n, afin Nyanmiɛn b'ɔ si sa kwlaa'n, ɔ wun kɛ sran'm be nin be ngwlɛlɛ bɔ be si i'n, b'a si-mɛn i.

²² Zuif'm be waan be `yi atrɛ kle be, yɛ Grɛk'm be kunndɛ ngwlɛlɛ.

²³ Sanngɛ e liɛ'n, Krist bɔ be boboli i waka'n su i wun ndɛ'n yɛ e kan-an. Ndɛ sɔ'n ti Zuif'm be ngasi like yɛ ɔ ti be bɔ be ti-man Zuif'n be nyrun sinnzin ndɛ.

²⁴ Sanngɛ e nga Nyanmiɛn flɛli ye'n, sɛ e ti Zuif o, sɛ e ti Grɛk o, Krist ti e si kɛ Nyanmiɛn kwla sa kwlaa yo, yɛ ɔ si sa'n kwlaa.

²⁵ Afin Nyanmiɛn i sinnzin'n ti sran'm be ngwlɛlɛ, yɛ Nyanmiɛn i fuɛn'n ti sran'm be kekle.

²⁶ Aniaan mun, an `nian amun wafa nga an ti bɔ Nyanmiɛn fa flɛli amun'n, be bɔ sran'm be bu be ngwlɛlɛfuɛ'n, nin sran dan'n, ɔ nin wlengbi'n b'a sɔn-man amun nun.

²⁷ Afin like nga sran'm be bu-man be like'n, be yɛ Nyanmiɛn fa gua ngwlɛlɛfuɛ'm bé nyin ase-ɔ. Like nga sran'm be bu i kɛ be kwla fa yo-man like fi'n, be yɛ Nyanmiɛn fa gua keklefuɛ'm bé nyin ase-ɔ.

²⁸ Like nga sran'm be bu-man be like kpa'n, nin like nga be yo be finfin'n, nin nga be bu-man be kɛ be o lɛ'n, Nyanmiɛn fa be man like nga be o lɛ'n be nyan-man nyrun kun.

²⁹ Nyanmiɛn yo i sɔ nan sran fi a di-mɛn i nuan a kle-mɛn i.

³⁰ Afin i yɛ man amun nin Krist-Jésus amu'an kaci sran wunmuan-an, yɛ Krist ti e kacili ngwlɛlɛfuɛ, ɔ buli ye sran kpa, e kacili i liɛ mlɔnmlɔn, yɛ ɔ kpɔli é ti.

³¹ Afin be klɛli i kɛ: «Sran nga i waan ɔ ´di i nuan'n, man ɔ fa e min Nyanmiɛn'n di i nuan .»