1 Be Nyoliɛ 4 - NYANMIƐN NDƐ'N 1998

Zida osu'n

¹ Zida i mma mun yɛlɛ Perɛs, nin Ɛzrɔn, nin Karmi, nin Ir, ɔ nin Sɔbal.

² Sɔbal i wa Reaza wuli Zasat, Zasat kusu wuli Asimai nin Laad. Be yɛ be ti Zɔrea osu'n nunfuɛ'm be nannan nin-ɔn.

^3-4 Efrata i wa yasua klikli'n bɔ be flɛ i Ir'n, bɔ i yɛ ɔ takali Bɛtleɛm klɔ'n i wa yasua liɛ mun yɛlɛ Etam, nin Zizreɛl, nin Zisma, ɔ nin Zidbas. Ɔ wuli ba bla kun. Be flɛ i kɛ Azɛlɛlpɔni. I sin ɔ wuli Peniɛl nin Ezɛr. Peniɛl yɛ ɔ takali Gɛdɔr klɔ nin-ɔn. Ezɛr kusu yɛ ɔ takali Isa klɔ nin-ɔn.

⁵ Askir b'ɔ takali Tekoa klɔ'n, i yi'm be yoli nnyɔn: Elea nin Naara.

⁶ Ɔ nin Naara be wuli ba yasua nnan. Be wa sɔ mun yɛlɛ Asizam, nin Efɛr, nin Temɛni, ɔ nin Asastari.

⁷ Ɔ nin Elea kusu wuli Zeret nin Zosar, ɔ nin Ɛtnan.

⁸ Kɔz wuli Anib nin Azɔbeba. I osu'n nunfuɛ mun yɛlɛ Arim i wa Asarsɛl i akpasua'n.

⁹ Zaɛbɛz nyannin nyrun trɛli i niaan mun. I nin waan kɛ ɔ ´wu i'n ɔ fɛli, i ti yɛ ɔ tɔnnin i Zaɛbɛz nin-ɔn.

¹⁰ Zaɛbɛz kpan flɛli Izraɛl Nyanmiɛn'n, ɔ seli i kɛ: «N ´srɛ wɔ kpa ti-ɔ, man min muae, yo man min asiɛ'n cɛn, sasa min. Nán sa tɔ min su, nán man n wun nyrɛnnɛn!» Kpɛkuun Nyanmiɛn tɛli i srɛlɛ'n su klanman.

¹¹ Sisa i niaan bian Kɛlib wuli Mɛsir. Mɛsir kusu wuli Ɛstɔn.

¹² Ɛstɔn kusu wuli Rafa, nin Paseak, ɔ nin Tɛsina. Tɛsina yɛ ɔ takali Nasas klɔ nin-ɔn. Reka lɔfuɛ'm be yɛ be o lɛ-ɔ.

¹³ Kɛnaz i mma mun yɛlɛ Ɔtniɛl nin Sɛraza. Ɔtniɛl kusu i mma mun yɛlɛ Atat nin Mɛɔnɔtai.

¹⁴ Mɛɔnɔtai wuli Ofra. Sɛraza kusu wuli Zoab. Zoab ti lika nga be flɛ i kɛ Ajuin Difuɛ'm be Kongo'n i su kpɛn. Be nga be tran lɛ'n be ti ajuin difuɛ.

¹⁵ Zɛfine i wa Kalɛb i mma mun yɛlɛ Iri, nin Ela, ɔ nin Naam. Ela wuli Kɛnaz.

¹⁶ Zealeleɛl i mma mun yɛlɛ Zif, nin Zifa, nin Tirza, ɔ nin Azareɛl.

^17-18 Ɛsdras i mma mun yɛlɛ Zetɛr, nin Merɛd, nin Efɛr, ɔ nin Zalɔn. Merɛd nin Ezipt famiɛn'n i wa bla'n kun be wuli Miriam, nin Samai, ɔ nin Zisbak. Zisbak yɛ ɔ takali Ɛstɛmɔa klɔ nin-ɔn. Merɛd nin Zida akpasua'n su bla kun be wuli Zerɛd, nin Ebɛr, ɔ nin Zɛkitiɛl. Zerɛd yɛ ɔ takali Gɛdɔr klɔ nin-ɔn, Ebɛr kusu yɛ ɔ takali Soko klɔ nin-ɔn, yɛ Zɛkitiɛl kusu yɛ ɔ takali Zanɔak klɔ nin-ɔn.

¹⁹ Ɔdiza jali Nakam i niaan bla'n kun. Be mma mun yɛlɛ Kɛila b'ɔ ti Garmfuɛ'm be nannan'n, ɔ nin Ɛstɛmɔa b'ɔ ti Maakatfuɛ'm be nannan'n.

²⁰ Simɔn i mma mun yɛlɛ Amnɔn, nin Rina, nin Bɛn-Anan, ɔ nin Tilɔn. Zisɛi i anunman mun yɛlɛ Zosɛt nin Bɛn-Zosɛt.

²¹ Zida i wa Sela i mma mun yɛlɛ Ɛr b'ɔ takali Leka klɔ'n, ɔ nin Laɛda b'ɔ takali Maresa klɔ'n. Sela i osu'n nunfuɛ'm be yɛlɛ be nga be fa lɛn mma plili'n be wu tannin'n, be ti Asbea i awlo nunfuɛ mun.

²² Sela osu'n nunfuɛ wie mun yɛlɛ Zɔkim, nin Kɔzebafuɛ mun, ɔ nin Zɔas, ɔ nin Saraf. Kasiɛn nnyɔn nga'm be sieli Moab. Sela i osu'n nunfuɛ yɛlɛ Zasibi-Lesɛm ekun. Ndɛ nga'm b'a cɛ kpa.

²³ Be osu'n nunfuɛ'm be ti sɛ wufuɛ. Be tran nnɛn'm be kuku'm be wun lɔ nin fie'm be su. Be di junman man famiɛn'n.

Simeɔn Osu'n

²⁴ Simeɔn i mma mun yɛlɛ Nɛmiɛl, nin Zamɛn, nin Zarib, nin Zerak, ɔ nin Sail.

²⁵ Sail wuli Salɔm, Salɔm wuli Mibsam, Mibsam wuli Misma.

²⁶ Misma wuli Amiɛl, Amiɛl wuli Zakir, Zakir wuli Simɛi.

²⁷ Simɛi wuli ba yasua blu-nin-nsiɛn ɔ nin ba bla nsiɛn, sanngɛ i niaan'm b'a wu-man ba kpanngban. Ɔ man Simeɔn i akpasua sufuɛ'm b'a trɛ-man kɛ Zida i akpasua sufuɛ'm be sa.

^28-33 Klɔ nga be trannin bé su ka nan David ɔ'a sie mɛn'n yɛlɛ Beɛr-Seba, nin Mɔlada, nin Azar-Sial, nin Bila, nin Ɛzɛm, nin Tɔlad, nin Bɛtiɛl, nin Ɔrma, nin Ziklag, nin Bɛt-Markabɔt, nin Azar-Sizim, nin Bɛt-Birɛi, ɔ nin Saaraim. Be trannin klɔ nnun nga be o yɛ'n bé su wie: Etam, nin Ain, nin Rimɔn, nin Tɔkɛn, nin Asan. Yɛ be trannin klɔ kanngan nga be mantan be lɛ'n be su lele fa ju Baalat. Klɔ nga be trannin bé su'n, be yɛ be o lɛ-ɔ. Simeɔn osu'n nunfuɛ'm be trantranwlɛ, nin be afiliɛ mun yɛ be o lɛ-ɔ.

^34-38 Mɛsɔbab, nin Zamlɛk, nin Zosa b'ɔ ti Amazia i wa'n, yɛ Zoɛl, ɔ nin Zei b'ɔ ti Zosibia i wa'n, nin Sɛraza i anunman'n nin Aziɛl i anunman sian'n, yɛ Ɛlzɔenai, nin Zaakɔba, nin Zɛsosaza, nin Azaza, nin Adiɛl, nin Zɛzimiɛl, nin Bɛnaza, ɔ nin Ziza b'ɔ ti Sifɛi i wa'n nin Alɔn i anunman'n, nin Zɛdaza i anunman sian'n, nin Simri i anunman siansian'n, nin Sɛmaɛza i anunman siansiansian'n, be kwlaa nga be boboli be dunman lɛ'n, be ti awlobo kpɛnngbɛn. Be osu'n ti dan kpa.

³⁹ Ɔ man be ɔli lele juli Gɛdɔr kongo'n i bue ng'ɔ kpɛ wia afiliɛ lɔ'n nun. Be ɔli kɛ be ko kunndɛ didiwlɛ man be nnɛn mun.

⁴⁰ Be ko nyannin nnɛn'm be didiwlɛ klanman. Lɔ ijre'n ti kpa dan. Lika'n kusu ti gbaun, yɛ ɔ ti fɔuun. Kam osu nunfuɛ'm be yɛ be tran lɛ laa-a.

⁴¹ Ezekias b'ɔ ti Zida famiɛn'n blɛ su'n, sran nga be boboli be dunman lɛ'n, be ko bubuli be nga be o lɛ'n bé tannin sua mun nin be tranwlɛ mun, be nunnunnin be kwlaa, kɛ e ´se yɛ'n, be wun-man be osu bɔ kaan sa. Be nunnunnin be, kpɛkuun be trannin be osu, afin be nyannin be bua'm be didiwlɛ lɛ.

⁴² Simeɔn akpasua sufuɛ wie'm be ɔli Seir i oka-oka lika'n nun lɔ. Be ti sran ya nnun. Be nga be dunnin be mmua'n, yɛlɛ Pɛlatia, nin Nearia, nin Rɛfaza, ɔ nin Iziɛl. Be ti Zisɛi i mma mun.

⁴³ Be kunnin Amalɛkfuɛ nga be kali'n bɔ be wanndi ɔli lɔ'n, nan b'a tran lɔ. Be tɛ o lɔ lele ndɛ.