Roma 15 - Vengo (Babungo)1 Nɨniŋ, nu kaŋ-nsiŋ faŋ nsiŋ weꞌ maa nu Kristo nə, lùu laa, nsiŋ kɨ gaŋtə vɨɨ mbɨə faŋ vəŋ bwa maa nu Kristo, kee yɨsə vənu faŋ mbə bàw sheꞌ tɨ́ nsiŋ nə me. 2 Bàw wə tɨ̀ me wə fɨ taa ŋwaa nsiŋ yɨ nu ŋkɨə faŋ ŋkə bàw tɨ́ vaŋ-nshwi vaŋ-nsiŋ, nə ŋkɨə faŋ ŋkə gaŋtə vəŋ maa məgə vɨsɨ vɨsɨ nə nu Kristo. 3 Nshɨ-tɔ Kristo nə kee bàwsə sheꞌ too wi me. Ŋwə nə tòꞌ yuu ŋkə lùu taa ŋwaꞌlə Nwi kɔ̀ŋ ŋwə laa, «Ndisə faŋ vɨɨ ndasə ghɔ shɔ nə, gù maa mə.» 4 Nɨniŋ, vənu vənshə faŋ vɨɨ ywaŋ-vɨsɨ nə nyɔ̀ꞌ nə, vəŋ nə ŋwàꞌlə laa nsiŋ kɨ zwetə fɨ fuŋ. Baa nə laa nsiŋ kɨ jiatə yiŋwaa nyaa-nsiŋ, baa zwisə fwi saŋ-nsiŋ nɨzi, kɨꞌ məbwey vəlwaŋ fɨ ghɔ Nwi. 5 Nshɨ-tɔ Nwi faŋ ŋwə yɨsə vɨɨ jia fwisə vəŋ taa ŋɨꞌ, baa zwìsə fwisə vəŋ nɨzi, yɨsə viŋ bɨꞌtə vənu viŋ shəŋ muꞌ, faŋ mbə kùꞌnə maa nu Yeso Kristo. 6 Nɨniŋ laa viŋ kɨ bəŋsə Nwi, tɨɨ tɨta ŋwaa-nsiŋ Yeso Kristo nə fwi yiŋ yimuꞌ, baa nə yigisə yiŋ yimuꞌ nɨzi. Bàw viŋ kɨ gaŋtə yiŋwaa yiŋ maa nu Kristo, viŋ viŋ 7 Nɨniŋ, viŋ kɨ biŋ yiŋwaa yiŋ, viŋ viŋ, sheꞌ faŋ Kristo nə bìŋ nsiŋ nə. Nsiŋ kɨ bəŋsə Nwi nɨniŋ. 8 Mə gì laa Kristo nə gù wuu məgaŋtə vɨɨ tɨ́ vɨɨ Isirayl, faŋ vɨ sɨ̀ɨtə vəŋ nə, maa mədə laa Nwi lùu wuu yinsəŋ, baa nə laa ŋkɔꞌnə Nwi faŋ Nwi nə kɔ̀ꞌnə tɨ́ vətɨɨ vəvəŋ nə, gù nu yinsəŋ. 9 Gə fɨ maa vɨɨ tətɔŋ fu, vəŋ bəŋsə Nwi, buꞌ laa ŋwə nə kèe gəŋsə vəŋ nɨzi, sheꞌ faŋ ŋkə lùu taa ŋwaꞌlə Nwi laa, «Lùu nu ŋkɨə faŋ mə taa kɨ bwaŋ ghɔ taa ŋwaa vɨɨ tətɔŋ fu, zwa nyaysə maa yizii yə.» 10 Vɨ nə baa ŋwàꞌlə laa, «Viŋ ŋaytə mɔɔ, vɨɨ tətɔŋ fu, ghɔ ŋgwisə vɨɨ vi.» 11 Baa nə laa, «Viŋ kɨ bəŋsə tɨta Nwi mɔɔ, viŋ vɨɨ tətɔŋ fu vənshə, ŋgwisə vɨɨ vənshə bəŋsə ŋwə.» 12 Aysaya nə gì ŋkii laa, «Wuu ŋiꞌ ŋii Jesse ndɔ jwi, ndɔ̀ yizɔ, sɔ̀ꞌ məshɨ, vɨɨ tətɔŋ fu ndɔ nuŋ ŋkitə vəŋ maa ŋwə.» 13 Nwi faŋ ŋwə yɨsə vɨɨ kɨꞌ məbwey vəlwaŋ, kwàŋ məŋaytə nə məduꞌ-nyɔŋ taa fwisə viŋ, ŋwə lwaŋ, buꞌ faŋ viŋ nùŋ fwi siŋ maa ŋwə nə. Zwitə Ley Nwi baa luu kɔ̀ wutə tɨ́ viŋ, tɨ́ kaꞌ viŋ kɨ kɨꞌ məbwey ghɔ́ nə fwi yiŋ yinshə. Ŋiꞌ nu ŋkɨə faŋ Pɔɔl nə nyɔ̀ꞌ ŋwaꞌlə ŋwə̀ tɨ́ vɨɨ Rom 14 Vaŋ-nshwi vaŋ, mə kɔꞌ kɨɨ fɨ taa fwi mə laa, nu jəə lwàŋ taa fwisə viŋ nɨzi. Viŋ kɔꞌ kɨɨ nə vənu və Kristo vənshə ŋkee vəley, kɨɨ maa mətɨsə yiŋwaa yiŋ. 15 Faŋ mə kɔlə kɨɨ nɨniŋ nə, mə nyɔ̀ꞌ tɨ́ viŋ, gì maa vəshəŋ vəmɔ́ꞌ nə fwi yiweꞌ, lùmə vənu tɨ́ viŋ nɨniŋ, buꞌ laa Nwi nə kɔ̀ mə nə tɔ ley fɨ taa mənɔŋ-bwaŋnə wi, 16 laa mə gu wuu faꞌ Yeso Kristo taa ŋwaa vɨɨ tətɔŋ fu. Mə faꞌ tɨ́ Nwi yaa wuu məfeꞌ Nwi, fɨꞌtə ntɔŋ yijəə Nwi tɨ́ vɨɨ. Nɨniŋ laa vɨɨ tətɔŋ fu jwi, kɨ kɔ Nwi nə yiŋwaa vəŋ. Zwitə Ley Nwi yɨsə vəŋ baw tɨ́ Nwi. 17 Nɨniŋ, kaꞌ mə kɨ ŋaytə, bə̀ŋsə Nwi buꞌ nu Yeso Kristo faŋ mə faꞌ faꞌ Nwi nə. 18 Kaꞌ mə kee ka fwi, gì laa mə yɨsə nu Kristo saynə taa mbi, gə̀ vɨsɨ, maa laa mə gi laa nə yɨsə nshɨ-tɔ Kristo faŋ ŋwə faꞌ taa ŋwaa mə nə me. Nə yɨsə ŋwə buu vɨɨ tətɔŋ fu kɨ zɔnə ŋwə buꞌ yigisə nyaa nə vəfaꞌ vaŋ, 19 faŋ Nwi nə tɨ̀ŋ yiba jɨŋ mə, də̀ vəshwenə nə vənu və shuu yɔŋvə tɨ́ vəŋ buꞌ wutə Nwi nə wutə Zwitə Ley Nwi. Lùu faŋ mə nə fɨ̀ꞌtə ntɔŋ yijəə Nwi yinshə buꞌ Yeso Kristo, zì fɨ ntɨꞌ Jerusalem, kia gə̀ zìꞌ ŋkee maa shɨ Ilirikɔn, 20 toꞌ nɨniŋ, kəə ŋkaŋ laa kɨ mə fɨꞌtə ntɔŋ yijəə yɔ́ maa shəŋ faŋ vɨ duꞌtə vɨ kɨɨ nə yizii Kristo yifi me. Nɨniŋ laa kɨ mə fianə ŋii nyaa fuu shɨŋii wə dɨday me. 21 Mə nəə yɨsə sheꞌ faŋ ŋkə lùu taa ŋwaꞌlə Nwi laa, «Vɨɨ mbɨə faŋ vɨ nə kee ta fɨ̀ꞌtə nu Nwi tɨ́ vəŋ me, ndɔ kɨ ye ŋwə. Vɨɨ mbɨə faŋ vəŋ nə kee ta zɔ nu kɔ̀ŋ ŋwə me, ndɔ kɨɨ nə ŋwə.» Faŋ Pɔɔl nə nàysə tɨ́ vɨɨ Rom laa yi kəə jwi ye vəŋ 22 Lùu ŋiꞌ nu ŋkɨə faŋ ŋkə nə fə̀ŋ mə ghee yaŋ, laa kɨ mə jwi yɨ viŋ me. 23 Luu nə, shəŋ kee baa lùu shɔ shee ndwə maa kwiŋ mbi ŋwə̀ me. Jɨŋ yiŋ nə baa zà mə maa ŋuꞌsə yaŋ maa məjwi yɨ viŋ. 24 Nɨniŋ, mə ndɔ jwi yɨ viŋ maa yighee njyə faŋ mə ndɔ kɨ gə shɨ Speyn, buꞌ laa mbɨꞌtə nyaa lùu laa mə ndɔ kɨ shɔɔ, jwi ye viŋ ŋkəə, zɔ̀ zwitə kiŋ tɨtiꞌ, buu viŋ gə twèy mə shɔ. 25 Luu nə, mə bɨ gə Jerusalem ndwə maa məgaŋtə vɨɨ ley Nwi fɨ yifi. 26 Fwisə vɨɨ Makedonia nə vɨɨ Akaya nə bàw, vəŋ baytə vətɔ maa mətɔŋ tɨ́ mbəəsə fɨ taa ŋwaa vɨɨ ley Nwi fɨ ntɨꞌ Jerusalem. 27 Vəŋ nə kàw maa məyɨ nɨniŋ. Luu nə, nə baa lùu ŋkee nu vəŋ maa məyɨ nɨniŋ, buꞌ laa ŋkə kùꞌnə tɨ́ vɨɨ tətɔŋ fu faŋ vəŋ nə zɨ̀ nu Zwitə Nwi, faŋ ŋkə nə ndɔ̀ fɨ ghɔ vɨɨ Isirayl nə, laa vəŋ baa luu kɔ̀ vətɔ vəzɨvə tɨ́ vəŋ, vəŋ zəsə yiŋwaa yivəŋ shɔ. 28 Yighee njyə faŋ mə ndɔ metə faꞌ ghɔ́, baa kɔ̀ vətɔ vɔ́ faŋ vɨ nə bàytə maa məkɔ tɨ́ vɨɨ fɨ Jerusalem nə, kɨ nii ndɔ̀ jwi yɨ viŋ, shɔ̀ɔ gə̀ Speyn. 29 Faŋ mə ndɔ kɨ jwi yɨ viŋ nə, mə kɔꞌ kɨɨ laa mə ndɔ jwi nə mənɔŋ-bwaŋnə fɨ ghɔ Kristo ŋkee yaŋ. Faŋ Pɔɔl nə bùꞌ ghɔ tɨ́ vɨɨ Rom laa vəŋ kɨ shɔꞌtə Nwi tɔ yi 30 Vaŋ-nshwi vaŋ, mə tɨsə viŋ maa yizii tɨta ŋwaa-nsiŋ Yeso Kristo, buꞌ ŋkawnə nyaa-nsiŋ faŋ Zwitə Ley Nwi yɨsə nsiŋ nə kaw nə yiŋwaa nyaa-nsiŋ, laa viŋ kɨ buꞌ ghɔ tɨ́ Nwi tɔ mə, nsiŋ kɨ tuŋ yighaw mɔ́ꞌ nɨniŋ, 31 laa Nwi bweysə mə fɨ ghɔ vɨɨ mətwey nu Nwi fɨ shɨ Judia, baa nə laa vɨɨ Kristo fɨ ntɨꞌ Jerusalem biŋ faꞌ ŋwaa ghɔ́ nə fwi yimuꞌ, faŋ mə gə gaŋtə vɨɨ Jerusalem nə. 32 Nɨniŋ laa mə ndɔ kɨ shɔɔ, jwì yɨ viŋ nə məŋaytə, faŋ Nwi taa biŋ, fwi saŋ-nsiŋ zutə. 33 Nwi faŋ ŋwə kɔ məduꞌ-nyɔŋ tɨ́ vɨɨ nə, luu viŋ vɨ vəŋ vənshə. Ŋkə lùu nɨniŋ. |
© 1993, Wycliffe Bible Translators, Inc. All rights reserved.