Reveleyshən 7 - Vengo (Babungo)

Faŋ vɨ nə shwènə vɨɨ ŋkaŋsə waaghɨꞌ nə ŋkaŋsə njɔsə-yishwe muu-yinshwe fɨ taa ŋwaa vɨɨ Isirayl

¹ Yiŋkii kɨ shɔɔ, mə ye nshiisə-ŋiisə Nwi yishwe, vəŋ duꞌ mfaysə mbi yishwe, jìa fɨɨ faŋ ŋkə jwi fɨ maa mfaysə mbi yishwe, laa kɨ fɨɨ baa shɔɔ fɨ fuu nsi me, tɨꞌnə me fɨ fuu mamuu me, tɨꞌnə me fɨ fuu tuu tɨ kəmuꞌ me.

² Mə baa kɨ nii yè nshiiŋii Nwi mɔ́ꞌ, ŋwə fuu fɨ kwiŋ ntɔŋ-shɨshwi nə lay Nwi, ŋwə luꞌ tɨ́ nshiisə-ŋiisə Nwi sɔ́ yishwe nə, faŋ Nwi nə kɔ̀ wutə tɨ́ vəŋ laa vəŋ bɨsə mbi nə mamuu.

³ Nshiiŋii Nwi yɔ́ gi laa, «Viŋ naꞌ, kɨ viŋ ta bɨsə mbi, nə mamuu, nə vətɨ me! Naꞌ, yia taa shwenə vɨɨ faꞌ Nwi via fɨ mbootɔ vəŋ.»

⁴ Vɨ naysə ki vɨɨ shee faŋ vɨ shwenə vəŋ nə lay Nwi kɔ́ mbootɔ vəŋ nə. Vəŋ nə luu vɨɨ ŋkaŋsə waaghɨꞌ nə ŋkaŋsə njɔsə-yishwe muu-yinshwe. Nə luu vɨɨ fɨ taa məshɨ mə Isirayl mənshə.

⁵ Vɨ nə shwènə vɨɨ ŋkaŋsə njɔsə-bɔɔ fɨ taa ŋwaa vɨɨ Juda, nə fɨ taa ŋwaa vɨɨ Ruubən ŋkaŋsə njɔsə-bɔɔ, nə fɨ taa ŋwaa vɨɨ Gad ŋkaŋsə njɔsə-bɔɔ,

⁶ nə fɨ taa ŋwaa vɨɨ Asha ŋkaŋsə njɔsə-bɔɔ, nə fɨ taa ŋwaa vɨɨ Naftali ŋkaŋsə njɔsə-bɔɔ, nə fɨ taa ŋwaa vɨɨ Manase ŋkaŋsə njɔsə-bɔɔ,

⁷ nə fɨ taa ŋwaa vɨɨ Simiɔn ŋkaŋsə njɔsə-bɔɔ, nə fɨ taa ŋwaa vɨɨ Levi ŋkaŋsə njɔsə-bɔɔ, nə fɨ taa ŋwaa vɨɨ Isakar ŋkaŋsə njɔsə-bɔɔ,

⁸ nə fɨ taa ŋwaa vɨɨ Zebulɔn ŋkaŋsə njɔsə-bɔɔ, nə fɨ taa ŋwaa vɨɨ Josef ŋkaŋsə njɔsə-bɔɔ, nə fɨ taa ŋwaa vɨɨ Benyamin ŋkaŋsə njɔsə-bɔɔ. Vɨ nə shwènə vɨɨ vɔ́ vənshə.

Faŋ vɨɨ Kristo fɨ taa mbi yinshə tɨŋnə vɨsɨ Nwi ghɔ Yeso Kristo

⁹ Yiŋkii kɨ shɔɔ, mə kɨ ye, yè ŋkee nwaa vɨɨ vəyaŋ, tɨ́ kaꞌ wə kee say me. Vəŋ nə ndɔ̀ fɨ taa məshɨ mənshə, nə təkuu tənshə, nə ŋgwisə vɨɨ yinshə, nə təghaŋ tənshə, jwì tɨ̀ŋnə vɨsɨ ŋkaw kɔ́ nə vɨsɨ bi-njɨɨ yɔ́, nə njwisə fusə səmɔ́ꞌsə maa vəŋ, nə vəshay və yitee ghɔ vəŋ,

¹⁰ luꞌ nəŋay laa, «Nu məbweysə vɨɨ lùu nu Nwi wia, faŋ ŋwə dùꞌ fuu ŋkaw məsɔꞌ mbi, ghɔ bi-njɨɨ yɔ́ nə.»

¹¹ Nshiisə-ŋiisə Nwi sənshə tɨŋnə, kìa kenə kɔ́, kìa vɨɨ taa, nə vətɔ vəbweyvə vɔ́ yishwe nə, kɨ nii nɔ̀ŋ nsi vɨsɨ kenə kɔ́, tùŋ yitɔ yivəŋ nsi, bə̀ŋsə Nwi,

¹² gì laa, «Lùu nɨniŋ. Nsiŋ kɨ bəŋsə Nwi, kɔ feenə tɨ́ ŋwə. Yitɔfə yinshə luu sheꞌ ghɔ ŋwə. Məbwaŋ luu sheꞌ tɨ́ ŋwə. Ŋwə kwàlə shɔ̀ɔ, kìi wutə kənshə, ndɔ gòꞌsə yighee muꞌ. Ŋkə lùu sheꞌ nɨniŋ.»

¹³ Wuu taa mɔ́ꞌ fɨ taa ŋwaa vɨɨ taa vɔ́ kiasə, gì shee laa, «Vɨɨ və̀ faŋ vəŋ mɔ̀ꞌ njwisə fusə nə, lùu vəndə? Vəŋ ndɔ̀ fɨ fə?»

¹⁴ Mə gì tɨ́ ŋwə laa, «Tɨta ŋwaa, kɨ̀ɨ ghɔ.» Ŋwə gi shee laa, «Lùu vɨɨ mbɨə faŋ vəŋ fùu fɨ taa ŋɨꞌ yiyaŋ, sɔ̀ njwisə vəŋ nə mənshi mə bi-njɨɨ yɔ́, yɨ̀sə nsə ley, buꞌ faŋ vəŋ nə nùŋ fwisə vəŋ maa wə ntɨə faŋ ŋwə nə kù tɔ vəŋ nə.

¹⁵ Lùu ŋiꞌ nu ŋkɨə faŋ ŋkə yɨ̀ laa kaꞌ vəŋ tɨ̀ŋnə vɨsɨ ŋkaw Nwi, kɨ faꞌ tɨ́ ŋwə taa ŋii Nwi vətuꞌ nə shɨshwi. Wə ntɨə faŋ ŋwə dùꞌ fuu ŋkaw məsɔꞌ mbi nə, jə̀ vəbee vi, shìtə vəŋ shɔ.

¹⁶ Jɨŋ kee baa za vəŋ me, fwisə vəŋ kee yɔŋ me. Shɨshwi kee baa bee ndɔ̀ŋ dɨdɨꞌ tɔ vəŋ, yɨ̀sə vəŋ bwa me.

¹⁷ Lùu nɨniŋ buꞌ laa bi-njɨɨ yɔ́, faŋ ŋwə lùu nɨntəŋ kenə kɔ́ nə, taa kɨ shiinə vəŋ, ndì vəŋ, gə̀ nə vəŋ yɨ koꞌ-fɨ-nsi faŋ muu mə məbwey fùu fɨ fuŋ. Nwi baa tɔ̀ŋsə mənsɨ fɨ sɨ vəŋ laylay.»