Reveleyshən 14 - Vengo (Babungo)

Kristo ghɔ vɨ vɨɨ vi ŋkaŋsə waaghɨꞌ nə ŋkaŋsə njɔsə-yishwe muu-yinshwe

¹ Mə baa ndèynə, yè wee-bi-njɨɨ ghɔ́ faŋ ŋwə dùꞌ fuu baŋ Zayon, ghɔ vɨɨ ŋkaŋsə waaghɨꞌ nə ŋkaŋsə njɔsə-yishwe muu-yinshwe, faŋ vɨ nə nyɔ̀ꞌ yizii wee-bi-njɨɨ ghɔ́ nə yizii Tii wi mbootɔ vəŋ.

² Mə baa luu zɔ gɨ yimɔ́ꞌ fɨ taa yizɔ yaa gɨ muu məyaŋmə, baa nə yaa yibay yikwalə. Gɨ yɔ́ faŋ mə nə zɔ nə, nə luu yaa gɨ vɨɨ məbuꞌ vəndəə-və-ntɨ faŋ vəŋ bùꞌ vəndəə-və-ntɨ nə.

³ Vəŋ zwa nyay yifi vɨsɨ kenə Nwi, baa nə vɨsɨ vətɔ vəbweyvə vɔ́ yishwe nə, baa nə vɨsɨ vɨɨ taa vɔ́. Nə kɨkaꞌ wə kee zwètə nyay yɔ́ me, tɨ̀ lɨꞌ sheꞌ vɨɨ vɔ́ ŋkaŋ waaghɨꞌ nə ŋkaŋsə njɔsə-yishwe muu-yinshwe faŋ Nwi nə shòꞌ vəŋ fɨ taa mbi, ywàŋ nə mənshi mə ŋwiŋ wi nə me.

⁴ Lùu vɨɨ mbɨə faŋ vəŋ kee bɨsə ghɔ vəŋ buꞌ nu vəki me, nə vɨɨ faŋ vəŋ nə kee bèꞌsə nwi day me. Vəŋ beꞌsə luu bi-njɨɨ yɔ́ maa shəŋ tɨ̀ me shəŋ faŋ nyə gə̀ shɔ. Luu mfɔŋsə vɨɨ faŋ vɨ nə ywàŋ, jwì nə vəŋ tɨ́ Nwi ghɔ bi-njɨɨ yɔ́.

⁵ Vɨ nə kee zɔ tuu nu ba fɨ shuu vəŋ me. Tuu wee-ndoꞌ kee lùu maa vəŋ me.

Faŋ nshiisə-ŋiisə Nwi jwi nə ntɔŋ yijəə, baa nə nsɔꞌ Nwi

⁶ Mə baa kɨ ye, yè nshiiŋii Nwi yimɔ́ꞌ faŋ ŋwə vɨɨlə fɨ nɨntəŋ yizɔ, jwì nə ntɔŋ yijəə faŋ nyə gòꞌsə yighee muꞌ, fɨꞌtə tɨ́ vɨɨ vənshə fɨ taa mbi, tɨ́ məshɨ mənshə, nə təkuu tə vɨɨ tənshə, nə təghaŋ tənshə, nə ŋgwisə vɨɨ vənshə.

⁷ Ŋwə nə gì nə gɨ yishaꞌsə laa, «Viŋ kɨ fee Nwi, bəŋsə ŋwə, buꞌ laa yighee njyə faŋ ŋwə taa shoꞌtə vənu və vɨɨ kùꞌnə. Viŋ kɨ bəŋsə wə ntɨə faŋ ŋwə nə bɔ̀ŋ yizɔ ghɔ nsi, nə mamuu, nə vəkoꞌ-fɨ-nsi faŋ muu fuu fɨ fuŋ nə.»

⁸ Nshiiŋii Nwi yimɔ́ꞌ lwesə səbɔɔ fuu jwi, gì ŋkii laa, «Vɨ sɔꞌ shɨ Babilɔn, mɔ̀ꞌ nsi, buꞌ laa ŋwə nəə beꞌsə vəsakə nə, baa kɔ̀ fɨ maa məluꞌ mə nu bwə kɔ́ tɨ́ ŋgwisə vɨɨ vənshə, vəŋ nu nɨzi.»

⁹ Nshiiŋii Nwi lwesə sətia jwi gì ŋkii nə gɨ yishaꞌsə laa, «Wə kɨ luu kɨ bəŋsə nyaa yɔ́ nə fənyia fi, baa biŋ laa vɨ shwee shwenə kɔ́ mbootɔ ŋwə, tɨꞌnə me ghɔ ŋwə,

¹⁰ buu ŋwə taa kɨ nu fwi yishəsə Nwi yaa məluꞌ, faŋ Nwi kwàŋ taa ndaw məluꞌ, kee wasə me. Kəŋ wə ghɔ́ ndɔ kɨ ye ŋɨꞌ taa wi nə wisə baynə faŋ luŋ ki zwilə vɨɨ yikəꞌ nshiisə-ŋiisə Nwi, baa nə yikəꞌ wee-bi-njɨɨ ghɔ́.

¹¹ Fəndɨꞌ kɨ fuu fɨ maa shəŋ ŋkɨə faŋ vɨ twaŋ vəŋ shɔ maa vəshi və mbi vənshə, kee ndɔ mè me. Vətuꞌ nə shɨshwi yighee məshəŋ ŋwaa kee lùu shɔ tɨ́ vəŋ me. Vəŋ ye ŋɨꞌ, buꞌ laa vəŋ nə bəŋsə nyaa yɔ́ nə fənyia fi, baa fì shwenə yizii ki maa vəŋ.»

¹² Nɨniŋ, ŋkə bàw laa vɨɨ ley Nwi faŋ vəŋ jia ntɨsə Nwi, baa nùŋ fwisə vəŋ maa Yeso nə, kɨ jia fwisə vəŋ, kee biŋ nyaa yɔ́ me.

¹³ Mə baa kɨ nii zɔ gɨ wə gi fɨ yizɔ laa, «Nyɔꞌ taa ŋwaꞌlə laa, shù ndee mənɔŋ-bwaŋnə lùu tɨ́ vɨɨ mbɨə faŋ vəŋ taa kɨ ku taa ghɔ tɨta Kristo. Zwitə Nwi gì laa lùu nɨniŋ. Vəŋ taa kɨ shəŋ ŋwaa, buꞌ faꞌ ŋgwə faŋ vəŋ nə faꞌ nə wutə nə. Lumə vəfaꞌ vəvəŋ beꞌsə vəŋ.»

Faŋ nsɔꞌ Nwi ndɔ ŋii shɨ nsi

¹⁴ Mə baa ndèynə, yè mbɔꞌ yifusə, ye wə duꞌ fuu mbɔꞌ yɔ́ yaa Wuu yinsəŋ Nwi, nə yisɔꞌ vəfwàŋ tɔ ŋwə, faŋ vɨ nàysə nə goolə, nə nywi say ghinə ghɔ ŋwə ŋkee yishəsə.

¹⁵ Nshiiŋii Nwi yimɔ́ꞌ baa fùu fɨ taa ŋii Nwi yikwalə, yùmə ŋkee nə gɨ yishaꞌsə tɨ́ wə ghɔ́ faŋ ŋwə nə dùꞌ fuu mbɔꞌ yɔ́ laa, «Ndi nywi yə, gwìa vətɔ shɔ fɨ taa biisə, buꞌ laa yighee kùꞌ maa məshwi vətɔ fɨ taa mbi.»

¹⁶ Wə ghɔ́ faŋ ŋwə nə dùꞌ fuu mbɔꞌ nə, jɨɨsə nywi taa mbi, shwì vətɔ fɨ taa mbi.

¹⁷ Nshiiŋii Nwi yimɔ́ꞌ kɨ nii fùu fɨ taa ŋii Nwi yizɔ, baa kìi nywi yishəsə ghɔ ŋwə.

¹⁸ Nshiiŋii Nwi yimɔ́ꞌ faŋ ŋwə kìi wutə məsɔꞌ wisə, fùu fɨ taa shəŋ məkɔ Nwi, gì ŋkee nə gɨ yishaꞌsə tɨ́ nshiiŋii Nwi njii-wə faŋ ŋwə nə kìi nywi ghɔ ŋwə nə, laa lee, «Ndi nywi yə, shetə vətaŋ vətɨ shɔ faŋ mbə lùu maa tɨ taŋ kì fɨ shɨ nsi, buꞌ laa vətaŋ vɔ́ tà.»

¹⁹ Nshiiŋii Nwi yɔ́ jɨɨsə nywi yi shɨ nsi, shetə vətaŋ vətɨ fɨ fuu tɨ taŋ kɔ́, mɔ̀ꞌ taa shəŋ məkaŋ məluꞌ mə Nwi nə njyoꞌ yishəsə.

²⁰ Vɨ kaŋ vətaŋ vətɨ vɔ́ fu fɨ taa shɨ, mənshi fuu fɨ maa shəŋ məkaŋ məluꞌ kɔ́, kɨ shɔɔ yaa muu, nyɨŋ yaa vəkilomita yiwa yitia, məgə wi luu yaa kwiŋ ŋkwəŋ.