Reveleyshən 10 - Vengo (Babungo)

Faŋ nshiiŋii Nwi nə kɔ̀ ŋwaꞌlə tɨ́ Jɔn laa ŋwə kwə

¹ Mə baa kɨ ye, yè nshiiŋii Nwi yikwalə yimɔ́ꞌ siꞌ jwì fɨ yizɔ, mɔ̀ꞌ mbɔꞌ maa ŋwə yaa njwi, nə kuluŋ tɔ ŋwə. Yikəꞌ yi nə bee yaa shɨshwi, fəŋ ghi luu yaa vətweꞌ və wi.

² Ŋwə jia wee-ŋwaꞌlə ghɔ ŋwə, faŋ vɨ ŋaꞌsə. Ŋwə tə ghuu ki kəmaꞌnə fuu mamuu, tə ŋkə kwiŋ ŋkwii fuu nsi,

³ yumə ŋkee nəŋay yaa bikəə yaa kɨ yumə. Faŋ ŋwə nə yumə nɨniŋ nə, yibay bwələ ghee kwatia, bə̀ŋsə tɨ́ ŋwə.

⁴ Yibay bwələ ghee kwatia nɨniŋ nə, mèꞌtə, mə kəə nyɔꞌ nu ŋkɨə faŋ nyə gi, zɔ gɨ wə gi fɨ taa yizɔ laa, «Ndɨə nu ŋkɨə faŋ yibay nii bwələ ghee kwatia, gì nə. Kɨ nyɔꞌ me!»

⁵ Nshiiŋii Nwi yɔ́ faŋ mə nə ye ŋwə faŋ ŋwə nə tɨŋ fuu mamuu baa nə nsi nə, shaꞌsə kwiŋ maꞌnə wi yizɔ,

⁶ lɨ̀ꞌtə yizii wə ntɨə faŋ ŋwə gòꞌsə yighee muꞌ nə, faŋ ŋwə nə bɔ̀ŋ yizɔ nə vətɔ mbɨə faŋ mbə lùu tey yi, nə nsi baa nə vətɔ mbɨə faŋ mbə lùu fuu yi, baa nə mamuu ghɔ vətɔ mbɨə faŋ mbə lùu tey yi nə, ŋwə lɨꞌtə laa, kɨ məbetə baa lùu shɔ me.

⁷ Ndɔ luu maa vəshi mbɨə faŋ nshiiŋii Nwi, njyə lwesə kwatia, ndɔ taw yisaw yi, buu Nwi metə vənu vənshə faŋ ŋwə nə ndɨ̀ə fɨ ghɔ vɨɨ nə. Mbə taa gay, fàynə maa ntɔŋ yijəə Nwi faŋ Nwi nə fɨ̀ꞌtə tɨ́ vɨɨ faꞌ vi, faŋ lùu nshiisə-ŋii sɔghɔ nə.

⁸ Gɨ wə njyə faŋ mə nii zɔ fɨ yizɔ nə, baa kɨ gì tɨ́ mə laa, «Gə fì ŋwaꞌlə ghɔ́, faŋ vɨ ŋaꞌsə nə, faŋ ŋwə lùu ghɔ nshiiŋii Nwi yɔ́ nə, faŋ ŋwə tɨ̀ŋ fuu mamuu, baa nə fuu nsi nə.»

⁹ Mə gə yɨ nshiiŋii Nwi yɔ́, gì tɨ́ ŋwə laa ŋwə kɔ ŋwaꞌlə ghɔ́ shee. Ŋwə gi tɨ́ mə laa, «Kɔ̀, kwə! Ŋwaꞌlə ghɔ́ taa biŋ fɨ taa njyoꞌ ghɔ, luu nə, sɨsɨꞌsə fɨ shuu ghɔ yaa zɔsə.»

¹⁰ Mə fi wee-ŋwaꞌlə ghɔ́ fɨ ghɔ nshiiŋii Nwi yɔ́, kwə. Ŋwə sɨꞌsə yaa zɔsə fɨ shuu mə. Luu nə, faŋ mə nə kwə mètə, ŋwə nə bɨbiŋ fɨ taa njyoꞌ mə.

¹¹ Vɨ baa kɨ nii nàysə shee laa mə ndɔ ghaa kɨ fɨꞌtə nu ŋkɨə faŋ Nwi kwàŋ taa shuu mə nə, tɨ́ ŋgwisə vɨɨ vəyaŋ, nə məshɨ məyaŋ, nə təghaŋ təyaŋ, nə vəfwàŋ vəyaŋ.