2 Tesalonika 3 - Vengo (Babungo)

Bàw vɨɨ Nwi buꞌ ghɔ tɨ́ Nwi laa ŋwə yɨsə nu ki saynə taa mbi

¹ Vaŋ-nshwi via, maa məndwə vənu vɔ́, yia naysə tɨ́ viŋ laa viŋ kɨ buꞌ ghɔ tɨ́ Nwi tɔ yia, laa nu tɨta Kristo toꞌ sàynə, vɨɨ kɨ bəŋsə nu kɔ́, yuu ŋkə yaa gay taa ŋwaa viŋ nə.

² Viŋ buꞌ ghɔ tɨ́ Nwi laa ŋwə bweysə yia fɨ ghɔ vɨɨ bwənə faŋ vəŋ yɨsə vənu faŋ mbə kee yikuꞌnə me. Vəŋ yɨ nɨniŋ buꞌ laa nu mənuŋsə fwi maa Kristo kee lùu nu vɨɨ vənshə me.

³ Luu nə, tɨta Kristo lùu wuu yinsəŋ, kwaŋ wutə maa viŋ, shìinə viŋ fɨ ghɔ tɨɨ vəzwitə vəbwəvə.

⁴ Yia nùŋ fwi sia maa viŋ buꞌ tɨta Kristo laa viŋ kɨ yɨsə nu ŋkɨə faŋ yia nàysə tɨ́ viŋ nə, viŋ kɨ yɨyɨsə, taa baa kɔꞌ yɨyɨsə nɨniŋ.

⁵ Tɨta Kristo kiasə fwi siŋ, viŋ kɨ kaw vɨɨ faŋ Nwi kaw viŋ nə! Viŋ jia fwi siŋ fɨ taa ŋɨꞌ, sheꞌ faŋ Kristo nə jìa fwi yi nə!

⁶ Vaŋ-nshwi via, yia naysə tɨ́ viŋ maa yizii tɨta Yeso Kristo laa, viŋ buꞌsə fɨ ghɔ wə tɨ̀ me wə taa ŋwaa viŋ faŋ ŋwə kee kàw faꞌ me, kee kɨ toꞌ fɨ taa ntɨ njyə faŋ yia nə kɔ̀ tɨ́ viŋ nə me.

⁷ Viŋ kɔꞌ kɨɨ faŋ ŋkə bàw laa viŋ kɨ beꞌsə ghuu yitoꞌ kia, buꞌ laa yia nə kee tòꞌ twey faꞌ taa ŋwaa viŋ me,

⁸ kee fì bee wə, zɨ̀ dayday me. Maa yia nə sàŋ yiŋwaa, fàꞌ nə wutə, fàꞌ vətuꞌ nə shɨshwi, laa kɨ tuu wə fɨ taa ŋwaa viŋ kee kɨ ye ŋɨꞌ maa məzəsə yia me.

⁹ Yia nəə kee yɨ nɨniŋ buꞌ faŋ ŋkə nə kee kùꞌnə tɨ́ yia me. Yia nəə yɨ nɨniŋ laa yia də shwenə nu tɨ́ viŋ, tɨ́ kaꞌ viŋ ndì ghuu yitoꞌ kia fɨ fuŋ.

¹⁰ Maa yia nə duꞌtə yia naysə nu kɔ́ tɨ́ viŋ, faŋ nsiŋ nəə kɨ bii mɔ́ꞌ nə, laa wə kɨ luu kee kɨ kaw faꞌ me, kɨ ŋwə zɨ me.

¹¹ Yia nyɔ̀ꞌ vənu vɔ́ tɨ́ viŋ nɨniŋ, buꞌ laa yia zɔ laa vɨɨ mɔ́ꞌ taa ŋwaa viŋ kee toꞌ maa jɨɨ yijəə me, kee kàw faꞌ me, toꞌ sheꞌ maa nu dayday.

¹² Yia gi tɨ́ kəŋ vɨɨ vɔ́, baa tɨsə vəŋ maa yizii tɨta Yeso Kristo, laa vəŋ shia, kɨ faꞌ faꞌ, zɨ fazɨ vəŋ fɨ maa faꞌ vəŋ.

¹³ Gə fɨ maa viŋ, vaŋ-nshwi via, kɨ viŋ bwa maa məyɨ nu jəə me!

¹⁴ Kɨ luu wə mɔ́ꞌ kee zɔ̀ ntɨ yia faŋ nyə lùu taa ŋwaꞌlə ŋwə̀ nə me, viŋ shwenə ŋwə, kee kɨ zɨnə viŋ vɨ vəŋ me, yuu tɔ ki dɨɨ, ŋwə kwiinə fwi yi.

¹⁵ Luu nə, kɨ viŋ ndi ŋwə yaa wuu mbeenə wiŋ me, kɔꞌ kɨ tɨtɨsə ŋwə, buꞌ faŋ ŋwə lùu weenshu ŋwaa-nsiŋ nə.

¹⁶ Ŋkee nshɨ-tɔ Tɨɨ mənɔŋ-bwaŋnə kɔ viŋ nə mənɔŋ-bwaŋnə ghee nshə maa jɨɨsə sənshə! Tɨta Kristo goꞌsə viŋ vɨ vəŋ vənshə!

¹⁷ Məshɔꞌtə ŋwə̀ faŋ mə nyɔ̀ꞌ feenə, nyɔ̀ꞌ mə Pɔɔl ŋgɨɨ-mə, ŋkee nə ghɔ kaŋ. Lùu shwenə kaŋ maa vəŋwaꞌlə vaŋ vənshə faŋ mə nyɔ̀ꞌ nə. Maa viŋ ye sɨ ŋwaꞌlə ŋə̀ faŋ mə nyɔ̀ꞌ ŋgɨɨ-mə nə.

¹⁸ Mənɔŋ-bwaŋnə tɨ́ viŋ fɨ ghɔ tɨta ŋwaa-nsiŋ Yeso Kristo.