2 Tesalonika 2 - Vengo (Babungo)

Nu məjwi Kristo faŋ ŋwə ndɔ baa bəŋ jwi, baa nə nu vɨɨ məbweꞌsə vɨɨ kɔ̀ŋ Kristo

¹ Vaŋ-nshwi via, gə fɨ maa məjwi tɨta ŋwaa-nsiŋ Yeso Kristo, faŋ ŋwə ndɔ baa jwi, shə̀ŋtə nsiŋ yɨ ŋwə nə, yia bùꞌ ghɔ tɨ́ viŋ laa,

² viŋ kɨ duꞌ, wə kee bùulə fwi siŋ me. Kɨ fwi siŋ ghaysə viŋ me! Shi kɔ́ faŋ tɨta Yeso ndɔ baa bəŋ jwi nə, kee ta yikuꞌnə me. Wə kɔlə jwi gi tɨ́ viŋ laa Zwitə Nwi twèlə nu kɔ́ tɨ́ yi, tɨꞌnə me laa gì yia tɨ́ yi, tɨꞌnə me laa nyɔ̀ꞌ yia nɨniŋ, laa shi kɔ́ kùꞌnə, kɨ fwi siŋ ghaysə viŋ shɔ me!

³ Kɨ viŋ biŋ laa wə bweꞌsə viŋ nə tuu nu kəmuꞌ me! Kaꞌ shi kɔ́ kee ta kùꞌnə me. Viŋ kɔꞌ kɨɨ laa vənu vəmɔ́ꞌvə ndɔ ghaa gay ŋkəə, buu kaꞌ shi kɔ́ taa kuꞌ. Vənu vɔ́ lùu laa vɨɨ ndɔ meꞌ nu Nwi. Wuu mətwey ntɨsə Nwi, wee ndwaŋ, fuu taa mbi ntee.

⁴ Wuu mbeenə ghɔ́ ndɔ tuŋ yighaw ghɔ Nwi, kòꞌsə ŋwaa wi yizɔ, kəə maa məshɔɔ vətɔ vənshə, faŋ vɨɨ tii nə Nwi, baa nə vətɔ faŋ vɨ bəŋsə laa lùu vətɔ və Nwi. Ŋwə ndɔ gə duꞌ ŋkee taa ŋii Nwi yikwalə, kɨ tii yizii yi laa yi lùu Nwi.

⁵ Maa viŋ baa lumə faŋ mə yaa naysə vənu vɔ́ vənshə tɨ́ viŋ faŋ nsiŋ nə luu mɔ́ꞌ nə.

⁶ Ndwə, viŋ kɔꞌ kɨɨ nə nu ŋkɨə faŋ ŋkə fə̀ŋ wuu ndwaŋ ghɔ́, laa kɨ ŋwə ta fuu ntee maa yighee yi me.

⁷ Luu nə, nu mətwey ntɨsə Nwi duꞌtə ŋkə luu maa faꞌ, luu nə, kee ta fuu ntee me. Nu kɔ́ faŋ ŋkə ndɔ gay nə, kaꞌ ŋkə ndɔ gay sheꞌ maa yighee njyə faŋ Nwi ndɔ baꞌsə wə ntɨə faŋ ŋwə fə̀ŋ nu kɔ́ ndwə nə.

⁸ Ndɔ luu maa yighee yɔ́, wuu mətwey Nwi ghɔ́ fuu ntee. Luu nə, tɨta Yeso ndɔ zwi ŋwə sheꞌ nə zwitə shuu ki, ndìsə ŋwə maa shi ŋkɨə faŋ ŋwə ndɔ baa fuu ntee, jwì yè vɨɨ vi.

⁹ Ndɔ yɨsə Satan, tɨɨ vəzwitə vəbwəvə, laa wuu ndwaŋ ghɔ́ fuu taa mbi, kɨ yɨsə vənu və shuu yɔŋvə vənshə, nə vəshwenə nə vənu və yifiŋtə, faŋ lùu sheꞌ vənu və təba.

¹⁰ Ŋwə ndɔ bweꞌsə vɨɨ nə taŋ vənu vədayday vənshə faŋ mbə kee lùu vəloomə me, bwèꞌsə vɨɨ mbɨə faŋ vəŋ nə kee kàw nu yinsəŋ me, tɨ́ kaꞌ Nwi bwèysə vəŋ me. Vəŋ ndɔ ndi vənshə.

¹¹ Lùu ŋiꞌ nu ŋkɨə faŋ Nwi tɔ̀ŋ zwitə təba, ŋkə faꞌ taa ŋwaa vəŋ nə wutə laa vəŋ biŋ təba tɔ́.

¹² Nɨniŋ, Nwi kwàŋ nsɔꞌ tɔ vɨɨ vənshə faŋ vəŋ nə kee bìŋ nu yinsəŋ me, kaw sheꞌ nu ŋkɨə faŋ ŋkə kee lùu kəloomə me. Vəŋ ndɔ gu nsɔꞌ.

Faŋ Pɔɔl nə bwàŋ Nwi faŋ ŋwə shòꞌ vɨɨ Tesalonika

¹³ Vaŋ-nshwi via, fwi sia dɔŋsə yia laa yia kɨ bwaŋ Nwi ghee nshə buꞌ viŋ, faŋ Mɔꞌmbi kàw viŋ nə, buꞌ laa Nwi nə shòꞌ viŋ shù fɨshi, laa viŋ ndɔ baw shɨlə, gə̀ nə vɨsɨ. Yɨsə Zwitə Nwi laa viŋ baw, gə̀ nə vɨsɨ nə, baa nùŋ fwi maa nu yinsəŋ.

¹⁴ Ŋwə nə tìi viŋ faŋ yia nə fɨ̀ꞌtə ntɔŋ yijəə Nwi tɨ́ viŋ nə, laa viŋ ndɔ kii feenə yaa tɨta ŋwaa-nsiŋ Yeso Kristo kìi feenə nə.

¹⁵ Nɨniŋ mɔɔ, vaŋ-nshwi via, viŋ kɨ tweꞌ, jìa vənu mbɨə faŋ yia nə nàysə tɨ́ viŋ nə shuu wia, nə mbɨə faŋ yia nə nyɔ̀ꞌ tɨ́ viŋ taa ŋwaꞌlə wia nə.

¹⁶ Nshɨ-tɔ tɨta ŋwaa-nsiŋ Yeso Kristo nə tɨta Nwi faŋ ŋwə nə kàw nsiŋ, kèe gəŋ saŋ-nsiŋ, bàwsə fwi saŋ-nsiŋ, nsə kuꞌnə yighee muꞌ nə, yɨsə nsiŋ kɨ kɨꞌ ŋkee nu jəə.

¹⁷ Bàw ŋwə kɨ boolə fwi siŋ, kwàŋ wutə maa viŋ, tɨ́ kaꞌ viŋ kɨ yɨsə vənu vəjəəvə vənshə, gisə sheꞌ vənu vəjəəvə nɨzi.